1 TESALONIKA 1

1Ínje Paul eem di eciik letaraay uye banaamoore di Sila, di Timoti. Eciikiciik bee di kati fujojaf fati Tesalonika, muyuul kati Atijamit Ampaau di Akiiyaau Yensa Apakenaau Áamakau. Emitey ekaan majakam di kásuumaay kóomi di muyuul. 2Nusalesal Atijamit nanoosani mati muyuul búrom, ban nujameneuujamen di kúlawak kóololi. 3Nan wúli ulakomi elawey Atijamit Ampaolaal mati kafiumak kooluul, di emaŋey burokab, ban poop mati fúgolumaf fáliŋaaf fooluul di Akiiyaolaal Yensa Apakenaau Áamakau. 4Mati numammanj kutiolaal kan Atijamit amaŋumi máamak, mati Atijamit namukenuumuken. 5Mati nan úriiŋenuumi furimaf fajakaaf, lee di kurimak ceb, bare poop di kánkum, di Búyegetab Bátienaab, di poop ríiŋoliriiŋ máamak mati malegenam moolifo. Jímanjolimanj tíen bukan kúmanum titooruul bee mati muyuul. 6Muyuul jibilumi jikaan kúriibenaoli, handeneen jilakolako di bugaal báamak, jiyabuloyab kurimak di kásuumaay kápurulomi di Búyegetab Bátienaab. 7Mo’omu mújeetumulomi man jibilumi jikaan káyiisen bee di kuriibaak búrom kati Makedonia di poop kati Akaia. 8Mati reut man furimaf fati Akiiyaau fufetumi Makedonia di Akaia ceb, bare kafiumak kooluul di Atijamit kujamojamo banoosani ban ceeŋut man ureg waaf ubenento. 9Mati bukanak kukila di kúkoiil kurereg mati man jíwalenolimi jak eeno, di poop man jítiiwoorumi jikat bálamuk sínaati man jimiiceelaetumi Atijamit alegenau aroŋaau, 10di poop man joom di ekob élaañuley yati Añoolool kápurumul bukinab bajakaab, an ayitenulomi di kacetumi, Yensa apakenolaami di kagamenak kati Atijamit kábileuumi.

will be added

X\