1 TOMOTI 5

1Takum umandoor ániine anifaan bare ulawool máamak nan ampai. Nusof kúpura kúniine nan kuti’i. 2Ban nusof kuseek kunifaan nan siñaayi, kúmajira nan kúliini, man usankeniil, ñátum di búyeget bátiene. 3Cookoor kuseek kati kújima kabajutumi ampi arambeniil. 4Bare abajujaat kuñiil mba kuñookuñoolool, koote emond kuliiken ekaaney wan buruŋab boololaal buceeŋiimi dóo di sísindoiil, ban naate kalaañen bukaaku bee di kuwolaiil. Mati mo’omu moo muyeumi Atijamit. 5Bare aseek ati ájima an umanje malegen abajut arambena, oo Atijamit nágolume ceb. Fuk di balay, naroŋ di elawey ríiŋ man arambenool. 6Aseek ati ájima an kawoonoorak koola koonomi kásuumenooroak wuuj, oo aseek an búyeget bucete hani man ammi di eroŋey. 7Sen kájaatikenak uke bee di anoosani ammi di fujojaf, takum an ajuk kabet di kújima kan useniimi karambenak kooli. 8Bare an acookoorutujaat bukanool, hani kati síndo’ool yákoney, oo nañoñoos di wan afiummi. Oo afaŋe ekaan majakut an áyinenutumi. 9Aseek ati ájima kareesool kuciiki áriiŋujaat simit bukan kúfeegiir, ban poop naate ekaan aseek ayaboeene ataool ákon pat. 10Ban oo naate kálebieni mati bakaanerool bajakaab, nan aseek akure kuñoolool jak, di kawalen kujaaburuŋak jak, di eposey yati úkamunaw wati bukanak kati Atijamit, di karamben kammi di bugaalab, ban najuum lit di ekaaney wajakaaw nanoosani. 11Bare takum jiciik ureesaw wati kuseek kuñiil kati kújima, mati nampi síwoonooriil sati emaŋey man kuyabo sifaŋumi pankukat bálamuk Apakenaau Áamakau. 12Ñaa kulolo man kukajen báligab bútiyaarab ban kúkokumiimi titooriil di oo. 13Benento, pankubil kupulen jayuunaj eluup bee di eluup, ban wafaŋumi man újakaatie woo eenomi jatemaj di kawuujoorak fút fút, di kasankenak waceeŋutumi man kusanken. 14Moo kaane ínje nifaŋ man imaŋe kuseek kuñiil kati kújima kulaañ kuyabo, man kubaj kuñiil, ban di kucookoor siluupiil. Moo kulatoorolaal leekuŋoolen kureg waaf wampi kúkajenumolaal ureesolaal. 15Mati kuseek kati kújima kuceen kúpupur yaŋ di buruŋab bajoonaab man kuriiben Seetaanaay. 16Kaanjaat babaj aseek ariiba abaje kuseek kati kújima di fiilool, naate kacookooriil jak, takum akatiil bútebab bee di kati fujojaf, mambi kucookoor kuseekak kati kújimaak kabajutumi karamben. 17Kunifaanak karungemi kati fujojaf jak kúrindiiŋ eyab kálebienak káamak. Karokemi máamak di burokab bati káriiŋenak di kaliikitenak furimaf fati Atijamit, koo kufaŋumi man kúriiŋe eyabuko. 18Mati furimaf fati Atijamit foone, “Takum uloop fúmuuna kasoop nan kulakomi káruugenlankenak,” ban, “arokaau cenceeŋ man ayab bacaamool.” 19Takum úyenten wan kutaakenumi anifaan ati fujojaf leejaat tan bukan kugaba mba wawuuje to kumaate. 20Karulenumi di majakut, makiil fácul kati fujojaf búrom man kujam, moo kajom bukaaku pambikubaj kákoli. 21Di bújonlenab bati Atijamit, di Yensa Apakenaau Áamakau, di simaleekaas sálirooraas sati Atijamit, níjaatikenijaatiken man uriiben kurimak uke! Balaañut di an di wanoosani nakammi. 22Takumbi uliim di karemben uñeni di an bee kamukenool anifaan ati fujojaf. Takum ukaan majakut mati man bukaaku kukammi majakut, bare usofooro takum ubaj kabet. 23Takum uraan mumel ceb, bare uraan wayin jayiinkun manteer di ramben fari man furiemi nanoosani. 24Majakutam mati bukaaku muraraj wijijij, ban anoosani amanje mati kulolo ban pankugameni. Bare majakutam mati bukaaku pammuraj fáculey. 25Moo mákonam, bakaanerab bajakaab burajeraj wijijij, hani barajutumi iñeme, leebuŋoolen buyofo bee bándoorey.

will be added

X\