2 KORINT 10

1Ínje Paul di fúko’om eem di elawuul. Ínje nilawuulaw ñátum di kawalenoor di kajinlen kan Apakenaau Áamakau abajumi. Handeneen kuceen di muyuul kuregumi mati ínje an ákoofie nan ujuudooraami, bare ínje nibilumi ipeeto nan úloiyooraami ceb. 2Bukaaku koone wúli kágorooroli kuriibooriiboor di mukaanaam mati dúniyaay uye. Moo kaane nampi íriiŋubomi, panikaan táañi di bukan kukila. 3Malegen wúli bukan ceb nucincin di dúniyaay uye, bare ulee di futiik faanomi nan man bukanak kati dúniyaay kukaanemi eeno. 4Mútiikumaam man utiikumi di móro, moo lee mati dúniyaay uye. Bare mútiikumaam mati Atijamit mabajumi kánkum káamak bee kakajen jaj kánkumak kan kúlatooroli. 5Ñátum di mútiikumaam mukila wúli nukajenkajen kañakoorak kati kumanjaak katebenelenooremi koo kúfirenemi bukanak emanjey yati Atijamit. Ñátum di mútiikumaam ume, wúli nuŋooleŋŋoolen kawoonoor kajakut kanookani kati bukanak, ban uliikiteniil man kujamoor di Apakenaau Áamakau. 6Ban nampi jijamoomi tíen, panutek anoosani alatumi ejamool. 7Jijiker wammi fáculuul. Kaanjaat anoosani ágolumumi mati oo ati Apakenaau Áamakau. Mbi jikaanool man awoolenooro, mati wúli poop kati Apakenaau Áamakau nan kukila. 8Ínje letipuñorer, handeneen nifaŋ man itebenooro sileekom mati fujuumaf fan Akiiyaau ásenolimi. Fujuumaf fukila foo bee káliŋen kafiumak kooluul, lee kakajenuko. 9Takum jijikerom nan ínje an amaŋe kakoolenuul ñátum di siletaraas súmboom. 10Bukaaku koone, “Paul siletaraas soola sítaañitaañi ban sibabaj kánkum, bare nan ujuudooraami akila nálaamolaamo, ban kurimak koola kubajut fúkaw.” 11Bukanak kukila kasankenemi mo’omu koote kálaul tíen mati bajut búpajuloor di wan uciikulomi di siletara wúli balee to di wan ootumi ekaan wúli bamaaterab di muyuul. 12Wúli letupuun bee karekelen kúko’oli di bukaaku kasofooromi bukan kateboe. Bare kukila kágotete, di karekelenoor kúkoiil, kubajut kálaul. 13Bare ootutaal katebenooro síleekolaal wuujuto mati fujuumaf fan ubajut. Bare panutebenooro ceb mati burokab ban Atijamit ájuumenolimi man ukaan, ban muyuul eenomi kapan kaaku kati burokab bukila. 14Wúli di kúko’oli letuteben síleekoli wuujuto. Ban wúli umondumi újeetumuluul furimaf fajakaaf mati Apakenaau Áamakau. 15Wúli letuteben síleekoli mati burokab ban bukaaku kurokumi. Bare núgolungolum mati kafiumak kooluul pánkukalaa ban mati burokab bóololi titooruul panfaŋ man búkalaae. 16Mambi úriiŋen furimaf fajakaaf bee di mof múbuto man jílingoorumi, ban aleemi di burok. Leebaj kúceeŋ di kapan kati ai noom di burok. 17Bare furimaf fati Atijamit di fommi, “Ampi amaŋumi katebenelenoor aate katebenelenoor mati wan Akiiyaau akammi ceb.” 18Mati let anau asalooroemi oo abaje kasal, bare anau an Akiiyaau asalumi oo abajemi kasalak.

will be added

X\