1 TESALONIKA 4

1Di fúwuŋenaf, kútioli, nújaatikenuujaatiken di kareesak kati Akiiyaolaal Yensa, buu joote eroŋ eeno di poop buu joote ekaan Atijamit súumool, nan man wúli ommi di kaliikitenuumi, jikammo ñajuupoe. 2Mati jiwoolowoolo wan újaatikenuumi di kareesak kati Akiiyaolaal Yensa. 3Atijamit namammaŋ man jíliroor, ban di jikat fúraar di kan jiyaboorutumi. 4Kama anoosani di muyuul naate emanj mampi kulakomi di aseekool eeno di kúliroor ban di kúlebien kúkoiil. 5Takum jimaŋ man jikaan wan ésigiruul emaŋumi mba nan kamanjutumi Atijamit man kukaanemi eeno. 6Takum an akaan majakut mba nalo di apaalool ariiba mati mukaanaam ume ñátum di ebot aseekool. Mati Akiiyaau panatek majakutam maanomi mo’omu, nan man noo ugamenuumi líŋ. 7Mati Atijamit awonkolaami mbi ukaanaal mukaanaolaal mamokene, bare mbi úlirooraal. 8Moo kaane anoosani alatumi kájaatikenak uke, oo alet di elat an bare Atijamit nalate, aseneolaami Búyegetab Bátienaab boola. 9Bare ceeŋut man íciikuluul mati kamaŋak kati kupaaluul kuriiba. Atijamit naliikitenuuliikiten mampi jimaŋoorumi eeno. 10Malegen, jíyiisenyiisen kamaŋak kooluul bee di kupaaluul kuriiba búrom kammi Makedonia. Hani moo, kútioli, wúli nulawuulaw máamak man jirulen di efaŋ man jikammo. 11Jikaan túu man jilako di eroŋ yatunoore, man jisof butumuul, di jirok máamak nan man újaatikenuumi. 12Di ekaan mo’ome, kakaanutumi kuriiba kati Akiiyaau mambi kúlebienuul ban léejigolum karamben kati an. 13Kútioli bare nimaŋuumaŋ takumbi jikaan nan kamanjutumi waaf mati kacetumi, takumbi úyegetuul ugaal, nan kabajutumi fúgolum. 14Biñoo nan ufiumaami mati Yensa nacecet ban náyitoul di kacetumi. Wulaal nufiumaafium poop mati nampi Yensa alaañulomi, Atijamit pánayitenul kuriibaak kacetumi man kújawoorul di Yensa. 15Paniŋoolen ireguul furim ufe fápurumulomi di Akiiyaau. Wulaal kampi atookulomi baroŋe, nampi Akiiyaolaal alaañulomi letuyitouloaal man uloaal fácul kuriibaak koola kaceteenumi. 16Mati Akiiyaau di fúko’ool aate káwaloul di bukinab bajakaab ñátum di kájaatiken di kacibulo, di kawonkak kati maleekaay enifaaney yati Atijamit, ñátum di kayelak kati kábiilak kati Atijamit. Mutooŋandam, kuriibaak búrom kacetumi pankumond kúyitoul di kuyaakak kooliil. 17Banjaat, wulaal kampi atookulomi baroŋe, ootaale eŋari di kukila man uja’aal bee fatiya di kátula man úkambooraal di oo. Káŋarum to panucinooraal di oo bee bándoorey. 18Moo kaane uñabooraal úsus ñátum di kurimak uke.

will be added

X\