2 PETER 2

1Kuboñaak kubuntaak poop kurajuloraj di bukanak, di mákonam kuliikitenaak kubuntaak pánkurajul di muyuul. Buku kaatumi bee éŋaruluul ñátum di kutunt kaliikitenak kati kabuntak kaatumi bee kakajenak mati Atijamit. Ban di kuñoos Arungaau apakeniimi di bacaam báamak, ñaa moo di kújeetumooro kakañoak kawaakenumi bee di kúkoiil. 2Hani moo, kajuupoe pankunoken kayenet, ban mati wan kukaanemi, bukaaku ereg kagaajoor mati buruŋab balegenab. 3Ban di máfeketam mooliil kuliikitenaak uke pankureguul kurim kati kayayapoorak bee ebaj waaf di muyuul. Bare Atijamit nagameneengamen no’ona, kakañoak kooliil kooku bo kábileul. 4Mati Atijamit abonketut hani simaleeka sakammi majakut, nasenumi buruŋ man sileebi di busun babajut tan búkabe, boo sikokenimi man silakomi di érimey bee nampi funakaf fati kagamenak fúriiŋumi. 5Atijamit abonketut poop bukanak kati naaniŋ kamanjutoomi, ban naŋarulomi mumelam máamakam bee di kukila. Bare napakenumi Nuha ceb áriiŋumi mati majoonam, oo di bukanak kuceenak kooni futok di kugaba. 6Atijamit aŋarulomi akajen sísukas sáamakas sati Sodom di Gomora sikankaan kábump ban náfirenuso ban nájimenuso. Ban akaaniimi káyiisen bee di kamanjutumi Atijamit. 7Bare nanan nákonan, Atijamit napakenumi Luut ániine ajoone, agaalumi máamak mati kanokenumi kayenetak di kájakaatimi búrom kambomi. 8(mati ániinaau akila ajoonaau alakoemi titooriil, funakoofunak nagaalegaal máamak nan man ajukemi di man ajamemi búlaputab booliil), 9ñaa Akiiyaolaal namammanj man apakenemi kajoonumi di bugaalab, di poop man asofemi kajoonutumi di kútekak bee mo funakaf fati kagamenak. 10Oo nafaŋ man átaañie bee di kariibenumi emaŋey yooliil yajakutey yasikomi ban di kuheelenumi kati kujuumak. Bukanak kukila kúaamakalenoor ban di kupooñ, kúkoliut bee ejel wahaw wáliroorumi wati bukinab bajakaab. 11Handeneen simaleeka safaŋumi man sibaje kákalaa di kánkum di kuliikitenaak kubuntaak, leesitaakenderiil ñátum di ujel di bújolenab bati Akiiyaau. 12Bare buke kukaanekaan nan sínukuruŋ sati karamba sabajutumi úyeget, saje’emi nan man síwoonoorumi eeno, sawolimi man sisofi ban di sibuji. Kujelejel wanoosani wan kúlaulutumi. Pankukajeni nan sínukuruŋ sati karamba. 13Pankucaami di wajakutaw wan kukammi. Ekaaney búlaput di kajuum balaraay yoo kusofumi kásuumaak kooliil. Nan kulakoemi furi tákon di muyuul kukankaan nan mamoke titooruul, hani moo kurulen di ekaaney jabuntaj jooliil. 14Wan kuwoonooremi búrom basang di aseek mba ániine ati an, búlaputab booliil bubajut tan bureulo. Kubuntebunt káliŋutumi galab, ban máfeketam mumemmeeŋ di úyegetiil. Bare kujonlenumi bunumab bati Atijamit! 15Kukatenkaten buruŋab bajoonaab man kújimmi di baŋondaab. Kuriibooriiboor di Balaam, Beor añoolool, nan man átaagulumi eeno, amaŋumi máamak ebajey sígodaas ñátum di ekaaney búlaputab. 16Bare Balaam namandoorimi mati majakutool. Hani erohaool di esankenoomi nan an ban di éfirenoomi takum aboñaau akaan kagonoak koola. 17Buke kakammi nan síbula sayonde mba kákumba kan fárusaf funagemi baabaaba. Atijamit najuumenjuumen tan tárimen túk bee mati kukila. 18Mati man kusankenumi kasankenak kati ká’aamakalenoor di mafuuraam, ban kuñakiil ñátum di kayenetak kooliil nan ékab man kúsoful katooŋumi epakey di kakammi di eroŋey ejakutey. 19Di kúligiil epakey, bare tooke kukila di kúkoiil kumiiceel kati kasikoak. Mati an amiiceel ati wanoosani waŋoolenoomi. 20Bukanak kupakujaat di masikoam mati dúniyaay ñátum di fumanjaf fooliil mati Akiiyaolaal di Apakenaolaal Yensa Apakenaau Áamakau. Bare di kulaañumi kulo ró di masikoam, bukanak kukila iñeme kufaŋumi man kukaane masiko wuuj mutooŋandam. 21Panfaŋ man jake bee di kukila kaaneenjaat kumanjuturer buruŋab bati majoonam man kuroŋ di emanjiiley bo ban di kukat bálamuk kájaatikenak kálirooraak kabilenumi bee di bukoo. 22Di kaaniimi kúregak uke malegen, “Eyen elac eban di ebooko eri wan elacumi,” ban “Ekumba eposimi eban di elaañ ejaw efinto di bukapab.”

will be added

X\