1 Mati au, añoolom, mbi úliŋ ñátum di majakam man Atijamit asenimi di Apakenaau Áamakau Yensa. 2 Nujanjam wan iliikitenimi di fáculey yati bukan kajuupoe kamaatumi. Liikiten malegenam ume bee di bukan kufiumaay kaate kaŋoolen kuliikitenumo bukaaku poop. 3 Naamoor bugaalab di ínje, nan atiika alegen ati Yensa Apakenaau Áamakau. 4 Atiika ammi di burokool letakaten man arok burok buceen bati téeŋey, mati namammaŋ man akaan arungaool yeool. 5 Ampi alakomi kafannoor di jíteyaj letaŋoolen awuuj leejaat nasosof sílingaas búrom sati jo. 6 Awañaau arokumi máamak aate etooŋ eyab bucaab bati muriaay. 7 Woonoor mati wan isankenumi. Akiiyaau panarambeni man úlaul wo tíen. 8 Woolo Yensa Apakenaau Áamakau, áyitenulimi di kacetumi, búwolum bati Dauda. Ure eenomi furimaf fajakaaf fan íriiŋenumi. 9 Mati káriiŋenak kati furimaf fajakaaf ufe, ínje oomu di bugaalab ban hani kukokenankoken nan álaputa. Bare furimaf fati Atijamit, an letaŋoolen akokenufo. 10 Mati mo’omu ínje neem di kamuuten wanoosani mati bukanak kan Atijamit amukenumi, man Atijamit apakeniil kápurumul di Apakenaau Áamakau Yensa, ban pankulako di Atijamit bee bándoorey, mbi aseniil kálebienak di mákalaam moola. 11 Furimaf ufe fúrindiiŋ kafium. Ucetaajaat síñakon di oo, wulaal poop panuyitoaal síñakon di oo. 12 Urulenaajaat di kamuutenak, wulaal poop panurungaal di oo, uñoosaaloojaat, oo poop panañoosolaal. 13 Ukaanutaajaat bukan kufiumaay, oo panarulen ekaan afiumaay. mati oo letaŋoolen añoosooro. 14 Mbi urulen kawooleniil mati mo’omu. Jáatikeniil di bújonlenab bati Akiiyaau takum kuñoosoor mati kurim. Mo’omu moo jakut, mati pammukajen káyentenemi. 15 Kaan túu man úyiisen fúkoi di bújolenab bati Atijamit, nan aroka alegen apuñoutumi mati burokool ban naliikitenemi joon mati furimaf fati malegenam. 16 Tey kasanken kútiikaar, mati koo pankurungen bukanak kufaŋ man kukatoore buruŋab bati Atijamit. 17 Kaliikitenak kaanomi nan mo’omu kukankaan nan musonta máliipe. Kúniinaak kugabaak kaliikitenumi mukaanaam maanomi mo’omu koo eenomi Hemene di Filet. 18 Koo kulanjomi di malegenam, man koone Atijamit káyitenulak koola bukanak di kacetumi kuwuwuuj kuban, ban di kukajenumi káyinenak kati bukaaku. 19 Bare malegenam mati Atijamit mukankaan nan fúlakenuma fáliŋe, mujunjuum líŋ, di foo kurimak uke kuciikimi: “Akiiyaau namammanj kakammi koola,” ban, “Anoosani aregumi oo an ati Akiiyaau aate ekat majakutool.” 20 Di síndeneey yati eluup yáamak babaj dó sibool lee sati sáni mba sati gódifori ceb bare poop sati ukunaŋ mba sati bukap. Di soo saasu síriuma, saasu síbetenuma majakut. 21 Ampi akaanooro átien kápurumul di bújakaataab ube, oo panakaan nan saasu sati wáaning, Atijamit pananenool bee di waaf búto. Mati eroŋey yoola esenisen ebabaj fúkaw bee di arungaool, kajonjoor bee ekaan burok bajake banoosani. 22 Tey emaŋey yajakutey yati kúpura, bare mbi umaŋ usof líŋ di ekaaney majoonam, kafium, kamaŋ, di kásuumaay. Au oote ekaan uru di kamiiceelaetemi Akiiyaau ñátum di úyeget wákon. 23 Bare tey kañoosoorak kañuloutumi di kabajutumi fúkaw, mati jimammanj mo’omu moo múŋareuumi mulobaam ceb. 24 Au arokaau ati Atijamit aatut ekaan an ati muloba, bare aate ekaan jak bee di anooani. Au oote ekaan aliikitena ajake ban numuuten, 25 ban nawalenooro joc nampi alakomi kaliikitenak kañoosemi malegenam. Atijamit pánaruŋul úyegetiil man kútiiwoor kukat majakutiil man kubil kumanj malegenam. 26 Timaa mbi kubil ganloiil ban di kuŋoolen kupak di kañenak kati Seetaanaay, yasofiimi mbi kukaan kamaŋak kooliyo.
