2 KORINT 4

1Mati kápurumul káboteniak kati Atijamit, násenolimi burokab ube, wúli létupur to. 2Mati wúli nulalat mukaanaam mayofimi mati kapuñak káamak koolimo. Úbunteriit anoosani mba útiteriit furimaf fati Atijamit. Atijamit ceb namammanj mati wúli nuregereg malegenam ceb, man bukaaku mbi tíeniil mati kukila pankuŋoolen kúfiumoli. 3Bare handeneen furimaf fajakaaf foololaal fan úriiŋenumi, foo fuyofoiyofo bee di bukanak kaatumi kakañoak ceb. 4Seetaanaay, emitey yarungumi dúniyaay uye, érimenumi úyegetaw wati káyinenutumi. Takum kuŋoolen kujuk mawuŋam mati furimaf fajakaaf mati mákalaam mati Apakenaau Áamakau. 5Wúli ulet di káriiŋenuul mati kúko’oli. Bare núriiŋenriiŋen mati Yensa Apakenaau Áamakau nan Akiiyaau. Wan uregumi mati kúko’oli woo eenomi wúli kumiiceeluul mati wan Yensa akammi di wúli. 6Mati Atijamit oo ammi, “Mawuŋam muwuŋen di érimey,” Atijamit ákonau ákaanolimi mawuŋam moola man muwuŋen di sísigiroli, man áŋarulolimi man úlaul mati mawuŋam moola muwuŋenumi di buulab bati Yensa Apakenaau Áamakau. 7Bare wúli noonosoono nan múruum dán kawulak uke kuyofimi. Kánkumak kalegenak kúpurumulopurum di Atijamit lee di wúli. 8Numingenimingen di bugaal banoosani, bare unakasuti, umanjut waa noote ekaan, bare létupururer to. 9Wúli núsuutukenisuutuken, bare ájimutoli. Kútekolitek kubet máamak bare uceturerut. 10Banoosani nuje’e wúli nujuudoojuudoor di síniiloli ecetey yan Yensa acetumi, manteer eroŋey yan Yensa aroŋenumi mbi ejuki poop di síniiloli. 11Mati Yensa, wúli karoŋumi búrom nanoosani Atijamit ásenolimi bee mo di búyiikab bati ecetey kammojaat manteer eroŋey yati Yensa mbi ejuki di síniiloli. 12Mati mo’omu wúli nujuudoojuudoor di ecetey, bare páneŋaruluul eroŋey yati bándoorey. 13Furimaf fati Atijamit di fommi, “Ínje nifiunfium, ban moo kammi nisanken.” Wúli poop nufiunfium, ban moo kammi nusanken. 14Wúli numammanj mati Atijamit, ayitenumi Yensa Apakenaau Áamakau, oo poop pánayitenuloli di Yensa ban wúli di muyuul pánajeetumolaal bee di bújonlenool. 15Mo’omu búrom mukaanikaan bee mati muyuul. Ban nan man majakam mati Atijamit múriiŋumi bukan kufaŋ man kujuupoe, kama ñaa bukan kafaŋumi man kujuupoe kusal Atijamit. Ban mo’omu pammusen kálebien kufaŋ man kúkalaae bee di Atijamit. 16Létupururer to. Handeneen siniilas sóololi soosu di ecet jayiinkun jayiinkun. Bare úyegetoli woo man úliŋeni hani bee iñeme. 17Mati bugaalab bóololi bahiiliaab ban ubajeñaa kájeetumoli mawuŋam máamakam mati bándoorey, moo mufaŋe man múkalaae bugaalab ube. 18Moo kammi, wúli újikereriit, wan jícilaj jijukemi, bare wan jíjukeriitumi. Mati wan jícilaj jijukemi iñeme, woo bee ewuuj, bare wan jíjukeriitumi woo bee bándoorey.

will be added

X\