2 KORINT 13

1Nanan une eenomi kákamunom kúfeeginten, éjawuley yúmboom bee di muyuul. Furimaf fati Atijamit di fommi, “Anoosani ampi kútibumi di ekaan majakut, malegenam pambimujuumeni ñátum di emaatey yati bukan kugaba mba kúfeegiir.” 2Nigameneengamen kalakomi ekaaney majakut di poop bukaaku búrom nan oomueenumi di kákamunom kugabuntenak. Ínje níloiuuloi, bare iñeme panilaañ igameniil nan man ikaaneenumi. Nampi ilaañumi íriiŋubo nanan une, leejipak di kakurak. 3Mati jimammaŋ bee emanjey manteer legen ínje di fúredimpaf fati Apakenaau Áamakau nísankenumemi. Nampi akuruumi panjijoon tul, akila álaamoeriit, bare pánayiisenuul kánkumak koola di titooruul. 4Handeneen nálanlaam nan kufaaŋenoomi di ébaarey yati búpinab, iñeme narondoŋ ñátum di kánkumak kati Atijamit. Wulaal poop núlaamoaalaamo di oo nan man Apakenaau Áamakau álaameenumi eeno. Bare panuroŋaal di oo ñátum di kánkumak kati Atijamit, nan man Apakenaau Áamakau akammi eeno. 5Jíningulooro man jijuk manteer jooju di esofey kafiumak kooluul. Jímeelo’ooro. Tíenuutien muyuul jijujuk mati Yensa Apakenaau Áamakau oomu di muyuul? Leejaat jilolo pám kámeeloak uke. 6Nígolungolum mati panjiñes man jimanj wúli ulout pám. 7Kúlawak kóololi bee di Atijamit takumbi jikaan majakut. Wúli ulawut mo’ome mbi úyiisen bukanak kukila mati wúli nuŋooleŋŋoolen ujaw fácul, bare mambi jikaan joon, handeneen wúli nukankaan nan bukan kaloe pám. 8Mati wúli uŋoolenut ukaan wan siriiboorutumi di malegenam, bare malegenam ceb. 9Handeneen núlaamolaamo, wúli súumeolisuum mati muyuul jílinliŋ. Wúli wan ulawemi woo eenomi muyuul mbi jifaŋuto. 10Ínje oomu di eciikuul uru bala’a íriiŋubo. Kammojaat ínje oomu di kágolum mati letikaan táañiuul nampi íriiŋubomi. Mati nimammaŋ ekaaney burokab di fujuumaf fan Akiiyaau asenammi man íliŋenuul, bare lee kakajenuul. 11Kutiom, jikatooraal bee niceen! Jisofoor jak ban jíyenten wan ilawumi, jimaŋoor, jilako di kásuumaay titooruul, ban kamaŋak di kásuumaay kati Atijamit pánkoomi di muyuul 12Jisaafoor kasaafoor kásuume ñaj. 13Bukanak kati Atijamit kammi baabe kúsaafuluul búrom. 14Emitey ekaan majakam mati Akiiyaau Yensa Apakenaau Áamakau, di kamaŋak kati Atijamit, ban bapaalaayab bati Búyegetab Bátienaab pámboomi di muyuul búrom.

will be added

X\