1 KORINT 4

1Muyuul joote ésofoli nan kuroka kati Apakenaau Áamakau kan abilenumi di malegenam mayofoaam mati Atijamit. 2Moo kaane, wan ceeŋumi di kurokaak kukila woo eenomi koote ekaan kufiumaay. 3Ínje butumom bulee bo hani jayiinkun kaanjaat ínje nigamenigamen mba fugamenaf fati sílingaas. Ínje di fúko’om ígamenooroeriit. 4Ínje múmboom mútientien, bare moo mukaanutom man ijoon. Ínje Akiiyaau agameneaam. 5Moo kaane takum jigamen an bala’a nanan nasofumi níriiŋ, jikob bee nampi Akiiyaau alaañulomi. Oo aate kájeetumul wanoosani wayofomi di érimey bee di mawuŋam ban narajen wammi di ésigirool! Ban noo anoosani panayabumi kasalak koola kan ceeŋumi kápurumul di Atijamit. 6Kutiom, ínje nirokerok mukaanaam ume búrom bee di ínje di Apolo, mambi jibaj ró waaf, mbi jiriiben kútaagulak kóololi. Ban di jíliikitenummi wúli mati “Takumbi jíyuur waciikimi! Hani ákon di muyuul takumbi á’aamakalenoor man aheelen apaalool. 7Ai akaanuul man jitebo wuuj bukaaku? Mante lee Atijamit asenuumi wanoosani wan jibajumi? Kaanjaat jiyayab wanoosani di Atijamit, wau kaane di jitebenelenoor wan jibajumi nan lee kawul? 8Súm muyuul iñeme jiñesut waaf! Súm muyuul jibabaj jiban! Jikankaan kúyi, hani wúli balee dó! Pánsuumeenom man jikaaneen kúyi, timaa muyuul di wúli nure’enaal di erungey dákon di furung fukila. 9Mati ínje di ejukey yúmboom mati Atijamit nákaanolikaan kúriiŋenaak kaate kálamuko, nukankaan nan bukan kasofimi di futiik man kurungeniimi, nan bukan kaate ebuji tan kubujemi. Mati simaleeka di bukanak kati dúniyaay uye kúluuolaal. 10Wúli sígot mati núyinenyinen di Apakenaau Áamakau, bare jilinlolinlo man jisofoor jak di Apakenaau Áamakau. Wúli núlanlaam bare muyuul jílinliŋ. Wúli uheeleni bare muyuul di jílebieni. 11Hani bee mo jaat wúli bacaarab di baraanab búsofolisof, ban mutugenam músofolisof manteer kurookal ceb. Kuceen di kúsuutukenoli ban ubajut bampi ucin, 12ban wúli bukooke karoker ñátum uñenaw wóololi. Nampi bukanak kúnumolimi wúli nooniil Emit ekatuul. Nampi bukanak kúsuutukenolimi, wúli nubaj kamuuten. 13Nampi bukanak kasuulenumi mati wúli, wúli nulaañeniil súum. Bare bee mo tan oomaañaa iñeme, bukanak kúsofolisof nan waaf wajakut di dúniyaay uye. 14Ínje iciikut mo’omu bee kapuñuul, bare bee kájaatikenuul nan kuñoolom kan imaŋe. 15Handeneen nubabaj kuliikitena kameeŋe kan umanje letuŋoolen upin di Apakenaau Áamakau, bare ínje ceb eenomi ampauul. Mati di Apakenaau Áamakau Yensa, muyuul úwoloorumaw wúmboom ceb kápurumul di káriiŋenak kati furimaf fajakaaf. 16Moo kaane ínje nilawuulaw máamak, man jibonket wey jiriibenom man ikaanemi. 17Moo kaane níboñuluul Timoti, añoolom ati búsusom ban afiumaay di Akiiyaau. Akila panawoolenuul buruŋab búmboom di Apakenaau Áamakau, nan man iliikiteniimi banoosani di fujojaf fanoosani. 18Bukaaku di muyuul bukan kapooñe, mati kaaniikaan nan ínje íje’eriit bee ebil bo’obu. 19Súumujaat di Akiiyaau, pániriiŋ bo iñemeeñeme, ban pánimeelo kánkumak kan bukanak buke kapooñumi kubajumi, lee wan kusankenemi ceb. 20Mati jáyiaj jati Atijamit let kasankenak cebuko, bare mati kánkumak. 21Waa jimaŋe man ikaan nampi ibilumi bee di muyuul? Mante ibil bee di muyuul esankiley di yóro, mba ñátum di kamaŋak di kajinlenak kúmboom?

will be added

X\