1 PETER 1

1Ínje Peter, áriiŋena ati Yensa Apakenaau Áamakau, eem di eciik letaraay uye. Eciikiciik bee di bukanak Kayiisoorumi bee di mofam múbutoam mati Ponto, Galatia, Kapadokia, Asia, Bitunia. 2Atijamit Ampaau nasofeensof di fumanjaf foola man amukenuumi ban Búyegetab Bátienaab boola man bukaanuul bukan káliroore. Mati mo’omu, jikokob Yensa Apakenaau Áamakau ban fúsimaf foola futiluluul man jítien. Emitey ekaan Atijamit asenuul majakam di kásuumaay faŋ man juupoe di muyuul. 3Kálebienak kooku di Atijamit, Ampaau ati Akiiyaolaal Yensa Apakenaau Áamakau! Mati káboteniak káamakak koola, wulaal núwolaaliwol inki bee di fúgolum faroŋe kápurumul di káyitoulak kati Yensa Apakenaau Áamakau di kacetumi, 4ban fúgolumaf fati bulaañab bayofimi di bukinab bajakaab bee mati muyuul, ban káñoeriitumi, síkoeriitumi, púreriitumi. 5Mati jibabaj káyinen di Atijamit, muyuul jooju di kánkumak koola bee nampi ebiley yati epakey yaatumi érajuley di funakaf fúlamukaaf. 6Mati mo’omu jimaayoor, handeneen cenceeŋ man jigaal fáculey jayiinkun. 7Bugaalab ubu bukankaan kámeelo káyinenak kooluul ceb, manteer koo kankaan malegen. Hani sáni, yakajeneimi émeeloimeelo di sambunas. Káyinenak kooluul kafaŋumi man kubaje fúkaw sáni, moo mákonam koo koote kámeeloi di kásuutukenak. Moo pambijiyab kasalak, di mawuŋam, di kálebienak di funak fan Yensa Apakenaau Áamakau aatumi érajuley. 8Hani man jijukutooñaa jimaŋoomaŋ, hani man jijukutooñaa iñeme jíyinenyinen di oo, ban di jilako kamaayoor káamak kan kurimak kuŋoolenutumi kúyiisen tan kure’e, 9mati jooju jayabe epakey yati suutas sooluul kápurumul di káyinenak kooluul. 10Mati epakey uye, kuboña bukaaku kañesemi ban di kúmeelo máamak. Bukoo kúriiŋenriiŋen mati majakam mati epakey uye mábileuumi bee di muyuul. 11Búyegetab Bátienaab bati Apakenaau Áamakau bulakolako di bukoo ban di buregiimi buu Apakenaau Áamakau aatumi egaal di poop buu koote esenool kálebien káamak. Ñaa di kuliikumi eñes bee emanj ai aatumi ekaan akila di poop nanan nei eete kabajo. Riiboor di wan Búyegetab Bátienaab bati Apakenaau Áamakau bammi di bukoo baregiimi buu Apakenaau Áamakau aatumi egaal di poop buu koote esenool kálebien káamak. 12Atijamit náyiiseniiyiisen kurimak uke mati burokab booliil lee mati karamben kúkoiil, bare bee mati muyuul, nan man kusankenumi mati mo’omu man jijameñaa iñeme kápurumul di kuboñaak karegenumi furimaf fajakaaf ñátum di kánkumak kati Búyegetab Bátienaab bápurumulo di bukinab bajakaab. Hani simaleekaas simammaŋ man sílaul mati mo’omu. 13Moo kaane úyegetuul ujonjoor, ganlouul, jijuumen kúgolumak kooluul di majakam maatumi ebiley bee di muyuul di élaañuley yati Yensa Apakenaau Áamakau. 14Jikob Atijamit mati muyuul kuñoolool. Takum jitaalen bálamuk bee di eroŋey yooluul yati noo, yati ekaaney majakutam, mati noo jimanjut wajake. 15Bare muyuul joote káliroor di wanoosani wan jikaanemi, nan man Atijamit, awonkuumi man jikaan kuñoolool, oo áliroorumi. 16Mati ciikiciik, “Muyuul joote káliroor, mati ínje nílirooliroor.” 17Jiwonkewonk Atijamit Ampauul nan jilakomi kúlawak, agamenemi wan anoosani akammi ban álaañeriit di an. Moo kaane joote kagoroor tíen ñátum di kákoli nan jilakomi di mofam múbutoam nan kujaaburuŋ. 18Jimammanj mati Atijamit nacancaam mbi jipak di eroŋ yátiikaare yan jibajumi di kufannaaniŋuul. Wan acammi kaanut nan waaf waate kakaño nan sáni mba gódifori, 19bare nacancaam ñátum di fúsimaf fabajumi fúkaw fati Apakenaau Áamakau, kankaan nan fati jisaha jabajutumi kabet mba kúyokum. 20Atijamit namukenoomuken mati mo’omu bala’a butuukab bati dúniyaay bubajo, bare mati muyuul, Atijamit narajenulorajen Apakenaau Áamakau iñeme kunakak kúlamukaak. 21Kápurumul di Apakenaau Áamakau jibabaj fúgolum di Atijamit. Mati Atijamit áyitenulo’oomi di kacetumi ban nasenoomi mawuŋam máamakam. Moo kaane, káyinenak di fúgolumaf fooluul foo fulako di Atijamit. 22Iñeme jítientien suutuul kápurumul di ekobey yati malegenam mambi jibaj kamaŋak káriiŋe bee mati kutiuul kuriiba, jimaŋoor máamak kápurumul di sísigiruul. 23Jiwoliwol inki kápurumul di furimaf fati Atijamit faroŋumi bee bándoorey, kaanut di ewoli di kuwolaak kaatumi ecet. 24mati “Bukanak búrom kukankaan nan mafos, ban mawuŋam mooliil mukankaan úrumpen wati mafos. Mafosam di muyoŋen ban úrumpenaw woolimo di ulo, 25bare furimaf fati Akiiyaau panfucin bee bándoorey.” Furimaf fukila foo eenomi furimaf fajakaaf fan kúriiŋenumi bee muyuul.

will be added

X\