2 PETER 3

1Kúpaalumom, uye panekaan letaraay egabunteney yan íciikuluumi. Di so’osu sigabaas níliŋenuul man jíyil úyegetiil di kawoonoor kátiene. Ínje imaŋut man jíjim ure. 2Muyuul joote kawoolo di kálaul wan kuboñaak kálirooraak kuregeenumi di wan Akiiyaolaal Apakenaolaal ájaatikenumi kápurumul di kúriiŋenauul. 3Di mútiyaaram, joote kálaul mo’ome, mati di kunakak kúlamukaak bukan kuceen kufiila pankuraj kan umanje pankuriiben emaŋey yajakutey yooliil, 4di aaney, “Báligab boola boobei bati élaañuley yoola? Kufannaaniŋolaal kucecet, bare mukaanaam búrom pammurulen nan man mulakomi noo di fúcitumaf.” 5Kuwowot man kuñoos ure, Atijamit natuukumi fatiya kápurumul di furimaf foola, ban nápurenulomi yentaam di mumelam ban naŋomenuyomi ñátum mumel. 6Ban ñátum di mumelam máamakam ume, dúniyaay étiyaarey ekajenikajen. 7Atijamit poop ñátum di kájaatikenak kákonak tentaam di fatiya yati iñeme pansikajeni di sambunas di funakaf fati kagamenak, nan kamanjutumi Atijamit koote kagameni ban di kukajeni. 8Bare takum jíjim wákonaw uwe, kúpaalumom! Funak fákon di Akiiyaau simit wíli, simit wíli di Akiiyaau funak fákon. 9Akiiyaau álaamout di kálirenak wan áligumi mati élaañuley yoola, nan man kuceen kusofumi eeno. Bare namuutemmuuten di muyuul mati amaŋut hani ákon mbi akaño, bare namammaŋ anoosani aate kátiiwoor akat bálamuk majakutam. 10Bare funakaf fati Akiiyaolaal pánfuriiŋul nan ákuu. Ban funak fukila fatiyaay pánejim nel di kayel káamak, wánkum uceen di yo ureŋeni di sambun, ban tentaamey di wanoosani wándomi panurajeni di kagamenak. 11Wanoosani búrom ureemeni nan mo’omu. Kama muyuul buu joote ekaan man jirok di jílebien Atijamit di eroŋey yooluul. 12Joote ekob máamak funakaf fati Atijamit ban jikaan man fúriiŋ galab. Funakaf fukila fatiyaay panfukaño ñátum di sambun, ban wanoosani wándomi búrom panureŋeni di bújeekab bati sambunas. 13Bare bukooku di ekobey wan áligumi fatiya yunkul di tentaam yunkul, boo anoosani panajoonumi di Atijamit. 14Moo kaane, kúpaalumom, nan jilakomi di ekobey mati mo’ome, mbi jibaj fuuñ fati emaŋ mbi araŋenuul mbi átookuluul man jítiene babajut kabet, ban jilako di kásuumaay. 15Jiwoolo mati kamuutenak kati Atijamit oololaal koo eenomi epakey yoololaal. Ñaa nan man Paul atiolaal an umaŋaami áciikuluumi poop riiboor di malinlaam man Atijamit asenoomi. 16Paul násankenuluumi ure di siletaraas soola búrom. Babaj uceen wándomi wásuumut kálaul. Bukaaku kámanjaatimi di kabajutumi fujuum koo kukajenooromi ñátum di káruŋulak wan asankenumi. Di kukaan moo mákonam ñátum di kapan kaaku kati furimaf fati Atijamit. 17Kúpaalumom, muyuul súm jimammanj mo’omu. Kama ñaa jíkaanum, takumbi jimaŋ man kúlaputaak káruŋulemi wan asankenumi kuñakuul man jilo. 18Bare jibaak di majakam di fumanjaf fati Akiiyaolaal di Apakenaolaal Yensa Apakenaau Áamakau. Jisal Yensa kabiñoo iñeme bee bándoorey. Amen.

will be added

X\