2 KORINT 11

1Nimammaŋ muyuul mbi jimuuten di ínje handeneen man ígotetumi jayiinkun. Jibonket jimuuten. 2Nibabaj búlat di muyuul ñátum di búlatab bati Atijamit fúko’ool. Mati níliguulig nan ámajira amanjutumi ániine bee di ániine ákon, oo eenomi Apakenaau Áamakau. 3Bare níkolikoli mati nan man eyelaay ebuntoorumi Hawa, kawoonoorak kooluul pánkujimenuul man jikat kamaŋak kalegenak di kálirooraak kooluul bee di Apakenaau Áamakau. 4Mati an aceen abilujaat man áriiŋen mati Yensa ábuto ban náriiŋen mati akaanutumi Yensa an úriiŋenuumi, mba nuyab búyeget búbuto kápurumul di anau an jiyabumi, mba jiyabujaat furimaf fajakaaf fanaamutumi kápurumul di anau an jiyabumi, muyuul súumuusuum man jisenooro kúkouul bee di oo. 5Ínje isofut mati man ifaŋumi man itiitie kan joonemi kúriiŋenaak buke káamakak kooluul. 6Malegen, ekooñey yati kasankenak yoo ikooñut, mba ilee di fumanjaf. Bare nanoosani numanjenuumanjen mati malegenam máriiŋaam. 7Nampi íriiŋenumi furimaf fajakaaf fati Atijamit baceeŋutuul hani jikopori. Ínje niwalenooromi mambi jílebieni. Mante moo nikajenkajen? 8Nigunguuñ kujoj kaaku ñátum di eyabey baleebab booliil bee ekaan burokab bee mati muyuul. 9Nan ilakoeenumi di muyuul, eekenut hani waaf, bare igaalenut an man arambenom. Mati kutiolaal kuriiba bukaaku kápurumulomi Makedonia di kújeetumulo wan iceeŋumi. Ínje igaalenutuul man jirambenom noo, ban poop letigaalenderuul. 10Nan man malegenam mati Yensa mammi di ínje, letiyoolo jáng kateben sileekom di upanaw búrom wati Akaia búrom wo. 11Wau? Mante ínje imaŋutuul? Atijamit namammanj mati nimaŋuumaŋ! 12Panirulen di ekaan wan eem di ekaaney iñeme, takum kúriiŋenaak kuceen mbi kúaamakalenoor di eregey man wúli úrokum moo kúrokum. 13Kúniinaak kukila kaanomi mo’omu kukaanut kúriiŋena kulegen, koo kúriiŋenaak kubuntaak, kagaajooremi mati burokab booliil ban di kukaanalenoor nan kúriiŋena kalegen kati Apakenaau Áamakau. 14Bare laañutom bo, mati hani Seetaanaay di fúkouyo kakaanalenooro nan maleeka yati mawuŋ. 15Laañutom bo, ñaa, kaanjaat kuriibaak kooliyo kakaanalenoor nan kuroka kajoone. Di múlamukaam mooliil pankubaj wan kuñesemi. 16Panilaañ ireguul tíen, takumbi an asof mati ínje égot. Bare kaanjaat panjisof eeno mo, mbi iŋoolen ibaj jasiinkun katebenelenoor. 17(Wan isankenumi iñeme, kaanut wan Akiiyaau amaŋumi man isanken. Di mukaanaam man itebenelenooreñaa nisankensanken nan égot. 18Bare mati bukan kajuupoe bukooku di katebenelenoor nan man bukanak kati dúniyaay kukaanemi eeno, ínje poop panitebenelenoor!) 19Muyuul di kúkouul kasofooromi jilinlolinlo máamak, joote kamuuten di sígot! 20Muyuul jimuutenemuuten di anoosani akaanuumi kumiiceelool, mba nároogenuumi, mba naguuñuumi, mba násofaatiuumi di waaf, mba atancuumi di karabak kooluul. 21Nipuñopuño man ireguul mati wúli úliŋut máamak bee ekammo! Bare wanoosani an apuune man atebenelenoor di wo, ínje asankeneñaa nan égot, ínje niŋooleŋŋoolen poop itebenelenoor. 22Mante kukila Kúhibur? Ínje poop moo. Mante kukila Kuisirael? Ínje poop moo. Mante kukila úwoloorumaw wati Iburehima? Ínje poop moo. 23Mante kukila kuroka kati Apakenaau Áamakau? Ínje oomu di kasanken nan égot bare ínje ifaŋe man ikaane aroka! Ínje ifaŋe man iroke wuuj kukila, ínje ifaŋe man ilakoeene dán bukanak kukuleimi wuuj kukila, ínje ifaŋe man ibaje kútek wuuj kukila, ínje ifaŋe man ilofe ecetey wuuj kukila. 24Kúyahuudak kusofansof ñooni futok ban kasofaookasofa kunageannag ñátum di esankil yati kabaŋ ñákon rinoe bukan kugaba. 25Kúroomanak kunagannag ñátum di sigol bee ñooni ñáfeegiir. Kulatoorom di kuleebammi sikooba ñákon. Busaanaab di busayumi di ínje ñooni ñáfeegiir. Di fuk di balay ínje oomu ró di mumelam narende. 26Di ejaay yúmboom kajaaburuŋak ñajuupoe nibabaj bugaalab, ninokennoken di búyiik di kal, kúkuu, bukanom, Kakaanutumi Kúyahuudak, sísuk sáamak, baŋaan, fal fáamak di kuriiba kubunta. 27Nilakolako di burok di bugaal báamak, kámooriom kúsuumut, nicaarecaaret, baraanab di busofom, ñameeŋe íbajeriit furi, ñonkañ ñisofeansof mati mutugenam. 28Uru búrom balee to, nibajebaj bugaalab funakoofunak bati buu kujojak kombomi eeno. 29Nampi bukaaku kúlaamomi, ínje poop nílaamoelaamo. Nampi bukaaku kulomi di majakut, di riom matatat. 30Kaanjaat neete katebenelenoor, panitebenelenoor mati pambaj wáyiisenumi man ílaamomi eeno. 31Atijamit, oo eenomi Ampaau ati Akiiyaolaal Yensa, panasali bee bándoorey, namammanj mati ígaajooreriit. 32Nan ilakomi Damasukos, anifaanau ati bo di nanan nati áyiau Areta ajuumenumi kupooya di kúlamutak kati bo, man kusofom to. 33Bare di kúyuunammi di katekel kápurumul di étoofeney man ípakumumi di kañeniil.

will be added

X\