2 TIMOTI 4

1Ínje iseni kájaatikenak uke di bújonlenab bati Atijamit di Yensa Apakenaau Áamakau, aatumi kagamen karoŋumi di kacetumi nampi alaañumi inki bee erung nan áyi. 2Ríiŋen furimaf fati Atijamit, di elat yém di ejuk mati núriiŋenriiŋen fo di nanan nan ceeŋumi mba nan ceeŋutumi di ekaaney mo. Noote káyiisen wan kukammi wajakut ban numakiil mati majakutiil. Bare noote káliŋeniil poop nan man uliikitenemi di kamuutenak máamak. 3Nanan pánniriiŋ nan bukan kootutumi káyentenak kaliikiten kalegen. Bare pankuriiben emaŋey yooliil, ban pankuñes kuliikitena kufaŋ man kujuupoe kaatumi bee kaliikiteniilak wan kumaŋumi ejamey. 4Pankukat bálamuk malegenam man kulanjo ban di kujuumen úyegetiil di ureg wati kayayapoorak. 5Bare mati au, noote kasofooro, ban numuuten di bugaal banoosani, ríiŋen furimaf fajakaaf, ban núliren buroki. 6Mati ínje, nanan númboom nírindiiŋ nati ekaanom búsimen, mati ecetey yúmboom érindiiŋ eban. 7Nititiik futiik falegen, nibamban jíteyaj, ban nirulen di kafiumak kúmboom. 8Iñeme kawulak kati kafannoorak kooku bo kakoberom kan eenomi fúbuur fáwaanie fati majoonam fan Akiiyaau, agamenaau ajoonaau, agalo’ommi di funakaf fáamakaf fati élaañuley yoola. Kawulak uke lee bee di ínje ceb, bare poop bee di kakoboomi élaañuley yoola ñátum di kamaŋak kooliil. 9Kaan túu iñeme man ubil galab bee di ínje. 10Demas, narookorooko dúniyaay, man akatom bálamuk man ajawumi bee Tesalonika, Keresens najawumi bee Galatia ban Tiito oo najawumi bee Dalumatia. 11Luuk cebool aam di ínje. Ŋárul Maruk man újeetumulool bee di ínje, mati oo panaŋoolen arambenom jak di burokab. 12Nibomboñ Tukiko bee Efes. 13Nampi ulakomi ebiley, mbi úŋarulom kaloaom káamakak kan ikatulomi di kañenak kati Karupo di ésukey yati Turaad di poop síbukaas, bare takum újimul múciikumaam muceenam mati kabaŋ. 14Alesandar afaañaau narieenanri máamak ñajuupoe. Emitey ekaan Atijamit acaamool wan akammi búrom. 15Au di fúkoi káanumool, mati nalatelat yém wan uregumi. 16Di bagamab bútiyaarab, bajut hani an alaañe di ínje ijuumoore di fúko’om. Anoosani nakatankat bálamuk. Emitey ekaan Atijamit takum asofiil di waaf. 17Bare Akiiyaau najuumanjuum ban náliŋenom, man íriiŋen furimaf fajakaaf bee di Kakaanutumi Kúyahuud búromiil man kujam. Ñaa napakenammi di butumab bati jimukoorey. 18Akiiyaau panapakenom di wajakut wanoosani búrom aban nájeetumom jak bee di jáyiaj joola jammi di bukinab bajakaab. Mbi bukanak kusalool bee bándoorey. Amen. 19Usaafom Pirisika di Akula, di bajamab bati Onesifor. 20Erasutos arinoulomi Korint, ban ínje nikatulokat Turofim di ésukey yati Mileto man áju’uteene. 21Kaan túu man úriiŋul baabe bala’a nanan nati ñonkañ. Ebulus di Pudes, Lino, Kuladia di kuriiba bukaaku búrom poop kúsaafulisaaf. 22Emitey ekaan Atijamit acin di búyegeti. Emitey ekaan Atijamit asenuul majakam moola.

will be added

X\