MUKAANAAM 10

1Di ésukey yati Kasaaria di bajumi ániine an koonemi Koneeli, akaanenumi arungaau ati kayooŋak káamakak kan koonemi Kayooŋak kati Italia. 2Oo nakaan akoba áamak, oo di fiilaf foola kukankaan bukan kákolie Atijamit ban di kumiiceelaetool máamak. Akila narambeneramben di eseney kawulak bukanak, ban nalawelaw Atijamit nanoosani. 3Balay bákon, wáriiŋe nanan nati sirig sífeegiir di tutularaay maleeka yati Atijamit di erajulo’oomi najukuyomi nan sáaut, man yoonoomi, “Koneeli!” 4Koneeli najikerumi maleekaay caw di kákoliak di kóro, man ammi, “Arungaau, mo’omu waa?” Maleekaay di elaañenoomi, “Atijamit najanjam kúlawak kooli, namanjumi wan uwulumi kabajutumi, moo kaane oo oomu di eyiiŋi. 5Iñeme boñ bukan kujaw bee ésukey yati Yopa man kúwonkul ániinaau an koonemi Simon Peter. 6Oo oomu man awannoore di síndeey yati Simon, ábala an eluupool elofumi di falaf.” 7Nan maleekaay esankenoomi mo’omu di ejawumi ewuuj. Ban Koneeli nawonkumi kumiiceelaool kugaba di atiika oola ákon akobemi Atijamit máamak. 8Ban naregiimi wabajoeenumi aban, naboñiimi bee Yopa. 9Fati kajomaf, nan kulakomi ejaay di buruŋab, kulofenumi Yopa, Peter najawumi bee fatiyena yati kalimbis bee elaw man karabak kulofe. 10Bacaarab di busofoomi namaŋumi bee furi, bare nan kulakomi kajoonenak karabak man kuri, najukumi waaf nan sáaut. 11Ban najukumi bukinab bajakaab man búwambuloe, najukumi waaf waam di káwaloul waanoe nan fuparala fabaje sígoolene sibakiiras man sisofi. 12Dóo di fo sínukuruŋas sanaamutas búrom soosu ró, sínukuruŋ saje’emi úkamun, di sáfuulooremi, di bánaakayita. 13Ban di bajumi furim fajawulo bee di oo man foone, “Peter, yito! Buj man uri.” 14Bare Peter nammi, “A’a, Akiiyaau. Ínje irirerut muriaay masikoe mba matiluluti.” 15Furimaf di fulaañumi fommi, “Wan Atijamit atilulumi, takum au ureguwo usikosiko.” 16Mo’ome moo mukankaan ñooni ñáfeegiir, yaŋ too galab fuparalaaf di fuŋarimi bee di bukinab bajakaab. 17Peter di kaanoomi síwoonoor sáamak sati wan mo’omu mufelumi wan ajukumi nan sáaut. Kúniinaak kan Koneeli aboñulomi di kutookumi eluupey yati Simon ban kommi. Iñeme bukooku man kujuume di fúlamutaf. 18Di kuwonkumi man kuceeŋumi manteer dáare dóo Simon Peter ammi? 19Nan Peter alakomi kawoonoorak káamak mati wan ajukumi nan sáaut, Búyegetab Bátienaab di boonoomi, “Yénten, kúniine kúfeegiir kaam di eñesi. 20Yito man ujaw jiriiboor di bukoo ban takum búyegeti bugaal, mati ínje íboñuliil.” 21Peter nawalomi man ammi kúniinaak, “Ínje eenomi ániinaau an jiñesemi, waa jijawulo beet?” 22Di kommi, “Arungaau Koneeli áboñuloli, oo ati kutiikaak Kúroomanak. Oo ániine ajoone ban akoba áamak ákolimi Atijamit, di poop Kúyahuudak búrom kúsuumensuumen kareesool máamak. Maleeka yati Atijamit eregool áwonkuli bee di eluupool, man aŋoolen ajam wan oote eregooley.” 23Peter nawaleniimi di eluupool man kumoor. Fati kajomaf nayitomi man kuriiboor di bukoo, ban kuriiba kuceen kati Yopa poop di kutooñool. 24Fati kajomaf di kúriiŋulomi di ésukey yati Kasaaria. Koneeli ammi di ekobiiley ban náwonkul kukiloorool di kupaalool káamakak tákon bee kayaño Peter. 25Nan Peter anokenumi di síndo’ool, Koneeli ayaño’oomi aban, nalomi kúfima man amiiceelaetoomi di bújonlenab boola. 