1 PETER 3

1Moo mákonam muyuul kuseekak joote esen kúkouul bee di kutauul hani kufiumut di furimaf fati Atijamit. Bagoroorerab booluul búyiisen handeneen jiregut furim, panjiŋoolen jíjeetumuliil bee di kafiumak, 2mati pankukooñaamuul man kujuk bagoroorab booluul buu búlebienumi Atijamit bajut úyeget ugaba. 3Takum jikaan kawoonoorak kooluul búrom di búkaroorab nan kubuŋ kati kakaren kuwuujuto, kakaanoak sáni banoobani, di poop wañaw wan butumab burimi. 4Jijooŋoor di sísigiruul ñátum di kajinlen katunoore. Kajooŋoorak kaanomi mo’omu kootut ecet. Di kapanak kati Atijamit koo waaf wabaje fúkaw. 5No’ona kuseekak kukobaak káamakak kágolumumi di Atijamit ninsi kukaanooro man kujooŋooro ñátum di eseney kúkoiil bee di kutaiil, 6nan man Sirah akobumi Iburehima man awonkool akiiyaool. Muyuul iñeme kuñoolool jikaanjaat wajoone, moo lee jíkoli hani waaf. 7Moo mákonam muyuul kúniinaak jibaj kalako kajake di kuseekuul. Jikaaniil jak di kálebieniil, mati kukila kúliŋut nan muyuul ban di jinaamoor kawulak kati Atijamit di eroŋey yunkuley. Jikaanutumojaat, waaf letukajen kúlawak kooluul. 8Di múlamukaam, muyuul búrom jikaan úyegetuul tákon, di jibaj káboteni di kamaŋoor. Muyuul joote kabonketoor di kawalenoor. 9Takum jilaañen majakut bee di majakut mba kajel bee di kajel, bare jilaañeniil wajake. Mati woo jíwonkumimi mambi Atijamit awuluul kásuumaayak koola. 10Mati furimaf fati Atijamit foone, “Anoosani amaŋumi eroŋey ban najuk kunak kajake, mbi asof fúredimpool eregey wajakutaw ban nakat kasanken furim fati kabunt. 11Oo aate kátiiwoor akat majakut man akaan majake, ban naate eñes kásuumaay ban nariibenuko. 12Mati kúcilak kati Akiiyaau kooku di kajoonumi, ban uwosool úwambulowambulo bee di kúlawak kooliil. Bare nakatumi bálamuk kakammi majakut.” 13Iñeme ai panaŋoolen agaalenuul kaanjaat jibabaj fuuñ fati emaŋ ekaan joon? 14Bare handeneen panjilako di bugaalab mati ekaaney wajoonaaw, Atijamit panacaamuul mati mo’omu. Moo kaane takum jíkoli’iil ban takum gaalenuul. 15Bare muyuul joote kálebien Apakenaau Áamakau nan Akiiyaau ati eroŋey yooluul. Jijonjoojonjoor nanoosani mbi jilaañen anoosani abajumi kúceeŋ kati fúgolumaf fan jibajumi, bare jikaan di majinlene di kálebien. 16Bare muyuul joote ekaan síwoonooruul sítien, nampi kujeluumi ban di kusanken bagorooreruul bajakaab nan man jikammi kuriibaak kati Apakenaau Áamakau, pankubil kupuño wan kukammi jatemaj. 17Kaanjaat kamaŋak kati Atijamit, jigaal man jikaan wajoonaaw kóyume ekaan wajoonutaw. 18Apakenaau Áamakau poop nacecet mati makajutolaal ñákon ban kare, ajoonumi acetumi bee mati kajoonutumi, mambi ájeetumolaal bee di Atijamit. Nan bukanak kubujumi Apakenaau Áamakau, bare Búyegetab Bátienaab bati Atijamit di bukaanoomi man aroŋe inki. 19Di bukila najawumi karegen poop bee di úyegetaw wakokenimi. 20Úyegetaw ukila wati kañoosemi no’ona, nan Atijamit aroŋumi di ekob di kamuuten di kunakak kati Nuha, di nanan nati kajoonenak kati busaanaab báamakab, ban umanje bukan kooni futok di kúfeegiir kúpakumumi di eyoomey kápurumul di mumelam máamakam. 21Mumelam mukila múyiisenyiisen fujuumaf fati kátiigulenak, ñátum di ko jibilumi jibaje epakey. Kátiigulenak koo kaanut eposey yati eniiley yamokenumi, bare elawey ekaanimi bee di Atijamit kápurumul síwoonoor sajake. Kátiigulenak kújeetumeuumi epakey ñátum di káyitoulak di ecetey yati Yensa Apakenaau Áamakau. 22Oo najajaw bee di bukinab bajakaab ban man alakoe báridab bati Atijamit. Nalakomi erung simaleekaas búrom, di kujuumak kammi di fatiya di wánkum.

will be added

X\