2 KORINT 12

1Ínje eete kateben sileekom, handeneen ibajut waaf di mo, bare nirulen kasanken mati Akiiyaau náyiisenanyiisen waaf nan sáaut man ijuk di poop nakaanammi man imanj wayofoe di ésigirom. 2Simit uñen di sibakiir bálamuk, nimammanj ariiba aceen ati Apakenaau Áamakau naŋariŋar bee di bukinab bajakaab búfeegintenab. Ínje imanjut manteer funkool fuje’e mba yuutool eje’e, Atijamit amanje ceb. 3Ban nimammanj mati ániinaau umu naŋariŋar bee bukinab bajakaab, manteer di funkool fuje’e mba yuutool eje’e, ínje imanjut bare Atijamit amanje ceb. 4Ban najanjam kurim kuceen kan aŋoolenut areg. 5Mati ániinaau ume panitebenooro, mati ínje d fúko’om letitebenooro, rino di kálaamoak kúmboom. 6Handeneen nimammaŋ bee katebenelenoor, letikaan égot di ekammo, mati malegenam ceb nirege. Bare letitebenelenoor, mati ínje imaŋut an aceen asofaam tan ínje íriiŋut di wan ajammi di wan ajukumi di ínje. 7Handeneen man iyabumi wayofoaaw wáfasulooriammi di Atijamit. Ínje nibabaj kayah di eniilom, koo eenomi aboña ati Seetaanaay, man agaalenom takum itebenelenoor. 8Ñooni ñáfeegiir nilalaw Atijamit mati mo’ome man ápurenuko di ínje. 9Bare Atijamit nalaañenammi, “Majakam múmboom muyajiyaj, mati kánkumak kúmboom mbi kujuki kúliroor di bálaamoerab booli.” Panfaŋ man súume man iteben sileekom mati kálaamoak kúmboom, mbi kánkumak kati Apakenaau Áamakau mbi kulako di ínje. 10Mati bálamukab bati Apakenaau Áamakau, súumansuum di kálaamo, kajel, bugaal, kásuutuken, mba búyiik. Mati nan ílaamoemi, noo níliŋeni. 11Nikankaan égot! Bare muyuul jimingenammi man ikammo. Muyuul joote eciik kurim kati káyiisen mati ínje. Ínje lee waaf bare kúriiŋenaak kan jommi kúriiŋenaak kooluul kúkoyumutom. 12Nan ilakomi di muyuul, níyiisenuuyiisen tíen káyiisenak kanoosani kareguumi mati ínje áriiŋena alegen áboñulimi kápurumul di Atijamit di fúko’ool. Mati nimuutemmuuten ikaan káyiisen titooruul di kúmanjum kajuupoe, di wajamurerutimi, di mukaanaam máamakam máriiŋumi síwoonoor. 13Ñaa waaf wákon wan ikaanutumi di muyuul, woo nikankaan wo di kujojak kaaku. Woo eenomi igaalenutuul. Kaanutumojaat mbi jibonketom. 14Iñeme ínje nijonjoojonjoor bee ebil bujukoor di muyuul inki ñaa kákamun kúfeeginten. Ban letigaalenuul hani waaf, mati ilee di kariiben wan ubajumi, bare muyuul di kúkouul ceb niriibene. Kuñiilak kúkuumeneriit kuwolaiil, bare kuwolaiil kúkuumeneiimi. 15Súumansuum man ikaan wanoosani wan ibajumi bee karambenuul. Mante panjimaŋom jayiinkun mati man imaŋuuñaa máamak? 16Kuceen di muyuul pankumaŋ mati igaalenutuul. Bare bee iñeme kuceen kusosof mati nikonkooñ ban nibuntooruul man ibaj waaf. 17Bare buuma? Mante kan íboñuluumi kuguuñuuguuñ? 18Ínje nilalaw máamak Tiito man ajaw, ban niboñool di atiolaal ariiba aceen síñakon. Mante room kama Tiito naguuñuuguuñ? Mante room kama wulaal úrokumutaal ñátum di Búyegetab Bátienaab bákonab? Mante room kama wulaal útaagulutaal kátaagulak kákonak? 19Timaa jisosof wúli nusankensanken uru búrom mati kapooyooro? Moo leti. Wúli nurereg mati ure nan kuroka kati Apakenaau Áamakau, ban wúli numammanj mati Atijamit oomu di káyenten. Kúpaalumom, wanoosani wan ukammi, woo búrom wajake di muyuul. 20Mati níkolikoli nampi íriiŋubomi takum ítookuluul di wan isofutumi panjikaanuwo, ban muyuul poop leejijukom di wo. Ínje níkolikoli kuceen di muyuul man kulako kañoosoorak mba kalatoorak mba féenaaf titoorey, mba kabotoorak di eloey fácul, mba kasuulenoor, mba káyiisenoor kupooñ, mba kájamooraati. 21Ínje níkolikoli nampi ilaañumi íriiŋubo inki, Atijamit úmboom mbi awalenom joc fáculuul, ban ínje mbi kaanom búlok mati kajuupoe di muyuul kakammi majakut ban kútiiwoorut kukat bálamuk majakutiil mati noo, masikomi, di kaseeket di kániine’et, di kayenet. ’et, di kayenet.

will be added

X\