2 KORINT 6

1Wúli bukooku karokoor di Atijamit, wúli bukooku di elawuul kayabumi majakam mati Atijamit takum jikammo mée. 2Mati naane, “Nanan nan íriiŋumi nijamijam, ban nirambenimi di funakaf fati epakey” Yénten, iñeme eenomi nanan nikila nírindiiŋ. Iñeme eenomi funakaf fati epakey. 3Wúli umaŋut man an ajuk kabet di búrokoli, moo kammi nuliliik takum ukaan waate ebet an. 4Bare, di wanoosani wan ukammi, núyiisenooroyiisenooro mati wúli legen kuroka kati Atijamit. Wúli numuutemmuuten handeneen ulakomi di bugaal báamak, mátaañie, di búyiik. 5Wúli nutekitek, nukulimi dán bukanak kukuleimi, núbukomi di káguuloor. Nurorok máamak burok bawuuje kúko’oli di kámooriaati mba kacaaret. 6Bare núyiisenooroyiisenooro mati wúli legen kuroka kati Atijamit ñátum di úyeget wátiene di fumanj, kamuuten di ekaan jak. Ñátum di kánkumak kati Búyegetab Bátienaab di kamaŋ kalegen, 7di káriiŋen kalegenak, di kánkumak kati Atijamit. Wúli nubabaj majoonam nan mútiikumaoli di kañen kúrid bee mati katiiken di kañen kumay bee mati kapaken. 8Manteer wúli úlebieni mba úlebienuti, usaleni mba úsalenuti, nusankensanken malegenam handeneen bukanak kúsofolisof nan bukan kagaajooremi. 9Umanjout di bukaaku, bare di muyuul numanjomanjo tíen. Wúli bukan kakaayene ucet, bare hani bee iñeme nurondoŋ. Bukanak kútekolitek bare uceturerut, ubujireruti. 10Handeneen núboteniboteni, nulakoelako di kamaayoor. Wúli bukan nan bukan kaleke, bare nukankaan kajuupoe man kubaj fubaj. Wúli poop bukan nan kaakenut waaf, bare nookennooken wanoosani. 11Kúpaalumom, muyuul kati Korint! Wúli nusankensanken láulo ban sísigiroli síwambulowambulo bee di muyuul. 12Kaanut mati sísigiroli silee di muyuul, bare muyuul sísigiruul sileemi di wúli. 13Ínje neem di kasankenuul nan kuñoolom iñeme. Jíwambul úyegetuul bee di wúli. 14Jitey bukanak kan umanje káyinenutumi di Apakenaau Áamakau. Mati bukan kajoone di kajoonut, buu koote kapaalaay eeno? Érimey di mawuŋam buu soote kapaalaay eeno? 15Yensa Apakenaau Áamakau di Seetaanaay bapaalaay baano buu boote kalako titooriil? Mba áyinena di áyinenutumi, waa koote kapaalaay titooriil? 16Fukobaf fáñiiaaf fati Atijamit waa sipaalaay di sínaati? Mati wulaal eenomi fukobaf fáñiiaaf fati Atijamit aroŋaau nan man Atijamit ammi, “Ínje eete ecin di bukoo, ban nujawoor di bukoo tirooriil, Ínje eete ekaan Atijamit ooliil, ban bukoo koote ekaan bukanak kúmboom. 17Moo kammi jípur di bukoo, ban di jípajulooro di bukoo, Akiiyaau aregumi. Takum jigor waaf wasikoe, ban ínje eete kawalenuul jak. 18Ínje eete ekaan ampauul, ban muyuul joote ekaan kuñoolom kúniine di kunaare, Akiiyaau ati Kánkum moo naregumi eeno.

will be added

X\