2 KORINT 1

1Ínje Paul, an Atijamit amukenumi man ikaan áriiŋena ati Apakenaau Áamakau Yensa, eem di eciik letaraay uye di Timoti atiolaal ariiba. Eciikiciik lee bee di fujojaf fammi di ésukey yáamakey yati Korint ceb, bare poop bee di bukanak búrom kati Atijamit kammi di kapanak búrom kati Akaia. 2Emitey ekaan Atijamit Ampaolaal di Akiiyaau Yensa Apakenaau Áamakau kuwuluul majakam mooliil di poop kásuumaayak kooliil di úyegetuul. 3Jisalaal Atijamit, Ampaau ati Akiiyaolaal Yensa Apakenaau Áamakau! Oo eenomi Ampaau abonketeolaami kabonket di poop oo eenomi Atijamit añabeolaami úsusolaal nanoosani. 4Atijamit añabeolaami úsusolaal nan ulakaami di bugaalab boololaal búrom, mambi uŋoolenaal bukaaku uñabaal úsusiil di bugaal. Nampi bukaaku kulakomi di bugaalab, panuŋoolenaal usenaaliil eñabey yákoney yati úsusiil yan Atijamit akammi di wulaal. 5Nan man wulaal man ufaŋaami man unaamooraale di bugaal bájakaatie bati Apakenaau Áamakau, Atijamit nafaŋ man añabolaal kápurumul di Apakenaau Áamakau. 6Ulakojaat di bugaalab, moo bee mati muyuul panjiñabi úsusuul ban di jipak. Eenojaat úsusoli uñabiñab, muyuul poop panjiñabi. Ban panjiŋoolen jimuuten ríiŋ bugaalab bákonab ban wúli ubajumi. 7Fúgolumaf fóololi bee mati muyuul fúlinliŋ máamak. Numammanj nan man jinaamoor di bugaalab bákonab di wúli, panjinaamoor poop di eñabey yati úsusoli yan Atijamit ásenolimi. 8Kutiom, wúli umaŋut man muyuul jímanjaati mati bugaalab ban ubajeenumi di mofam mati Asia. Nubajeembaj bo bugaal báamak ban síñunduoli jaheemeen sikaaneene sire bo. 9Malegen, wúli nusofeensof mati waaf urinout manteer ecetey. Bare mo’omu múkaanolimi takum úgolum kúko’oli bare mbi úgolum di Atijamit ceb aŋoolenumi áyitenul kacetumi. 10Atijamit nápakenolipaken di búyiikab bati ecetey. Ban nubabaj fúgolum fátiene di oo mati panarulen kápakenoli. 11Muyuul poop joote kárambenoli di kúlawak. Jikammojaat, bukan kajuupoe pankusal Atijamit mati kúlawak kooluul kúyiiŋiyiiŋ mati epakey yóololi. 12Wákon wakammi man itebenooro, woo eenomi káyiisenak kati síwoonooras sóololi. Mati wúli núwambuloewambulo úyegetoli ban nulegenolegeno di wan ukaanemi. Wúli núgolungolum di majakam mati Atijamit, lee di malinlaam mati dúniyaay. Moo man ukaane di eroŋey yóololi bee di anoosani, ban nufaŋ man ukaane bee di muyuul. 13Mati wúli ulee di eciik wan jootutumi kaliiken mba jílaulaati. Nibabaj kágolum mati jílaulaul wátiene, 14handeneen jílaulut búrom iñeme mati wúli. Funak fákon nampi Akiiyaau Yensa alaañulomi inki, panjiŋoolen jiteben sileekuul mati wúli, wúli poop nuteben síleekoli mati muyuul. 15Mati mo’omu tíenantien, mutooŋandam ínje nisofeensof bee ebil ijukuul, mbi jibajeen kawul kati bujukoor ñagaba kápurumul di ínje. 16Nimaŋeemmaŋ bee ejukuul nampi ilakomi ejaay bee Makedonia, di poop élaañuley yúmboom di kajaaburuŋ kukila. Muyuul poop mbi jiŋooleneene jiramben ejaay yúmboom bee Yúdea. 17Mante muyuul jisosof mati ínje iŋoolenut isof wan eetumi ekaan? Mba mante ínje neeno nan bukan bukaaku kati dúniyaay kaanemi éey ban kaanut malegen? 18Nan man Atijamit akammi arega malegen, ínje ikaanut nan bukan kukila. Eenjaat éey, numanj éey. 19Mati Añiilau ati Atijamit, Yensa Apakenaau Áamakau, an ommi káriiŋenuulak moola, Sila, di Timoti, ínje di fúko’om. Akila akaanut éey ati éey mba a’a ati a’a. Di oo nanoosani éey ceb. 20Mati oo álirenumi báligab búrom bati Atijamit. Moo kaane kápurumul di Apakenaau Áamakau oonaale “Amen” man Atijamit pánalebieni. 21Atijamit oo di fúko’ool anaamoore wúli di muyuul man ujuumaal líŋ di Apakenaau Áamakau nakaanolaakaan man usofooraal líŋ di Apakenaau Áamakau. Atijamit oo di fúko’ool amukenolaal, 22ban nakaanolaal fúmanjumaf foola bee di wulaal man áyiisen oo akilolaal. Ban nasenolaasen Búyegetab Bátienaab man bucin di sísigirolaal nan kapanak kútiyaarak kati wanoosani panasenolaal. 23Atijamit ceb amanje, wakammi ilaañut bee Korint woo eenomi takum jibaj kamandoor di ínje. 24Kaanut nan wúli kurungaak kaatumi bee ereguuley wan jootumi kafium. Wúli kooku bo burokab di muyuul dákon bee ekaan súumuul, mati kafiumak kooluul kúlinliŋ.

will be added

X\