1 YOHAN 5

1Anoosani áyinenumi mati Yensa eenomi Apakenaau Áamakau, oo añiil ati Atijamit. Anoosani amaŋumi kuwolaak oo añiilau namaŋe. 2Di mo’omu nootaami émanjumey mati wulaal numaŋaamaŋ kuñiilak kati Atijamit, nampi umaŋaami Atijamit ban nusofaal kájaatikenak koola. 3Mo’ome eenomi kamaŋak kati Atijamit, mati nusofaasof kájaatikenak koola. Ban kájaatikenak koola kugaalenutolaal. 4Mati anoosani awolimi kápurumul di Atijamit oo naŋooleŋŋoolen dúniyaay. Ban káŋoolenumak uke kan ubajaami kati dúniyaay ñátum di kafiumak koololaal. 5Ai panaŋoolenumi dúniyaay? Anau áyinenumi mati Yensa eenomi Añiilau ati Atijamit. 6Yensa Apakenaau Áamakau najawulojaw ñátum di mumelam di fúsimaf. Najawulojaw let di mumelam ceb, bare mumelam di fúsimaf. Búyegetab Bátienaab di fúkoubo búyiisenumi mo’ome mulegenolegeno, mati Búyegetab Bátienaab boo eenomi malegen. 7Di bajumi waaf úfeegiir wáyiisenumi mati 8Búyegetab Bátienaab, di mumelam, di fúsimaf. Doo búrom di jamoojamoor bee esen káyiisenak kákonak. 9Mati nufiumaafium káyiisenak kati bukanak, bare káyiisenak kati Atijamit koo kufaŋe kákalaa, mati Atijamit di fuko’ool áyiisene. Ban nasensen káyiisenak uke mati Añoolool. 10Ampi áyinenumi di Añiilau di Atijamit oo nababaj káyiisenak di fuko’ool di búyegetool. Ampi áyinenutumi di Atijamit, Atijamit nakaanookaan agaajoora, mati áyinenut káyiisenak wan Atijamit aregumi mati Añoolool. 11Mo’ome moo eenomi káyiisenak kan Atijamit asenolaami. Nasenolaasen eroŋey yati bándoorey, ban eroŋey ekila yooyu di Añoolool. 12Ampi abajumi Añiilau oo nababaj eroŋey, ampi abajutumi Añiilau ati Atijamit abajut eroŋey. 13Ínje eem di éciikuluul uru káyinenumi di kareesak kati Añiilau ati Atijamit, mbi jiŋoolen jimanj mati jibabaj eroŋey yati bándoorey. 14Ban súm fúgolumaf ufe foo nubajaami di oo, mati wanoosani nuceeŋaalool kápurumul di kamaŋak koola, panajamolaal. 15Umanjaajaat mati wanoosani nuceeŋaaloomi najameolaajam, moo ñaa numanjaal nayayab kúlawak koololaal. 16Ampi ajukumi atiool ariiba di ekaan majakut máriiŋut man acet, oo naate elaw Atijamit, asenemi eroŋey. Ínje oomu di ereg buku kan umanje majakutiil múriiŋut man kucet. Bare babaj majakut máriiŋumi man anau acet. Iregut mo’omu mati muyuul joote elaw bee di kakammi majakut mukila. 17Búlaput banoosani bukankaan majakut, bare lee majakut manoosani múŋareuumi ecetey. 18Numanjaamanj mati anoosani awolimi di Atijamit áruleneriit di ekaaney majakutam, bare oo awolimi di Atijamit, oo aguubeneoomi takum Seetaanaay egorool. 19Numanjaamanj mati wulaal bukan kati Atijamit, ban dúniyaay búrom yooyu di kánkumak kati Seetaanaay. 20Numanjaamanj mati Añiilau ati Atijamit nabibil ban nakaanolaakaan man úlaulaal, ban numanjaal an eenomi malegenam. Ban wulaal bukooku di akila ati malegenam di Añoolool Yensa Apakenaau Áamakau. Oo eenomi Atijamit Alegenau di eroŋey yati bándoorey. 21Kuñiilak, muyuul di kúkouul jikat sínaati.

will be added

X\