MUKAANAAM 11

1Kúriiŋenaak di kuriibaak kuceenak kammi Yúdea búrom di kujammi mati Kakaanutumi Kúyahuudak poop kúyineyinen furimaf fati Atijamit. 2Nan Peter alaañulomi Yerusalem, kúyinena Kúyahuud kuceen katampimi di kulakomi élusooley. 3Di kommi, “Wau kaane nujaw unoken sísindaas sati katamputimi ban di jirioor di bukoo?” 4Bare Peter nataatumi eregiiley wabajomi káŋarum di fúcitumaf: 5“Nan ilakoeenumi elawey di ésukey yati Yopa, nijukumi waaf nan sáaut waanoe nan fuparala fáamak falakomi káwaloul kápurumul fatiya nan sígoolenas sibakiiras sisofimi, ban fuwalomi bee di ínje. 6Nan ijikerumi síndeneey yoolifo, nijukumi sínukuruŋ sati úkamun, di sáfuulooremi, di bánaakayita. 7Ban nijammi furim faanammi, ‘Peter, yito! Buj man uri.’ 8Bare ínje nemmi, ‘A’a, Akiiyaau. Mati muriaay masikoe mba matiluluti mujawurerut di butumom.’ 9Bare furimaf di fulaañumi fusankenom di bukinab bajakaab, ‘Wan Atijamit atilulumi takum au ureguwo usikosiko.’ 10Mo’omu mubajobajo ñooni ñáfeegiir, ban waafaw búrom di uŋarimi bee di bukinab bajakaab. 11No’onu kúniine kúfeegiir kaboñimi di Kasaaria kúriiŋumi di eluupey dán ilakomi. Di kuboñimi kápurumul di ésukey yati Kasaaria man kuŋarom. 12Búyegetab Bátienaab di buregammi man ijaw di bukoo, takum búyegetom bugaal. Kuriibaak kutiaak kooni futokey di ákonau koo poop di kutooñammi, ñaa wúli póopoli nunokenumi síndeey yati ániinaau ume. 13Náregolireg man ajukeenumi maleekaay yajawulomi man ejummi di síndo’ool, yaanoomi, ‘Boñ kuceen kujaw bee ésukey yati Yopa man kúwonkul ániinaau an koonemi Simon Peter. 14Panasanken kurim pánkuŋarul epakey bee di au di fiilaf fooli búrom.’ 15Nan itooŋumi kasanken, Búyegetab Bátienaab di buwaloulomi bee di bukoo nan man buwalouloeenumi di wulaal búrom di mútiyaaram. 16Ñaa niwoolomi furimaf fati Akiiyaau fan aregeenumi, ‘Yaaya nátiigulenetiigulen bukanak ñátum di mumel, bare muyuul pánjitiiguleni ñátum di Búyegetab Bátienaab boola.’ 17Mati Atijamit nasensen Kakaanutumi Kúyahuudak kukila kawulak kákonak kan asenolaami nan úyinenaami di Akiiyaau Yensa Apakenaau Áamakau. Kama ínje ai ampi ujuumoor di Atijamit bee kañakoor?” 18Nan bukaaku kujammi mo’omu, di kukat bálusool man kutaatumi kusal mákalaam mati Atijamit. Di kommi, “Atijamit nasensen poop buruŋ Kakaanutumi Kúyahuudak man kútiiwoor kukat bálamuk majakutiil ban naseniimi eroŋey yati bándoorey.” 19Kuriiba kuceen di kuyiisooreenumi mati kásuutukenak kabajoeenumi nan kubujumi Sitefan kuban. Bukaaku di kujawumi bee di Fonekia, bukaaku bee di Sipur, bukaaku bee di Antiok, ban di kulakomi káriiŋen furimaf fati Atijamit bee di Kúyahuudak cebiil. 20Bare kuriiba bukaaku di bajumi kúniine bukaaku di bukoo kápurumulomi di fúrinkaf fati Sipur di mofam mati Kurene di kujawumi bee Antiok man kutooŋ káriiŋenak kurimak bee di Kakaanutumi Kúyahuudak mati Akiiyaau Yensa. 21Kánkumak kati Akiiyaau kulakolako di bukoo, ñaa bukan kajuupoe di kútiiwoorumi bee di Akiiyaau Yensa ban di kunen kafiumak kooliil di oo. 22Nan kati di fujojaf kammi Yerusalem kujammi wabajomi, di kuboñumi Banaabas bee Antiok. 23Nan áriiŋubomi najuk man Atijamit áyiiseniimi majakam moola di súumoomi. Ñaa náliŋenumi kuriibaak poopiil man kucin di Akiiyaau di malegenam di úyegetiil búrom. 24Banaabas ániine ajake, ban nameeŋumi di Búyegetab Bátienaab ban náliŋumi di kafiumak. Ban bukan kajuupoe di kubilumi kúyinen Akiiyaau kápurumul di oo. 25Ñaa Banaabas najawumi bee ésukey yati Tarus bee eñes Saul, 26ban nan atookoomi, nájeetumoomi álaañenulool bee Antiok. Wáriiŋe emit búrom yo, koo kugabaak di kulakomi tákon di kati fujojaf man kulakomi kaliikiten jameeŋ yáamak. Boo Antiok kuriibaak kati Akiiyaau kutooŋumi ewonkiey Kukirisican. 27Di kunak kukila, kuboña kuceen kati fujojaf kápurumulomi Yerusalem bee Antiok. 28Ákon di bukoo an koonemi Agabo. Búyegetab Bátienaab bukammi man ajuum man areg mati bacaar báamak boote kabajo di dúniyaay búrom. Bacaarab bukila bubajobajo nan Kilaud alakomi ejunkutey yati Áyiau Áamakau. 29Kuriibaak kammi di Antiok di kusofumi lit, mati anoosani panawul wan aŋoolenumi bee karamben kupaaliil kuriibaak kacinumi Yúdea. 30Kukankaan mo man kuboñ sígodi’iil Banaabas di Saul man kújeetummi bee di kunifaanak kati fukobaf fáamakaf fati Yerusalem.

will be added

X\