2 TESALONIKA 2

1Iñeme mati élaañuley yati Akiiyaolaal Yensa Apakenaau Áamakau di man aatumi kajojenolaalak bee di fúko’ool man úkambooraal. Ñaa kútioli nilawuulaw, 2takum jiwaaken kayennoor di úyegetuul galab mba di sayuul mati bukaaku koone funakaf fati Akiiyaau súm fúriiŋuloriiŋ. Timaa kusosof mati wúli nurereg uru nan ulakomi kamanjenak, mba káriiŋen furimaf, mba nuciciik mati mo’omu di letara. 3Takum jimaŋ man an abuntuul di manoosani. Mati funakaf fukila leefubil bee nampi katiikenoorak kubajomi titoorolaal di Atijamit, ban ájakaatiaau pánarajuli, ajuumenimi man akajeni jákaati di sambunas sáceteriitumi. 4Panatebenooro ban nañoos wanoosani wawonkeimi emit mba wamiiceelaeteimi manteer aŋar ejunkutey yati Atijamit di fukobaf fáñiiaaf, mambi areg akila eenomi Atijamit. 5Mante jiwoolout mati niregeenuureg mo’omu nan ilakoeenumi di muyuul? 6Jimammanj wasofumomi ájakaatiaau umu bálamuk bee nampi funakaf fan aatumi ebiley fúriiŋumi. 7Mati kánkumak kayofoaak kati ájakaatiaau kooku bo karoke, bare aceen oomu man asofeko. Ájakaatiaau létarajul bee nampi an akila ápurenimi di buruŋab. 8Moo ñaa ájakaatiaau pánarajul, bare nampi Akiiyaau Yensa alaañulomi panabujool ñátum di fuyiifaf foola. Ban panakajeni jaj ñátum di mákalaam mati érajuley yoola. 9Élaañuley yati ájakaatiaau yoo ekankaan burokab bati Seetaanaay. Ban panekaanalenoor man ekaan mukaanaam búrom máriiŋumi síwoonoor di wajamurerutimi. 10Panakaan wanoosani wati kabunt kájakaatie mambi abunt kammi di buruŋab booliil bati kakañoak mati kulalat kafiumak malegenam maatumi bee kapakeniilak. 11Moo kaane Atijamit pánaboñuliil kabunt káamak, mambi kúyinen di kagaajoorak kanoosaniak. 12Koo búrom pánkufireni mati kufanfaŋ man kukaane májakaatie di kafiumak kati malegenam. 13Bare wulaal ootaale esal Atijamit nanoosani mati muyuul, bare kútioli muyuul kan Akiiyaau amaŋumi. Mati Atijamit amukenuumi káŋarum di fúcitumaf mambi jikaan kaate etooŋ kupak. Búyegetab Bátienaab boola bukaanuumi man jíliroor tíen, ban di jikammi kafiumak kooluul di malegenam. 14Atijamit náwonkuluumi bee di epakey nan úriiŋenuumi furimaf fajakaaf. Iñeme muyuul jinaamoor di mawuŋam mati Akiiyaolaal Yensa Apakenaau Áamakau. 15Kútioli, moo kaane jijuum líŋ ban di jiriiben ríiŋ di wan uliikitenuumi ñátum di kurim kati bukan mba di siletara. 16Emitey ekaan Akiiyaolaal Yensa Apakenaau Áamakau di fúko’ool, ban Atijamit Ampaolaal, amaŋolaami ban kápurumul di majakam moola nasenolaal eñab úsusolaal yati bándoorey di fúgolum falegen. 17Panañab úsusuul ban narambenuul nanoosani man jikaan majake ban di jireg wajake.

will be added

X\