1 YOHAN 2

1Kuñoolom, ínje oome di éciikuluul ure takumbi jikaan majakut. Bare kaanjaat ampi akammomi, nubabaj atitoora di Ampaau, an eenomi Yensa Apakenaau Áamakau, Ajoonaau. 2Oo di fúko’ool eenomi búsimenab boololaal mambi majakutolaal mubonketi, ban reut di moololaal cebumo, bare bee mati dúniyaay búrom. 3Mo’ome mbi tíenolaal mati numanjaaloomanj, kaanjaat panusofaal kájaatikenak koola. 4Ampi aregumi, “Ínje nimanjoomanj” bare nañoos kájaatikenak koola oo alepoora, ban malegenam mulet di oo, 5bare ampi asofumi furimaf foola, di oo kamaŋak kati Atijamit kúlirooliroor di akila máamak. Mo’ome mbi tíenolaal mati wulaal bukooku di oo. 6Anoosani ammi oomu di oo naate ejaw di buruŋab bákonab ban akila ajawumi. 7Kúpaalumom, ilet di éciikuluul kájaatiken kunkul, bare kájaatiken kéele kan jipiimi di jijam kabiñoo di fúcitumaf, kájaatikenak kéelaak kukila koo eenomi furimaf fan jipiimi di jijam. 8Bare ínje oomu di éciikuluul kájaatikenak kunkul inki kan eenomi malegen di oo di muyuul, mati érimey yooyu bo ewuuj nep man mawuŋam mati malegenam moomu di eŋar fulakoyo. 9Ampi ammi akila di mawuŋam naam, ban nalat atiool ariiba, oo ápuroorut di érimey. 10Ampi amaŋumi atiool ariiba oo di mawuŋam naam, ban katatagoor kulet di oo. 11Bare ampi alatumi atiool ariiba oo di érimey naam, ban najawumi di érimey, ámanjeriit ban aje’emi beet mati érimey émimiip kúcilool. 12Kuñiilak, ínje eem di éciikuluul, mati majakutuul mubonketibonket ñátum bálamukab boola. 13Kumpaak, ínje eem di éciikuluul mati muyuul jimanjoomanj oo ati kabiñoo di butuukab. Kúpuraak kúniinaak, ínje eem di éciikuluul mati muyuul jiŋoolene Seetaanaay. Kuñiilak, ínje eem di éciikuluul mati muyuul jimammanj Ampaau. 14Kumpaak, ínje eem di éciikuul, mati muyuul jimammanj oo ati kabiñoo noo di fúcitumaf. Kúpuraom kúniinaak, ínje eem di éciikuluul mati muyuul jílinliŋ, ban furimaf fati Atijamit foofu di muyuul, ban muyuul jiŋoolene Seetaanaay. 15Takumbi jimaŋ dúniyaay mba waafaw wooliyo. Anoosani amaŋumi dúniyaay, oo an akila kamaŋool kulet di Ampaau. 16Mati waafaw búrom wati dúniyaay, wan anau amaŋumi, di wan kúcilak kumaŋumi, di bukan ká’aamakalenoor di wan abajumi di wan akaanumi, dooru búrom lee dati Ampaau, bare dati dúniyaay. 17Ban dúniyaay di kamaŋak kooliyo kooku di ewuuj, bare anau akaanemi wan Atijamit amaŋumi, panacin bee bándoorey. 18Kuñoolom, wulaal bukooku di nanan nílamukaan. Nan man jijammi mati alatooraau ati Apakenaau Áamakau oomu nábileul. Iñeme kulatoora kajuupoe kati Apakenaau Áamakau kúriiŋuloriiŋ. Moo kaane, numanjaamanj mati nanan nílamukaan níriiŋuloriiŋ. 19Bukanak buke kúpupur di wulaal, bare koo kulet di wulaal. Kaaneenjaat di wulaal koomeen, pankulakoeen di wulaal. Bare épurey yooliil di wulaal, yoo éyiisenyiisen mati hani ákon di bukoo alee di wulaal jáng. 20Bare muyuul Álirooraau Ákonau anaanenuumi ñátum di Búyegetab Bátienaab, ban muyuul búrom jílaulaul malegenam. 21Ínje eem di éciikuluul, let mati muyuul jimanjut malegen, bare mati jimammanj mati kagaajoor léekupurumul di malegenam. 22Ai eenomi agaajooraau áamakau? Oo eenomi añoosumi mati Yensa eenomi Apakenaau Áamakau. Ume eenomi alatooraau ati Apakenaau Áamakau, añoosumi Ampaau di Añoolool. 23Anoosani añoosumi Añiilau oo Ampaau nañoose. Anoosani ampi amaŋumi Añiilau oo Ampaau namaŋe. 24Moo kaane jíkaanum di wan jijammi kabiñoo di fúcitumaf mbi ucin di muyuul. Kammojaat muyuul joote ecin di Añiilau di Ampaau. 25Ban wan oo di fúko’ool áligolaami woo eenomi eroŋey yati bándoorey. 26Ínje eem di éciikuluul uru bee di muyuul mati kampi kamaŋumi bee ebuntuul. 27Bare muyuul Apakenaau Áamakau anaanenumi ñátum di Búyegetab Bátienaab, ban jiyabumi boobu di muyuul, man kaan muyuul ceeŋut eñes aceen man aliikitenuul. Mati Búyegetab Bátienaab boola buliikitenuuliikiten wanoosani, ban wan buliikitenumi malegen, kulee fugaajoor. Jimaŋ kaliikitenak kati Búyegetab Bátienaab, jirulen eciney di Apakenaau Áamakau. 28Kuñoolom, iñeme jirulen di ecin di Apakenaau Áamakau timaa arajulojaat, nubajaal éliŋ di fáculool ban letubajaal kapuñ di funakaf fati élaañuley yoola. 29Mati numanjaamanj mati Atijamit najonjoon nanoosani, di poop tíenolaatien mati anoosani akammi wajoonaaw nawoliwol di Atijamit.

will be added

X\