1 KORINT 5

1Bukan kuceen kúregolireg mati babaj fúraar di kan jiyaboorutumi kuceen di muyuul. Di kaan bújakaataab ube ban umanje hani kamanjutumi Atijamit kúkoiil leekukaan bo, mati ániine ebot aseekau ati ampaool man kufinto. 2Muyuul bukan kapooñe! Wau kaane leejilako búlok? Wau kaane anau o’omu jicesoorutool ápur di muyuul? 3Handeneen ínje di fumuumom imaatut, bare ínje oomu di muyuul di Búyegetab Bátienaab. Ínje nitinting bagamab iban kankaan nan ínje oomu di muyuul, 4nan jijojumi di kareesak kati Akiiyaolaal Yensa mati ániinaau ume. Ínje oomu di muyuul di kawoonoorak kúmboom ban kánkumak kati Akiiyaau Yensa pánkoomi di muyuul. 5Muyuul joote kacesoor ániinaau ume di fujojaf fooluul ban di jikatool bo di kañenak kati Seetaanaay, man eniilool ekajeni, bare yuutool mbi eŋoolen epak di funakaf fati élaañuley yati Yensa Apakenaau Áamakau. 6Ká’aamakalenoorak kooluul kujakut! Mante jimanjut mati múliitenuma hani jasiinkun múliitenemi galab fúmeelaf? 7Jípuren jibeten múliitenumaam mafanlenaam. Jikammojaat, muyuul jikankaan nan fúmeel funkul fabajutumi múliitenuma, malegen muyuul súm moo joonomi eeno. Mati Apakenaau Áamakau, an eenomi jisahaaj joololaal jati káaningak kati Ewuujey yati Njalayiri, jísimenisimen jiban. 8Moo kaane, nampi ulakoaami karuuken káaningak koololaal, takum ukaanaal ñátum di bújakaati di poop mukaana majakut, moo mukankaan nan mbúur yabajumi múliitenuma. Bare jifaŋ man jikaane mukaana mátiene di malegen, moo mukankaan nan mbúur yabajutumi múliitenuma. 9Nan iciikumi letaraay noo, nireguumi mati takum jimaŋ man jiriiboor di kakaanemi fúraaraf di kan kuyaboorutumi. 10Bare iregut mati bukanak kati dúniyaay uye. Bukoo káraadiemi di kan kuyaboorutumi kati dúniyaay uye, mba kúfeketa, mba kúkuu, mba kukoba sínaati. Joonjaat bee etey moo eenomi joote épur di dúniyaay uye jáng. 11Bare wan ilobumi muyuul woo eenomi takum jiriiboor di aanooromi oo ariiba bare akammi fúraari di kan kuyaboorutumi, mba áfeketa, mba akoba sínaati, mba atema, mba ákalia, mba ákuu. Takum jiri dákon di anau aanomi nan mo’omu. 12Mante butumom bombo di etingey bagamab bee mati kammi téeŋey yati fujojaf? Mante lee muyuul joote kagamen bukanak kammi di fujojaf kakaanemi majakut nan mo’omu? 13Atijamit panagamen bukanak kalakomi téeŋey yati fujojaf. Nan man furimaf fati Atijamit furegumi, “Muyuul joote kacesoor anau ájakaatiaau titooruul.”

will be added

X\