1 TOMOTI 6

1Kuriiba kakammi kumiiceel koote kálebien líroor kurungaiil, manteer takumbi an abaj buruŋ bati kasanken wajakut mati Atijamit di mati kaliikitenak koololaal. 2Kumiiceelak kammi di kañenak kati kurungaiil kuriiba, takum kuheeleniil, mati koo kupaaliil kuriibaak kati Yensa Apakenaau Áamakau. Bare koote kamiiceelaetiil wuuj wati noo, mati koo kommi di karamben kupaaliil kuriiba kan kumaŋumi kápurumul di karaagalak kati burokab booliil. Noote kaliikiten ban núliŋen uwe man koote ekaan. 3Ampi aliikitenumi waaf wanaamutumi di kájaatiken kan isenumi muyuul, ban nalatumi esofey yati kurimak kalegenoaak kati Akiiyaolaal Yensa Apakenaau Áamakau di poop kaliikitenak kalegenoaak kati buruŋab boololaal. 4An akila atebenelenoore ban amanjut wanoosani. An aanomi mo’omu abajut waroŋe wampi añoosoor ban insi nañoos mati kurimak. Mo’omu múŋareuumi ebajey búlat, kañoosoor, kasuulen, di esofey wajakut di fúkoi, 5ban kañoosoorak kábaneriitumi titoorey yati bukanak kan úyegetiil uroŋutumi di kasofutumi malegenam hani jayiinkun. Koo kusosof kariibenak buruŋab koo eenomi ebajey fubajaf. 6Malegen, buruŋab bulegenab bukaanemi man an abaj fubaj fáamak, arejaat di wan abajumi. 7Mati uŋaruloutaal waaf bee baabe di dúniyaay, ban letuŋoolenaal uŋaraal waaf baabe di dúniyaay uja’aal di wóro. 8Moo ubajaajaat wampi uriaal di wampi ukokoaal, yajolaayaj. 9Bare kamaŋemi eñesey fubajaf pankulo di kayinkoorak, ban wahaw ujandaw usofeiimi tap, wañakeiimi bee di kakajen di kakaño. 10Mati emaŋey yati sígodi yoo kufaarak kati majakut manoosani. Bukaaku kuñeseñes máamak ebajuso manteer kukat bálamuk lói kafiumak kooliil ban di kukaanooro úyegetiil ukaño di jariey. 11Bare mati au, an ati Atijamit, noote kákaanum di wajakut uwu búrom. Ban noote ekaan wajoone di wajake. Raagal nukaan túu di eroŋi man Atijamit yeool, di kafium, kamaŋ, kamuuten, di kajinlen. 12Tiik futiik falegen mati wan ufiummi. Sof lit di eroŋey yati bándoorey yan Atijamit asenimi. Eroŋey ekila esenisen bee di au nan ufelumi búyegeti man uregumi mati kafiumak kooli fáculey yati bukanak nan kulakomi kayenetak man kujam. 13Di bújonlenab bati Atijamit asenemi eroŋey bee di wanoosani, di poop Yensa Apakenaau Áamakau, afelumi búyegetool man aregumi wan afiummi fáculey yati Pontius Pilat bákoliut. 14Ínje eem di eregi man uriiben kájaatikenak kooli takum ubaj kabet, káŋarum iñeme bee nan Akiiyaolaal Yensa Apakenaau Áamakau alaañulo. 15Di funakaf fan Atijamit asofumi Apakenaau Áamakau pánalaañul inki. Atijamit an koote esal eenomi Afaŋumi Katebo, Áyiau ati kúyiak di Akiiyaau ati kukiiyaak. 16Atijamit cebool áceteriitumi, ban oo nacinumi di mawuŋam man an áloferiit. An atamburerut ajuk ban letaŋoolen ajukool. Emitey ekaan Atijamit asali ban Emitey ekaan Atijamit arung ñátum di kánkumak koola bee bándoorey! Amen. 17Jáatiken kabajumi fubaj di dúniyaay uye takum kutebenelenooro, takum kúgolum di fubajaf fooliil fajuumutumi. Bare fúgolumaf fooliil foote kalako di Atijamit aroŋaau, awuneolaami yaj waafaw búrom mambi umaayooraal máamak. 18Jáatiken bukanak kukila man kukaan waaf wajake di fubajiil. Koo koote emeeŋ di mukaana majake ban di kubaj úyeget wáwambuloe ban di kumaŋ bee ewul bukaaku kan ceeŋumi. 19Di mo’ome, kankaan fúlakenuma fáliŋe bee mati kajom, mambi kuŋoolen kusof eroŋey yan eenomi eroŋey yalegenaay. 20Timoti, sof jak wan Atijamit abilenimiñaa. Tey kasanken kútiikaar kariiboorutumi di malegenam wan bukanak kuliimoorumi man koone fumanj. 21Bukaaku kukatenkaten kafiumak kooliil bálamuk man kuriiben fumanjaf faanomi mo’omu. Emitey ekaan Atijamit aseni majakam móomi di muyuul. Amen

will be added

X\