1 TESALONIKA 2

1Kútioli, muyuul di kúkouul jimammanj mati éjawuley yóololi bujukoor di muyuul ekaanut ñaañaaña. 2Jimammanj man úsuutukenimi eeno ban nupuñenimi di ésukey yati Filipo bala’a ubilumi bee di muyuul di Tesalonika. Bare Atijamit oololaal násenolimi kapeeto man úriiŋenuul furimaf fajakaaf foola. Hani man kuñoosaak kajuupoe kúŋomenolimi. 3Man ommi di elawuuley kaanut kápurumul di kalimoor mba di síwoonoor sajakut, mba di numaŋ ebuntuul. 4Bare mati Atijamit man ásofolimi nan bukan kabajumi fúkaw kabileni furimaf fajakaaf foola. Ñaa núriiŋenufo, úñeseriit bee kásuumen bukan bare Atijamit mbi súumool, ámeeloemi úyegetoli. 5Nan man jimanjumi tíen poop mati wúli ujawulout kasankenuul furim fati kabeberen ceb, mba kasankenuul kati káfimen máfeket, Atijamit oo eenomi áyiisena óololi. 6Wúli ulakout eñes kálebien kati bukan, manteer di muyuul, mba kuceen, handeneen nuŋooleŋŋoolen uceeŋeenuul waaf, mati wúli nukankaan kúriiŋena kati Apakenaau Áamakau. 7Bare wúli nukammi bukan kajinlene nan ulakomi di muyuul, nan iñaayaau ammi di kacookoor kuñoolool. 8Mati kamaŋak kóololi kufanfaŋ man kúsankie bee mati muyuul, wúli bajonjooreene man ucaabooraal, lee di furimaf fajakaaf fati Atijamit ceb bare di poop eroŋey yóololi. Jibileembil jikaan bukan kan umaŋumi máamak. 9Kútioli, muyuul jiwoolowoolo tíen man urokumi lit titooruul? Fuk di balay nurorok takum ugaalenuul nan ulakomi káriiŋenuulak furimaf fajakaaf fati Atijamit. 10Muyuul di kúkouul kúyiisenaoli, di poop Atijamit, ban bagoroorerab bóololi búlirooliroor, bujonjoon, ban bubajut kabet bee di muyuul káyinenumi. 11Ban muyuul jimammanj mati man wúli usofuumi anoosani re nan ampa man asofemi kuñoolool. 12Nulawuulaw máamak, núliŋenuuliŋen, mbi jirungen eroŋey yooluul man jílebien Atijamit, awonkuumi man jinaamoor di jilako di jáyiaj joola di mawuŋam moola. 13Nusalesal poop Atijamit nanoosani mati mo’ome. Nan úriiŋenumi furimaf foola bee di muyuul, di jijamufomi ban di jiyabutufo nan lee furimaf fati an, bare furimaf fati Atijamit, foo malegen moo. Furimaf fati Atijamit fúkoufo furulenumi di burok di muyuul káyinenumi. 14Kútioli, jibabaj bugaal bati kásuutukenak kápurumul di bukanuul. Di mo’ome, jikankaan nan kuriiba kati di kujojak kati Atijamit kammi Yúdea. Mati káyinenak kooliil di Apakenaau Áamakau Yensa, kabajumi bugaal kápurumul di bukaniil, Kúyahuudak. 15Mati kuceen di Kúyahuudak kububuj kuboñaiil, ban kuceen hani Yensa Apakenaau Áamakau di kubujoomi. Iñeme, buke kúsuutukenolisuutuken ban di kúcesooroli. Mooliil músuumut Atijamit hani wayiinkun ban di kulat anoosani. 16Kukila di kumaŋumi káfirenoli káriiŋenak furimaf fajakaaf bee di Kakaanutumi Kúyahuudak man kupak. Di ekaaney mo’omu, Kúyahuudak kurulenrulen ekaaney man majakutiil mubeneno máamak. Bare iñeme kañuumulak kati Atijamit di kuwaloulomi bee di kúkoiil. 17Kútioli, nan ukatooraami jayiinkun, siniilolaal sikatoore kaanut di síwoonoorolaal. Nuraanouuraano máamak ban nukaan túu man ujukooraal inki. 18Wúli numaŋeemmaŋ bee élaañul. Ñajuupoe, ínje Paul niraagalumi élaañuley bare Seetaanaay ekammi wúli uyetut ubil. 19Di múlamukaam, waa ésenolimi fúgolum di kamaayoor, ban waa ékaanolimi nuteb úbandoli man usanken mati ejaay yóololi fáculey di bújonlenab bati Yensa Akiiyaolaal nampi alaañulomi? Mante kaanut muyuul? 20Mati muyuul jíkaanolimi man uteben úbandoli ban numaayoor mati muyuul.

will be added

X\