2 TESALONIKA 3

1Di múlamukaam, kútioli, mbi jilaw bee mati wúli, mambi kurimak kati Atijamit kurulen di efet galab man kuyabi di kálebien, nan man kuyabimi di muyuul. 2Jilaw, poop, mbi wúli upakeni di kañenak kati bukanak kájakaatimi di kálaputumi, mati kaanut anoosani abaje kafium. 3Bare Akiiyaau afiumaay, pánaliŋenuul ban napooyuul di kañenak kati Seetaanaay. 4Wúli nubabaj fúgolum di Akiiyaau mati muyuul, ban tíenolitien mati muyuul jooju bo kariiben ban panjikaan wan uliikitenuumi. 5Emitey ekaan Akiiyaau ájaatiken úyegetuul bee mati kamaŋak kati Atijamit di kamuutenak kápurumulomi di Akiiyaau Yensa. 6Kútioli, wúli bukooku di kájaatikenuul, di kareesak kati Akiiyaolaal Yensa Apakenaau Áamakau, mati jitey átioli ariiba anoosani ayuunooremi amaŋut burokab ban nalatumi kariiben kájaatikenak kanoosani kan usenoomi. 7Mati muyuul di kúkouul jimammanj mati buu joote ekaan wan wúli ukammi. Nan wúli ulakomi di muyuul ukaanderut bukan kuyuunooraak kamaŋut burokab. 8Wúli nulalat eyabey sinaaŋ sati an basenutool waaf. Ban nurokerok fuk di balay ujeen tac man uri takumbi ugaalen hani an di muyuul. 9Nukankaan mo’omu, kaanut mati ubajut bakooŋ bukila man uceeŋ man kusen waaf wati karamben, bare mbi kaanuul káyiisen kan joote kariiben. 10Mati hani nan ulakoeenumi di muyuul, nusenuusen kájaatiken uke, ampi amaŋutumi burok takum ari. 11Mati nujanjam mati bukaaku di muyuul kuyuunooraak kamaŋutumi burok, kayalenak kasankenak kati bukanak mba mameesam. 12Di kareesak kati Yensa Apakenaau Áamakau, wúli kooku di kájaatiken ban di elaw bukanak buke mbi kuroŋ joon ban di kurok man kubaj wan kootumi éroŋumey. 13Kútioli, muyuul jootut egaal di ekaaney jak. 14Ampi alatumi ekob wan uregumi di letaraay uye. Mbi jíkaanumool ban jimoosool mambi apuño. 15Takum jisof akila nan alatooruul, bare mbi jigamenool nan apaaluul ariiba. 16Emitey ekaan Akiiyaau ati kásuumaay oo di fuko’ool aseneuumi kásuumaay nanoosani di banoosani. Emitey ekaan Akiiyaau áami di muyuul. 17Ínje Paul eem di eciik kasaafak ñátum di kañenak kúmboom bee di muyuul. Mo’omu eenomi fúmanjum fan ikaanemi letaraay yúmboom yanoosani. Mo’ome moo níbanumeyomi eeno. 18Emitey ekaan majakam mati Akiiyaolaal Yensa Apakenaau Áamakau móomi di muyuul.

will be added

X\