1 TESALONIKA 5

1Kútioli, ceeŋut man ínje iciikuul mati buu mba nanan nei uwu búrom panubajo. 2Mati muyuul di kúkouul jimammanj tíen mati funakaf fati élaañuley yati Akiiyaau panfubil nan ákuu di fuk. 3Nan bukanak koone, “Kásuumaay di kapooyak kubajobajo,” bare kakañoak pánkujo’ol bee di bukoo nan man aseek ati far abajemi jariey nampi alakomi eroŋey. Banjaat buruŋ bati epakey leebubajo. 4Kútioli, muyuul jilee di érim, leesayuul nampi funakaf fati élaañuley yati Akiiyaau fúriiŋumi nan ákuu. 5Mati muyuul búrom kuñiilak kati mawuŋam di kati bala’ab. Ukaanutaal bukan kati érimey mba fukaf. 6Moo kaane jíkaanum takum jíwaayen di kámoori nan man bukaaku kukammi eeno, bare ootaale káwaayen mbi ganlo’olaal. 7Kámooriemi fukaraay, noo poop kúmooriemi ban kákaliemi fukaraay, noo poop kúkaliemi. 8Bare wulaal kati bala’ab, ganloaal, nootaale kakaanoaal kafiumak di kamaŋak nan múkaruma mati búsus, di fúgolumaf fati epakey nan bompoŋ bati mulap. 9Mati Atijamit amukenutolaal mambi atekolaal, bare mbi ubajaal epak kápurumi di Akiiyaolaal Yensa Apakenaau Áamakau. 10Nácetuncetum bee mati wulaal handeneen di kaan nucetaacet mba nuroŋaaroŋ mbi uroŋaal di oo nampi alaañulomi. 11Moo kaane jíliŋenoor man jirambenoor nan man jóomi di ekaaney. 12Kútioli, nulawuulaw máamak mbi jílebien kurungauul karokemi máamak titooruul di burokab bati Akiiyaau ban di kugamuumi. 13Jíyiiseniil kálebien káamak di kamaŋ káamak mati burokab booliil ban kukaanemi. Jiraagal man jilako’oor di kásuumaay. 14Kútioli, wúli nulawuulaw máamak, man jigam kayuunooremi leekumaŋ burokab, jíliŋen kákoofimi, jicookoor kálaamomi, jimuuten di anoosani. 15Jíkaanum mati hani an ákon di muyuul takum acaam apaalool wajakut di wajakut, wan apaalool akaanoomi, bare nanoosani añes ekaaney wajake bee di anoosani. 16Jimaayoor nanoosani. 17Jirulen jilaw. 18Jisal Atijamit di wanoosani búrom, mati mo’omu moo Atijamit amaŋumi di muyuul di Apakenaau Áamakau Yensa. 19Takum jibuj Búyegetab Bátienaab. 20Takum jiheelen kamanjenak, 21bare jímeelo waregimi, ban di jisof lit wajake ceb, 22jitey majakut manoosani. 23Emitey ekaan Atijamit ati kásuumaay mbi akaanuul jíliroor di kapanookapan. Emitey ekaan Atijamit akaan úyegetuul, di suutuul di siniiluul síbajaati kabet bee nampi funakaf fati élaañuley yati Akiiyaolaal Yensa Apakenaau Áamakau. 24Atijamit, ámukenuluumi an umanje afiumaay panakammo. 25Kútioli, jílawoli. 26Jisaafoor di kupaaluul kuriiba kasaafoor kásuume ñaj. 27Ínje nilawuulaw ñátum di kareesak kati Akiiyaau mbi jiliiken letaraay uye bee di kuriibaak búrom. 28Emitey ekaan majakam mati Akiiyaolaal Yensa Apakenaau Áamakau mbi móomi di muyuul.

will be added

X\