2 TIMOTI 3

1Au oote emanj poop mo’ome, Timoti, mati di kunakak kúlamukaak kábileuul pambaj mátaañie máamak. 2Mati bukanak pankumaŋ kúkoiil ceb di sígodi’iil. Di kukaan ká’aamakalenoor di kupooñumi, di kusanken ñíi mati Atijamit, di leekukob kuwolaiil. Leekusal karambeneiimi ban leekumanj Atijamit, 3leekumaŋ bukan, leekubonketoor, di kukaan kusuulena bukan ban leekubaj kasofooro. Pankukaan bukan kákoolenie ban di kulat wanoosani wajake. 4Pankukoolen kupaaliil, di ekaaney wañuloutumi, di ká’aamakalenoor. Pankumaŋ wásummi bee di kúkoiil ceb wuuj Atijamit. 5Pankukaanalenoor nan buruŋab boololaal koom, bare pankuñoos kánkumak kalegenak koolibo. Jitey bukanak kaanomi mo’omu. 6Bukaaku di bukan kukila pankubuuto kunoken di ujam uceen búrom ban di kooken kuseek kuceen kágotete, kuseek karookoe di majakut ban di kumaŋ wanoosani wásuume di kúkoiil. 7Kuseekak kaanomi mo’omu kooku di kariiben kaliikitenak kunkulak nanoosani, bare kúlauleriit malegenam. 8Nan man Yannes di Yambures kulatumi Muusa eeno, moo poop bukanak buku kulatumi malegenam, bukan kan úyegetiil ulaene tir, ban kafiumak kooliil kulegenout. 9Bare léekuloi máamak, mati mafuuraam mooliil pammujuki tíen di fáculey yati bukanak búrom, nan man bajoeenumi bee di kúniinaak bukaaku kugabaak. 10Bare au nuriibenriiben kaliikitenak kúmboom, baroŋerab búmboom, di wan isofumi mati eroŋey, kafiumak kúmboom, kamuutenak kúmboom, kamaŋak kúmboom, ban wan iŋoolenumi imuuten noo, 11di kásuutukenomak, di bugaalab búmboom. Numammanj tíen uru búrom wabajammi Antiok, di Ikoni, di Lusutura bare Akiiyaau napakenammi di woo búrom. 12Di malegenam, anoosani amaŋumi esen eroŋey yoola di Apakenaau Áamakau Yensa nan ariibaool, pánasuutukeni. 13Bare bukan kajakut di kubunta pankurulen di ekaan man újakaatie. Pankufaŋ man kújakaatie noo, ban kubuntaak di kubuntooro. 14Bare mati au, urulen di esofey di wan iliikitenimi ban nufium ríiŋ. Numammanj bukei eenomi kuliikenai. 15Ban nuwoolo mati kápurumul di fañiilaeti, au numammanj furimaf fálirooraaf fati Atijamit, fakaanimi man ubaj malinlaam marungenimi bee di epakey kápurum di kafiumak di Apakenaau Áamakau Yensa. 16Atijamit akaane Furimaf foola búrom man furoŋ ñátum di Búyegetab boola. Furimaf búrom fubabaj fúkaw bee kaliikiten malegenam, bee kamandoor kafiummi wajoonutumi, káyiisen wajakut, ban bee kájaatiken bukan man kuroŋ joon, 17manteer anau ati Atijamit mbi aŋoolen akaan burok banoosani bajake.

will be added

X\