2 KORINT 9

1Ceeŋutom man íciikuul mati kawulak uke kan jiwoonoorumi bee eseney bukanak kati Atijamit kammi Yúdea. 2Mati nijujuk man jimaŋumi máamak eeno bee karamben, ban nitebenumi ubandom mati muyuul bee di kupaalolaal kuriibaak kati Makedonia. Nirereg mati muyuul kuriibaak kammi Akaia jijonjoorumi bee karamben kabiñoo sunken. Fuuñuul fati kamaŋ ewul fugorengoren kajuupoe di kukila bee etooŋ karambenak. 3Bare ínje oomu éboñuluul kutiolaal kuriibaak buke, manteer katebenolaal uband mati muyuul takumbi kukaan ñaañaaña di mukaanaam mo’ome. Bare, nan man eenumi, panjijonjoor di baleebab booluul nan man ireguumi. 4Manoosani, kaanjaat bukaaku kápurumulomi Makedonia koote ebil di ínje, biyok kujuk mati jijonjoorut di baleebab booluul nan man ínje ilobiimi eeno, pánkaanoli kapuñ, ban muyuul poop panjipuño. 5Moo kammi ínje nisosof mati cenceeŋ man ilaw máamak Tiito di kutiolaal kuriibaak buke man kulo fáculom, man kurambenuul jijonjoor kawulak kan jíligumi. Pankujonjoori nampi íriiŋubomi, takumbi kaan kawul kati kamingen bare mbi kaan kawul kati sísigiruul. 6Wakilumi fúkaaf woo eenomi uwe: awaña anoosani alukumi jayiinkun, panajal jayiinkun. Bare awañaau alukumi juup, panajal juup poop. 7Anoosani aate eleeb nan man búyegetool busofumi eeno, takum ríiŋaati di ésigirool mba takumbi kaan kamingen. Mati Atijamit namammaŋ awulemi di búyegetool báwambuloe. 8Ban Atijamit naŋooleŋŋoolen asenuul kawul kanoosani kajuupoe mambi jibaj yaj di wanoosani ban mambi jicookoori di wajuupoe bee mati burok bajake banoosani. 9Nan man ciikimi, “Asenemi juup di ésigirool bee di kalekumi, majoonam moola pammucin bee bándoorey.” 10Asenemi etuukal kuwañaak ban naseneiil mbúur bee mati furiaf fooliil. Oo poop panasenuul etuukal yan jiceeŋumi ban panaliilenuyo panjibaj muria majake kápurumul di wasenimi juup di sísigiruul. 11Panakaanuul man jibaj fubaj juup di wanoosani yaj biyok jifaŋ man jiŋoolene jiwul. Ñaa bukan kajuupoe pankusal Atijamit mati kawulak kooluul kan jiyabumi kápurumul di wúli. 12Mati burokab ube ban jikammi lee kawulak bee di bukanak kati Atijamit wan kuceeŋumi ceb, bare poop bukaanekaan man bukanak kusal máamak Atijamit. 13Muyuul jíyiisenyiisen kúkouul ñátum di burokab ube, pámbujeetum kálebienak di kasalak bee di Atijamit. Jifiummi furimaf fajakaaf mati Apakenaau Áamakau, ban jisosofufo ñátum di karambenoorak kápurumul di sísigiruul di bukanak kati Atijamit di anoosani. 14Iñeme bukooku di elawuul Atijamit, ban poop kuraanouuraano, mati majakam máriiŋaam mati Atijamit man áyiisenolimi kápurumul di muyuul. 15Kasalak kooku di Atijamit mati kawulak koola kan umanje letuŋoolen usankenaal.

will be added

X\