2 TESALONIKA 1

1Ínje Paul eem di eciik letaraay uye banaamoorerab di Sila, di Timoti. Eciikiciik bee di kati fujojaf fati Tesalonika kammi di Atijamit Ampaolaal di Akiiyaolaal Yensa Apakenaau Áamakau. 2Emitey ekaan Atijamit Ampaau di Yensa Apakenaau Áamakau kuwuluul majakam di kásuumaay. 3Kútioli, wúli cenceeŋ man usal Atijamit nanoosani mati muyuul. Jajak man oote ekaan mo’omu, mati kafiumak kooluul kooku bo kabenenoe máamak ban kamaŋoorak kan jibajumi bee di bukaaku kooku bo kabeneno. 4Moo kaane wúli di kúko’oli nutebenteben síleekoli mati muyuul di kujojak kati Atijamit. Mati man jirulenumi di kamuuten di kafium di kásuutukenak kanoosani di bugaalab ban jommi di bo. 5Bare mo’omu búrom múyiisenuuyiisen mati kagamenak kati Atijamit kujonjoon. Mati panakaanuul bukan kabaje fúkaw mati Jáyiaj joola, mati moo jommi di égaalumey. 6Atijamit panakaan wajoone, pánajeetumuul bugaalab bee di bukanak kakaanumi man jigaal, 7ban nasenuul kayoolo muyuul kammi di bugaalab. Pankammo, nampi Akiiyaolaal Yensa arajulomi di bukinab bajakaab di simaleekaool sati kánkum, di bújeek bati sambun. 8Akiiyaool Yensa panatek kamanjutumi Atijamit di kalatumi furimaf fajakaaf fati Akiiyaolaal Yensa. 9Atijamit panatekiil kútek kati bándoorey, ban nápajuliil di bújonlenab bati Akiiyaau di poop mákalaam moola máriiŋumi síwoonoor, 10nampi ajawulomi di funak fukila, bukanool búrom mbi kusalool anoosani afiumoomi mbi álebienool. Muyuul poop panjinaamoor di kukila dó, mati jifiunfium wan úyiisenuumi. 11Moo kaane nulawelaw bee mati muyuul. Emitey ekaan Atijamit mbi akaanuul man jibaj eroŋey elegeney yaj yan awonkuumi beet. Emitey ekaan Atijamit mbi áliren ñátum di kánkumak koola kamaŋak kooluul kati ekaaney wajake di burokab booluul bati kafiumak. 12Emitey ekaan kareesak kati Akiiyaolaal Yensa mbi kúlebieni di muyuul, muyuul poop mbi jílebieni di oo kápurumul di majakam mati Atijamit oololaal di Akiiyaau Yensa Apakenaau Áamakau.

will be added

X\