2 PETER 1

1Ínje Simon Peter, aroka ban áriiŋena ati Yensa Apakenaau Áamakau, eem di eciik letaraay uye. Eciikiciik bee di kan unaamoorumi kafiumak kákonak kabajumi fúkaw kápurumul di majoonam mati Atijamit oololaal di Yensa Apakenaau Áamakau. 2Emitey ekaan Atijamit asenuul majakam di kásuumaay kufaŋ man kubenenoe bee di muyuul mati jibilumi jimanj mati Atijamit di Yensa Akiiyaolaal. 3Atijamit kápurumul di kánkumak koola nasenolaami búrom wan ceeŋumi man uroŋaal nan man buruŋab balegenab boololaal buceeŋumi man uroŋaal eeno. Ñátum di emanjey yoololaal nawonkolaami bee kanaamoor di mákalaam moola di majakam moola. 4Di mo’ome, nasenolaami báligab boola báamakab babajumi fúkaw, kápurumul di bo mambi jipak di emaŋey yajakutey yakajenemi yammi di dúniyaay uye, ban mambi jibil jinaamoor di búyesoorab boola. 5Mati mo’ome, jikaan túu man jibenen majakam bee di kafiumak kooluul, jibenen fumanjaf bee di majakam mooluul. 6Jibenen kasofooroak bee di fumanjaf fooluul, jibenen kamuutenak bee di kasofooroak, jibenen ekaaney wan Atijamit amaŋuumi bee di kamuutenak kooluul. 7Jibenen kamaŋoorak di kutiuul kuriiba bee di ekaaney wan Atijamit amaŋumi eeno. 8Ubajujaat kawulak uku búrom ban nurokenuko, panjibaak di éliŋ di fumanjaf mati Akiiyaolaal Yensa Apakenaau Áamakau. 9Bare ampi abajutumi kawulak uku oo áŋooleneriit ajuk lói mba ájukeriit, ban nájinjim mati majakutool mati noo mubonketibonket. 10Kutiom, moo kaane, jifaŋ man jibaje fuuñ fati emaŋ man tíenuul mati kawonkak kooluul di kamukenak kooluul, jikammojaat leejilorer. 11Di mo’omu panjibaj kawalen kajake di kanokenak kati jáyiaj jíbaneriitumi jati Akiiyaolaal di Yensa Apakenaau Áamakau. 12Moo kaane nisosof bee kawoolenuul uru nanoosani, handeneen jimammanj mo jiban ban poop di jifaŋ man jíliŋe di malegenam man jiyabumi. 13Nisosof mati panjak di muyuul man ninsi niwoolenuul ínje bacetoorut. 14Ínje nimammanj leepiyo panikat eniiley uye, nan man Akiiyaolaal Yensa Apakenaau Áamakau aregammi tíen. 15Moo kaane panikaan túu man tíen mati nampi icetumi panjiŋoolen jiwoolo uru búrom. 16Mati nan ulakomi kamanjenuulak mati kánkumak di éjawuley yati Akiiyaau Yensa Apakenaau Áamakau, ulakout kariiben ureg wati kayayapoorak. Bare wúli kúyiisenaak kati mákalaam moola. 17Nan Atijamit Ampaau asenoomi kálebienak di mawuŋam, furimaf fújawulomi bee di akila kápurumul Mawuŋam Máamakam, di aaney, “Ume eenomi Añoolom ati búsusom, di oo ínje súumansuum máamak.” 18Wúli di kúko’oli nujanjam furimaf ufe fápurumulomi di bukinab bajakaab, nan ulakoeenumi di akila di furembooraf fálirooraaf. 19Mati mo’omu, wúli nufanfaŋ man ubaje fúgolum di kurimak kan kuboñaak kúriiŋenumi. Pánjikooñaam jak wan kuciikumi, mati kurimak kooliil kukankaan nan éwuŋenuma yawuŋene di érimey, bee nampi funakaf fukila fúriiŋumi nampi yootey yati waradabaw erajulomi di sísigiras sooluul. 20Bare mútiyaaram, joote kálaul mo’ome an létalaul ban letaŋoolen áfasul hani kamajen kákon di furimaf fati Atijamit. 21Mati bajut kamanjenak kajawulo kápurumul di kamaŋak kati anau. Bare bukanak kan Búyegetab Bátienaab bookumi kusankensanken kurimak kápurumul di Atijamit.

will be added

X\