MUKAANAAM 1

1Anifaanau áamakau Teofil. Di búkaay yúmboom étiyaarey, niciciik waafaw búrom, wan Yensa akammi di wan aliikitenumi, káŋarum no’ona nan atooŋumi burokab boola, 2bee mo di funakaf fan ájeetumimi di bukinab bajakaab. Bala’a aŋarimi, Yensa nakammi Búyegetab Bátienaab man bújaatiken kúriiŋenaak kan amukenumi. 3Wáriiŋe kunak bukan kugaba oo baceterab aban, náyiisenooro tíen di uruŋ wajuupoe mati náyitenuliyiten di kacetumi. Ban narajulomi kúriiŋenaak koola ban nasankeniimi mati jáyiaj jati Atijamit. 4Nan Yensa aameenumi di bukoo nagameniimi tíen, takum kúpur Yerusalem, bare mbi kukob wan Ampaau áligeenumi. Ínje nireguureg mati wo. 5Yaaya, an jimanjumi, nátiigulenetiigulen bukanak ñátum mumel, bare di kunak kupinaay fácul Atijamit pánatiigulenuul ñátum Búyegetab Bátienaab.” 6Nan kúriiŋenaak kujojumi tákon di Yensa, di kuceeŋoomi, “Akiiyaau, mante au iñeme pánulaañenul jáyiaj bee di bukanak kati Isirael man kurung?” 7Yensa naaniimi, “Lee muyuul mambi jimanj nanan di kéel kan Atijamit Ampaom ajuumenumi di fujuumaf foola fúkoufo. 8Bare nampi Búyegetab Bátienaab buwaloulomi bee di muyuul, ban panjiyab kánkum ban di jikaan kúyiisenaom bee di bukanak kati Yerusalem, di mofam mati Yúdea di Samaria búrom, bee mo ban dúniyaay ereulomi búrom.” 9Yensa abanumi kasankenak piyout mo’ome nan kulakomi kajikerool naŋarimi bee fatiya, ban mati furolaaf kuŋoolenut kujukool. 10Di kulakomi kajikerak fatiya man ammiñaa ejaay, yaŋ too galab kúniine kugaba kakaanoe wañ útumpaay púl di kujuumiil to. 11Di kooniimi, “Bukanak kati Galili, wau kaane di joom di kajiker fatiya? Yensa o’omu, aŋarimi bee fatiya, di mo’omu mákonam pánalaañul nan man jijukoomi eeno najaw.” 12Kúriiŋenaak di kulaañumi bee Yerusalem kápurumul di furembooraf fan koonemi Uwoliiw, falofumi Yerusalem, káloiak koolifo di ésukey ekila kúrindiiŋ ékilomeetar yákon. 13Kunokennoken di ésukey ban di kuremboorumi bee kalimbisak kammi di fatiyena, tan kulakomi tákon di bukoo, Peter, Yohan, Yankuba, Anduru, Filip, Tomas, Batolome, Matiu, Yankuba añiilau ati Alif, Simon an ati di fujuumaf fati kafaŋumi man kumaŋe mofiil di Yúdas añiilau ati Yankuba. 14Kukila kujojejoj tákon di búyeget bákon mansi kulaw, koo di kuseek kupinaay, ákon di bukoo Yensa iñaayool Mariyaama, di Yensa kutiool. 15Di kunak kukila, Peter nayitomi ajuum titoorey yati kutiool kuriibaak, (kuriibaak kati Yensa di kujojumi káriiŋe ceme di kabanan), man ammi, 16“Kutiom, furimaf fati Atijamit footeene kálireni. Búyegetab Bátienaab bukammi Dauda man asanken mati Yúdas. Nasankeneensanken no’ona wampi Yúdas akammi. Yúdas o’omu arungeenumi kúniinaak kajawulomi man kusof Yensa. 17Yúdas noo ákon di wulaal, ban búrokeenoli bákon. 18(Yúdas nanommi kalaak kuceen aban di sígodaas san kucaamoomi mati bújakaataab boola, ban nalomi kúsinkitiŋ acetubomi, ápambumi manteer mulaam moola búrom muranjumi. 19Ban bukanak búrom kacinumi Yerusalem di kujammi mati mo’omu búrom, ban kalakaak kukila kuwonkemi, Akeedama, yoo eenomi, Kalaakak kati Fúsimaf.) 20Mati di búkaay yati Jábuura ciikiciik, ‘Jikat síndo’ool man elako tíikaaruyo, ban takumbi an acin dó.’ Ban ‘Jikat mbi aceen aŋar burokool.’ 21Moo kaane wúli noote kamuken ániine aceen man alako burokab bati Yúdas. O’omu aate ekaan an ákon di bukanak káriibenolimi di kunakak búrom kan Yensa alakoeenumi di wúli, 22biñoo nan Yaaya átiigulenoomi bee mo funakaf fan aŋarimi di wulaal, Atijamit ájeetumoomi di wulaal bee di bukinab bajakaab—ákon di kúniinaak naate kanaamoor di wulaal nan áyiisena mati káyitoulak koola di kacetumi.” 23Ñaa di kusenumi urees ugaba, Esufa an kuwonkemi Barusaba, kasaafak koola koo eenomi Yusuto, di Matias. 24Di kulawumi, man kommi, “Akiiyaau, amanjumi sísigiras sati bukanak búrom, yíisoli buku kugabaak ai numukenumi 25man aŋar burokab ube bati áriiŋenaau ban Yúdas ábetenolimi man ajawumi. 26Di kukammi baluk bee mati bukoo, di bulomi di Matias. Oo kubenenumi di kúriiŋenaak uñeney di ákonau.

will be added

X\