1 TOMOTI 1

1Ínje Paul, Atijamit Apakenaolaal di Yensa Apakenaau Áamakau kumukenammi man ikaan áriiŋena ati Apakenaau Áamakau Yensa, an ubajaami fúgolumaf fasenammi fujuumaf ufe man eem di eciik letaraay uye. 2Eciikiciik bee di Timoti, añoolom alegen di kafiumak. Emitey ekaan Atijamit Ampaau di Yensa Apakenaolaal Áamakau kusen majakam mooliil, di kubaj kabonketak kooliil, di kuseni kásuumaayak kooliil. 3Nan ilakomi ejaay bee mofam mati Makedonia, nilawimi man ulako di ésukey yati Efes. Bukaaku kambomi kaliikiten baliikitenerab bakaanutumi malegen, ban oote eregiil kukat. 4Ban oote ereg bukan kukat eregey yati ureg wati kayayapoorak di kati urees wajuupoe wati kufannaaniŋ. Mati ure díŋareuumi eregey yati kawoonoorak kooliil, ban dirambenut bukanak man kubaj kafiumak di Atijamit. 5Kájaatikenak uke káyiisenimiñaa koo eenomi kuriibaak búrom mbi kubaj kamaŋoorak futitooriil kápureuumi di úyeget wátiene di kafiumak kalegen. 6Kuliikitena kuceen kukakat bálamuk baliikitenerab bo’obu man kujaw kújim di kañoosoor kútiikaar. 7Koo kumammaŋ man kukaan kuliikitena kati sílingaas sati Atijamit. Bare kúlaulut wan kommi di kasankenak, handeneen kúlaulut di kukaanalenoor nan kúlaulaul. 8Numanjaamanj mati sílingaas use sijajak, kaanjaat nuriibenaaleriiben so nan man Atijamit aceeŋolaami eeno. 9Bare ootaale kálaul mati sílingaas sikila sijuumenuti bee mati kajoonumi, bare bee mati káyuuresomi di kálaputemi, ban poop bee mati kamanjutumi Atijamit di kukaana majakut, bee mati kaleemi di buruŋab di poop bee mati kamaŋumi dúniyaay, kabujemi kuwolaiil, kabujemi bukan banoonut, 10bee mati kúraaria, kúniine kayabooremi, káloumemi bukan kukaaniil kumiiceel, kugaajoora, kakajenemi báligab mba bee mati wanoosani walatumi baliikitenerab balegenab 11bati furimaf fajakaaf fáriiŋumi síwoonoor fan Atijamit abilenammi man íriiŋen. 12Ínje nisasal Akiiyaolaal Apakenaau Áamakau Yensa, asenammi kánkum bee ekaan burokom. Nisaloosal mati nasofeansof an afimaay ban namukenammi man ikaan burokool. 13No’ona handeneen man isankenumi ñíi mati oo, nísuutukensuutuken bukanool ban nijeliil. Bare Atijamit nababaj kabonket bee di ínje mati nikaaneenkaan moo noo ínje kámanjaati di káfiumaati. 14Ban Akiiyaolaal nakaanammi man iyab majakam moola mabajutumi tan reulo. Ban poop nakaanammi íliroor di kafium di poop kamaŋak kati Apakenaau Áamakau Yensa. 15Furimaf foone, “Yensa Apakenaau Áamakau najawulojaw bee di dúniyaay uye bee kapakenak kukaana majakut.” Furimaf ufe fúrindiiŋ kafium, ban anoosani aate káyinen di fo. Ínje faŋ man íjakaatie bukanak búrom. 16Bare moo kaane Atijamit nabonketambonket, mambi Yensa Apakenaau Áamakau ároketumom man áyiisen kamuutenak kálirooraak koola hani man ifaŋuñaa man ikaane akaana majakut. Bukaaku poop pánkulaul mati pankuŋoolen kúyinen di oo ban di kuyab eroŋey yati bándoorey. 17Emitey ekaan bukanak kusal Áyiau arungemi bee bándoorey, ban áceteriit, ájukeriiti, ban oo eenomi Atijamit ákonau. Emitey ekaan bukanak kusalool bee bándoorey. Amen. 18Timoti, añoolom, ínje oome nibilenibilen kájaatikenak uke, riiboor di nan kurimak kan kuboña kuceen kúregaalieenumi mooli no’ona. Sof kurimak kukila nan mútiikuma mambi utiik futiik falegen, 19ban nubaj kafiumak di síwoonoor sajake. Bukaaku kalatumi ejam wan síwoonooriil sajakumi siregiimi, moo ñaa kafiumak kooliil kújinjim meej. 20Bukanak kaanomi mo’omu koo eenomi Hemene di Alesandar kan ikatumi di kañenak kati Seetaanaay man ekuriil, takum kulaañ kusanken ñíi mati Atijamit.

will be added

X\