26Bare Peter nayitenoomi, di aaney, “Yito! Ínje poop an ceb.” 27Peter narulenumi di kámikak di Koneeli kunokenumi dóo di eluupey dán atookumi bukan kajuupoe man kujoje. 28Peter naaniimi, “Muyuul di kúkouul jimammanj tíen mati sílingaas sati Kúyahuudak sífirenfiren man ínje Áyahuud kujamoor di Kakaanutumi Kúyahuudak. Bare Atijamit náyiisenanyiisen senut man iwoonoor an nasikosiko mba atiluluti. 29Moo kaane nan iboñimi, ñaa ilatut ebiley. Regom wau kaane nuwonkom.” 30Koneeli nalaañenumi, “Kunak kubakiir bálamuk nilakoeenlako elaw di eluupom nan bajumi sirig sífeegiir tutularaay. Yaŋ too galab ániine akaanoe wañ wakaane ñiliñil man ajuume fáculom. 31Naanammi, ‘Koneeli, Atijamit najanjam kúlawak kooli, ban namanjumi wan uwulemi kabajutumi, oo oomu di eyiiŋi. 32Boñ an bee Yopa man áwonkul Simon Peter. Oo oomu man awannoore di síndeey yati ábala Simon, an eluupool elofumi di falaf.’ 33Ñaa ínje iboñi ewonk galab, ban numaŋ man ubil uyiiŋom. Iñeme wulaal búrom bukooku di bújonlenab bati Atijamit, man úyenteni wan Akiiyaau ájaatikenimi man úregoli.” 34Peter nalaañenumi, “Malegen iñeme nijujuk Atijamit álaañeriit di an. 35Bare Atijamit nasofesof bukanak kápurumul di kansanken kanookani kámiiceelaeteoomi ban di kukaan wajoone. 36Jijanjam mati nabomboñ kurimak koola bee di bukanak kati Isirael, káriiŋenak furimaf fajakaaf fati kásuumaay kápurumul di Yensa Apakenaau Áamakau (oo eenomi Akiiyaau ati bukanak búrom.) 37Jimammanj furimaf fáriiŋenimi di mofam mati Yúdea búrom. Tooŋulotooŋ kapanak kati Galili nan Yaaya áriiŋenumi bukanak aban kurimak kati kátiigulenak. 38Man Atijamit amuken Yensa ati Nasaret ban nakammi Búyegetab Bátienaab man búwaloulool man abaj kánkum. Yensa najawumi bee banoosani man ammi di ekaaney jak di kasontenak kan Seetaanaay éroogumi, mati Atijamit oomu di oo. 39Wúli, kúriiŋenaak eenomi kúyiisena kati wanoosani wan akammi búrom di mofam mati Isirael di ésukey yáamakey yati Yerusalem. Yensa bukoo kufaaŋenoomi kubujool di ébaar yati búpin. 40Bare Atijamit náyitenulool di kacetumi di funakaf fúfeegintenaf ban nakaanoomi man araj di bukanak, 41akaanutool man araj bee di bukanak búrom, bare wúli kan ámukenaalimi man ukaan kúyiisenaool. Wúli eenomi uriemi uraanemi tín tákon di oo nan ayitoulomi di kacetumi aban. 42Ban nájaatikenolimi man úriiŋen furimaf fajakaaf bukanak ban núyiisen mati oo eenomi an Atijamit amukenumi bee kagamenak karoŋumi di kacetumi. 43Kuboñaak kati Atijamit búrom kusankensanken mati moola, di aaney anoosani áyinenumi di Yensa majakutool pammubonketi kápurumul di kareesak koola.” 44Nan Peter alakomi kasankenak mo’omu, Búyegetab Bátienaab di bookumi bukanak kalakomi búrom káyentenak furimaf. 45Kúyinenaak Kúyahuudak kuceenak kariiboorulomi di Peter, di sáloiimi máamak mati Atijamit nawalenwalen kawulak kati Búyegetab Bátienaab boola hani bee di Kakaanutumi Kúyahuudak. 46Iñeme di kujammi di kasanken usanken uceen wálauleriiti, ban di kusal mati mákalaam mati Atijamit. Peter nammi, 47“Mante an panaŋoolen áfireniil man kubaj kátiigulen di mumel, mati koo kuyayab Búyegetab Bátienaab nan man wulaal uyabaami?” 48Peter nájaatikeniimi man kútiiguleni, ñátum di kareesak kati Yensa Apakenaau Áamakau. Nan púrutomi, di kulawoomi manteer nabenen bo kunak kupinaay di bukoo.

will be added

X\