1 PETER 2

1Moo kaane, jikat kaleetoor, kabuntoor, kagaajoor, búlatoor, kasuulenoor búrom. 2Jimaŋ máamak miilam mápurumulomi di Búyegetab Bátienaab nan muñiil mayiinkun mamaŋumi karaafak máamak, man jiŋoolen jibaak biyok jíriiŋ di epakey yooluul. 3Mati númeelomeelo majakam mati Akiiyaau. 4Jibil bee di Apakenaau Áamakau, oo eenomi fukoobaaf faroŋaaf fan bukanak kulateenumi, bare Atijamit amukenufomi ban fubabaj fúkaw máamak bee di oo. 5Muyuul kakammi kukooba karoŋe kaate eŋari bee eteep fukobaf fati Búyegetab Bátienaab bati Atijamit. Muyuul poop kayooŋ kati kúsimena káliroore, man jisen búsimen bápurumulomi di Búyegetab Bátienaab bati Atijamit ban Atijamit amaŋumi mati wan Yensa Apakenaau Áamakau akammi. 6Mati furimaf fati Atijamit foone: “Jíyenten, ínje oomu di enen fukooba di Sion, famukenimi ban fubabaj fúkaw bee mati égooleney yasofumi líŋ kukukak kati eluupey, ban anoosani áyinenumi di oo letapuñeni.” 7Moo kaan bee di muyuul káyinenumi, nababaj fúkaw. Bare mati káyinenutumi, “Fukoobaaf fo’ofu fan kuteepaak kulateenumi, foo fulaañumi fulako di égooleney yasofumi líŋ kukukak kati eluupey,” 8ban “Ekooba yaatumi ekaaney man bukanak kutatagoor, fukooba faate ekaaney man kulo”, mati kutatagooretatagoor di kuñoosumi furimaf, nan man Atijamit amaŋumi eeno man kaan. 9Bare muyuul eenomi fiil famukenimi. Muyuul kayooŋ kati kúsimena kati Áyi, kati mof máliroore. Muyuul bukanak kati Atijamit, kamukenimi mambi jíriiŋen tíen mukaanaam máriiŋumi síwoonoor mati Atijamit, áwonkuluumi di érimey bee di mawuŋam moola máriiŋumi síwoonoor. 10No’ona jikaaneenut bukan, bare iñeme jikankaan bukanak kati Atijamit. No’ona jiyabeenut káboteniak kati Atijamit bare iñeme jiyayabuko. 11Kúpaalumom, nilawuulaw máamak nan muyuul kujaaburuŋ mba kúkolokotoaak di dúniyaay uye. Takum jikaan wati kamaŋak kooluul waatumi katiikenak suutas sooluul. 12Muyuul joote kákaanum di bagoroorerab booluul titoorey yati Kakaanutumi Kúyahuudak. Handeneen kutaakenuutaaken koone muyuul bukan kájakaatie, bukoo pankujuk bagoroorerab booluul bajakaab ban di kufiumuul, pankusal Atijamit di funakaf fati élaañuley yoola. 13Mati Akiiyaau, jisen kúkouul bee di kati kujuumak kati dúniyaay búrom, bee di Áyiau Áamakau, an eenomi anifaanau ati mofam, 14mba bee di kurunga, mati Áyiau Áamakau naseniisen man kúsuutuken kálaputumi ban di kusal kakaanemi wajake. 15Mati Atijamit namammaŋ man jitonk sígotas di kamanjutumi waaf ñátum di ekaaney jak. 16Muyuul lee kumiiceel, muyuul jifelofelo. Bare takum jiŋar kafeloak man jikaan múfimenuma majakutam, mbi jiroŋ man kumiiceel kati Atijamit. 17Jílebien bukanak búrom. Jimaŋ batiaay. Jíkoli Atijamit. Jílebien Áyiau Áamakau. 18Kumiiceel muyuul joote esen kúkouul bee di kurungauul di kálebieniil, lee bee di kakaanemi jak ban di kuwoolo, bare poop bee di kátaañimi. 19Atijamit acaamuul mati mo’omu, jimuutenjaat jariey yakaanutumi yooluul di bugaalab mati muyuul jíkaanumookaanum. 20Kaanjaat nukankaan majakut pankutekuul ban numuuten di mo, letubajuro hani waaf. Bare kaanjaat nukankaan wajakaaw ban nubaj bugaal, ban numuuten di mo, Atijamit panacaamuul di mo. 21Mati di mo’ome jíwonkulimi, mati Apakenaau Áamakau poop di mo’ome nagaalumi bee mati muyuul, nakatuukat káyiisen manteer muyuul poop mbi jiriiben kútaagulak koola. 22Oo akaanderut majakut, ban furim fati kabunt fúpurerut di butumool. 23Nan kujeloomi alaañenutiil, nan kúsuutukenoomi akoolenutiil, bare nafiunfium di akila agamenumi joon. 24Oo di fúko’ool atebumi majakutolaal bee di ébaarey, mambi ucetaal bee di majakut ban nuroŋaal di majoonam. Kápurumul bábukoerab boola nubajaami ekoy. 25Mati muyuul joonojoono nan sisaha sayiisoore, bare jilaañulolaañ bee di Amataau di Apooyaau ati suutas sooluul.

will be added

X\