1 TOMOTI 2

1Wafaŋumi man ubaje fúkaw woo eenomi, nilawuulaw joote elaw Atijamit bee mati anoosani. Nan man jikammi kúlawak kooluul, jilaw máamak bee mati kabonketak kati Atijamit títi’iil, ban di jisalool wan akammi. 2Joote elawool bee mati kúyi di kurunga di bukaaku kammi di kujuum, manteer mbi ubajaal eroŋ yati kásuumaay káamak katunoore nan man umiiceelaetaami Atijamit di kálebienoor. 3Kúlawak kaanomi mo’ome kujajak di bújonlenab bati Atijamit Apakenaolaal, ban kúsuumeneoosuumen. 4Atijamit namammaŋ man bukanak búrom kupak ban di kubil kumanj malegenam búrom. 5Mati Atijamit ákon pat abajoe, ban atitoora ákon ceb abajoe di titoorey yati Atijamit di bukanak. Oo eenomi ániinaau Yensa Apakenaau Áamakau. 6Nasensen fúko’ool nan búsimen bee kapaken anoosani. Moo eenomi káyiisenak di nanan no’onu Atijamit namammaŋ man anoosani apak. 7Mati mo’omu nimukenimuken íboñuli man ukaan áriiŋena (Ínje oomu di eregey malegen, lee di kagaajoor), aliikitena man iliikitenumi Kakaanutumi Kúyahuudak mati káyinenak di malegenam. 8Di fujoj fanoofani fati kuriibaak ínje nimammaŋ kúniinaak koote elaw di kateben uñeniil wálirooraaw bee di Atijamit, bañuumulut mba balobut. 9Ínje nimammaŋ poop kuseekak kukoko ríiŋ man kúkaanum wan kukokoe. Takum kubuŋo kubuŋ kati katebenelenoor ban takum kujoonen kúkoiil wuujuto kakaren ñátum di sáni mba pema, mba takum kukaano wañ wan butum burioe máamak. 10Kuseek kaanumi koo kukoba káamak kati Atijamit koote ekaan kúkoiil wajake waate karamben bukaaku. 11Kuseek koote kaliiken di katunoor, di kawalenooro di kúkoiil. 12Isenut buruŋ man aseek aliikiten mba ebaj bakooŋ fácul ániine, naate katunoor sii. 13Mati Atijamit Adama natooŋe atuuk mambi kiti Hawa. 14Ban lee Adama Seetaanaay ebunteenumi bare aseekau, oo abileenumi átaas wan sílingaas sati Atijamit siceeŋumi. 15Bare aseek panapakeni kápurumi di ebajey kuñiil arulenjaat di kafium, di kamaŋ, di ekaan joon babajut kabet.

will be added

X\