1 PETER 5

1Ínje di fúko’om eenomi anifaan ati fujojaf, oomu di elaw kupaalom kunifaanak kati fujojaf titooruul. Ínje nikankaan áyiisena mati bugaalab bati Apakenaau Áamakau. Ban paninaamoor di mákalaam maate karajeni. 2Jimat kamat kati Atijamit kan abilenuumi ñátum di emaŋey yooluul nan man Atijamit amaŋuumi eeno. Bare takumbi kaan nan numingenimingen. Jicookooruko kaanut mambi jibajuro waaf bare mbi jikaan bee mati Atijamit. 3Takum jimingen bukanak kammi di kañenuul, mbi jikaan káyiisen kajake bee di bukoo. 4Nampi Amataau Áamakau arajulomi, panjiyab bompoŋab bati áyi ban mawuŋam moolibo mootut kagumbulo. 5Moo mákonam, muyuul kúpuraak kúniinaak, joote esen kúkouul bee di kunifaanuul. Muyuul búrom joote kawalenooro, mati “Atijamit nalalat katebenooromi, bare náyiisenyiisen majakam bee di kawalenooromi.” 6Jiwalenooro di kañenak kati Atijamit kabajumi kánkum, manteer mbi atebenuul di nanan noola. 7Jisen bugaalab booluul bee di oo, mati nacookooreuucookoor. 8Ganlouul, jíkaanum! Seetaanaay yakammi alatooruul nan jimukoor yammi di káciiŋit, di eñes ampi emer búcol. 9Bare joote elatuyo man jijuum líŋ di kafiumak kooluul. Jimammanj mati kutiuul kuriiba kammi banoosani di dúniyaay kooku di bugaalab bákonab. 10Nampi jigaalumi jayiinkun, Atijamit ati majakam búrom, pánawonkuluul bee di mawuŋam moola mati bándoorey mammi di Apakenaau Áamakau. Panalaañenuul ban najuumenuul líŋ ban nasenuul kánkumak. 11Bee di oo akilumi kánkumak bee bándoorey. Amen. 12Ínje niciciik letara yátemie bee di muyuul ñátum di karambenak kati Sila, an isofumi nan atiom ariiba afiumaay. Mati ínje nimammaŋ kabuntooruul ban níyiisenuul buu Atijamit ajakumi eeno manteer mbi jirulen di kafiumoolak di ejuum líŋ. 13Kuriibaak kammi di fujojaf fati Babilon kúsaafuluul, moo mákonam añoolom Maruk ásaafuluul. 14Jisaafoor jak di kupaaluul di kamaŋak. Kásuumaay kóomi di muyuul búromuul kammi di Apakenaau Áamakau.

will be added

X\