2 TIMOTI 1

1Ínje Paul, áriiŋena ati Apakenaau Áamakau Yensa ñátum di kamaŋak kati Atijamit, aboñimi man íriiŋen mati eroŋey yan áligumi kápurumul di kafiumak di Apakenaau Áamakau Yensa, eem di eciik letaraay uye. 2Eciikiciik bee di Timoti, au nukankaan nan añiilau ati búsusom: Emitey ekaan Atijamit Ampaau di Apakenaau Áamakau Yensa Akiiyaolaal kúyiiseni majakam mooliil, di kubaj di au kabonketak kooliil, di kuseni kásuumaayak kooliil. 3Ínje nisasal Atijamit, an eem di kamiiceelaet di búyeget bátiene, nan man kufannaaniŋom kukaanemi eeno. Fuk di balay, nisaloosal mati nan man iwooloimi nanoosani di kúlawak kúmboom. 4Nan man iwooloimi man mukuli musotumi, niraanoiraano máamak fuk di balay. Kammojaat mbi súumom máamak. 5Ínje poop niwoolowoolo mati kafiumak kooli kalegenak kan ubajumi, kafiumak ko’oku kaanomi nan kati iñaayi afaan Loidi di iñaayi Yunike kubajumi. Tíenantien au poop nubabajuko. 6Moo kaane ínje kawooleni man uroŋ di esof jak kawulak kan Atijamit asenimi nan irembenumi uñenom di au. 7Mati Búyegetab Bátienaab ban Atijamit asenolaami bukaanutolaal man úkoofiaal. Bare bumeeŋolaameeŋ di kánkum, di kamaŋ, di kasofooro. 8Takum upuño, eregey yati káyiisenak kooli bee di bukaaku mati Akiiyaolaal. Takum upuño mati ínje poop, handeneen ínje oomu dán bukanak kukuleimi mati Apakenaau Áamakau. Bare di kánkumak kan Atijamit asenimi, unaamoor di ínje di bugaalab bee mati káriiŋenak kati furimaf fajakaaf. 9Atijamit apakenolaami ban nawonkolaami man ukaanaal bukanool, lee mati wan ukaanaalemi, bare mati wan asofumi di majakam moola. Bala’a dúniyaay etuuki nasosof man áyiisolaal majakam mukila kápurumi di Apakenaau Áamakau Yensa. 10Bare ñaa iñeme narajulolaami kápurumul di ebiley yati Apakenolaal, Apakenaau Áamakau Yensa. Akila nakajenumi kánkumak kati ecetey ban kápurumul di furimaf fajakaaf aŋarulomi eroŋey yati bándoorey. 11Ban Atijamit namukenammi nan áriiŋena di aliikitena man íriiŋen furimaf fajakaaf. 12Moo kaane ínje neem di egaal. Bare ínje ipuñouturer, mati nimammanj an ifiummi, ban tíenantien mati naŋooleŋŋoolen apooyom wan abilenammi bee nampi funak fukila fúriiŋumi. 13Sof lit kurimak kalegenak kan iliikitenimi. Ban oote karulen di kafiumak di kamaŋak kan ubajumi di Apakenaau Áamakau Yensa. 14Jisof lit malegenam ume man Atijamit abilenimi ñátum di karambenak kati Búyegetab Bátienaab bammi di au. 15Nan man umanjumi eeno, kuriibaak búrom kápurumulomi Asia kukatankat bálamuk, hani Fugel di Herumogen koo di búkoro. 16Emitey ekaan Atijamit áyiisen kabonketak bee di fiilaf fati Onesifor, mati ñameeŋe náliŋeneanliŋen, apuñoutom mati bakuleromab. 17Nan áriiŋulomi Róoma, natooŋumi añesom biyok ajukom. 18Emitey ekaan Akiiyaau áyiisool kabonketak koola di Funakaf fukila. Numammanj tíen man arambenammi búrom di ésukey yati Efes.

will be added

X\