1 KORINT 9

1Mante ínje let amiiceel? Mante ínje let áriiŋena ati Yensa? Mante ínje let nijujuk Yensa Akiiyaolaal ban nirunguul man jibaj kafiumak di oo? 2Handeneen bukaaku kasofutammi nan áriiŋena, malegen muyuul jisofansof áriiŋena. Muyuul di kúkouul kúyiisenaak mati jirondoŋ kasofoorak di Akiiyaau moo múyiisenumi ínje áriiŋena. 3Moo eenomi kalaañenak kúmboom bee di kaceeŋammi fujuumaf fúmboom nan áriiŋena. 4Ínje di fúko’om di Banaabas, mante wúli ubajut bakooŋ man uyab muriaam di baraanab bóololi bee mati búrokoli? 5Mante wúli ubajut bakooŋ man anoosani kuriiboor di aseekool ariiba, nan man kúriiŋena, kutiaak kati Akiiyaolaal di Peter man kukammi eeno. 6Mante kama Banaabas di ínje céboli oote eñes burok buceen bee mati eroŋey yóololi? 7Atiika ai aate ecaamooro bacaamab bee mati burokab boola? Awaña ai ariut kureseŋ kápurumul di úbaar ureseŋ wan alukumi aban di kalaakak koola? Amata ai áfireni takum araan míilam maamu kápurumul di kamatak kati síbaas soola? 8Mante ínje di fúredimpom neem di kásankenum? Mante lee sílingaas sati Atijamit moo mákonam siregumi? 9Mati ciikiciik di sílingaas sati Muusa, “Takum uloop fúmuuna kasoop nampi fulakomi eyoosey.” Mante jisosof mati kúmuuna Atijamit asankenumi? 10Mante lee wúli nasankenumi? Malegen mati ciikiciik bee mati wúli. Awaña áruugenumi di ajalumi aate ekaan burokab booliil bati ewañey di fúgolumaf fati ebajey bucaab bati muriaam. 11Wúli nululuk di úyegetuul waaf nan etuukal yajake yápurumulo di Búyegetab Bátienaab bati Atijamit. Mante juupojuupo wúli uyabujaat waaf wati kárambenoli? 12Kaanjaat bukaaku kubabaj bakooŋ man kuyab waaf di muyuul, mante bóololi leebufaŋ room? Moo manoosani, wúli úyiisenderutuul bákooŋoli eeno moo. Bare wúli numuutemmuuten di wanoosani takumbi ukaan múlokuma di buŋarab bati furimaf fajakaaf mati Apakenaau Áamakau. 13Mante jimanjut mati karokemi di fukobaf fáamakaf muriaam mooliil dóo mommi? Bukanak karokemi di fúsimenaf koo poop kubajebaj bucaab di kawulak kati búsimenab. 14Moo mákonam, Akiiyaau nájaatikenjaatiken mati káriiŋenumi koote karambenooro kápurumul di káriiŋenak furimaf fajakaaf ufe. 15Bare ínje íyiisenderutuul bakooŋab ube. Ban poop ínje iciikut bee ereguuley man ítaatumumi eeno bee mati fúko’om. Icet kóyume man ikammo. Bajut an bee káruŋul man itebenumi sileekom woo tíikaar. 16Ínje ibajut bakooŋ man iteb sileekom mati ínje oomu di káriiŋen furimaf fajakaaf ceb. Káriiŋenak koo Atijamit amingenaam man ikammo. Íriiŋutufojaat, búyiikab bulako di ínje. 17Kaanjaat pániriiŋenufomi ñátum kamaŋak kúmboom, paniyab man iyab bacaam. Bare lee mati ínje imaŋe, Atijamit abilenaam burokab ube. 18Kama bacaamab bati waa neete eyab? Di káriiŋenak kúmboom furimaf fajakaaf bacaam bulee dó, ban iceeŋurerut an mati bakooŋab búmboom nan áriiŋena. 19Ínje ikaanut amiiceel ati hani an, bare ínje nikankaan fúko’om amiiceel bee di anoosani, mambi ígaawuliil bee di Apakenaau Áamakau. 20Nan ilakomi di Kúyahuudak, ínje ibilumi ikaan nan ákon di Kúyahuudak mambi iŋoolen ígaawuliil bee di Apakenaau Áamakau. Nan ilakomi di kariibumi sílingaas sati Kúyahuudak, nikaanekaan nan kukila, handeneen ínje di fúko’om man iriibenutusomi, bare mambi iŋoolen ígaawuliil bee di Apakenaau Áamakau. 21Moo mákonam, nan ilakomi di Kakaanutumi Kúyahuudak kabajutumi sílingaas sati Kúyahuudak, ínje ibilumi ikaan ákon di kukila. Wan ikammomi mambi iŋoolen ígaawuliil bee di Apakenaau Áamakau. Bare ilatut ekaan sílingaas sati Atijamit bare ínje oomu di kariiben wan sílingaas sati Apakenaau Áamakau siceeŋumi, mambi ígaawuliil. 22Nan ilakomi di kálaamomi di kafiumak, nibilumi ikaan nan ákon di kukila kálaamomi, mambi iŋooleniil ipaken kuceen bee di Apakenaau Áamakau. Ínje nikaanekaan wanoosani di anoosani mambi ipaken kuceen bee di Apakenaau Áamakau. 23Mo’omu búrom nikaanekaan bee kafeten furimaf fajakaaf mati Yensa, ban mbi iyab bucaab di kawulak kati fo. 24Mante jimanjut mati di kafannoor kanoosani kuteyaak kujuupoejuup, bare ákon arungemi aatumi eyab kawulak? Jitey, jíteyaj jan umanje panumond úriiŋ. 25Ateya anoosani ajawumi kafannoorak naate karaagal man ábolien eniilool di kasofooro jak. Kukaanekaan mo bee eyab kawulak kan kaatumi ejaw di érusey, bare wan ukaanaalemi woo eenomi bee eyab kawul kati ecin bee bándoorey. 26Moo kammi ilee di etey jíteyaj jati falaamaat. Ínje ikaanut nan an atiika anagemi érusey. 27Nikurekur eniilom nan an aate kanoken kafannoorak, ekuruyo mbi epulen wan ceeŋumi man ekaan. Leejaat, ínje níkolikoli nampi íriiŋen furimaf fati Atijamit bee di bukaaku iban, ínje ijukooromi man íjime.

will be added

X\