1 KORINT 3

1Kutiom, nan ilakoeenumi di muyuul, ínje iŋooleneenut isankenuul nan man ceeŋeenumi man isankenuul nan kuriibaak káliŋe. Ínje eeteene kasankenuul nan bukanak kati dúniyaay mba nan muñiil mammi di karaaf di Apakenaau Áamakau. 2Ínje eeteene karaanenuul miil, lee sinaaŋ, mati muyuul jíriiŋoorut mati so, 3mati muyuul bee mo iñeme jikatenoorut síwoonooras sati bukanak kati dúniyaay. Wau kaane kalatoorak di kóomi titooruul ban ninsi jilob. Mante lee mo’omu múyiisenumi mati muyuul kagorooro nan bukanak kati dúniyaay. 4Mati ákon di muyuul aane, “Ínje oo Paul neem di eriib” aamu naane, “Ínje Apolo neem di eriib,” mante mo’omu kaanut siwoonoor sati bukanak kati dúniyaay? 5Kama Apolo oo eenomi ai? Paul oo eenomi ai? Wulaal kuroka kati Atijamit ceb. Kápurumul di wulaal Atijamit akaanuumi man jifium. 6Ínje ilukumi, ban Apolo náyuenumi, bare Atijamit aliilene. 7Ñaa alukumi mba áyuenumi koo lee waaf, bare Atijamit ceb akammi man liil. 8Alukumi di áyuenumi koo kurere cererer, anoosani aate eyab bacaamool nan man arokumi eeno. 9Mati wulaal nukaanaakaan kurokoor bee mati burokab bati Atijamit, ban muyuul jikankaan kalaakak kati Atijamit di poop nan kalimbisak kati Atijamit. 10Ínje ninennen fúlakenumaaf ñátum di majakam mati Atijamit, nan ateepa akooñe áamak. Iñeme ñaa di fúlakenumaaf fukila fan bukaaku kommi di kateep. Bare anoosani ammi di kateep di fo mbi ákaanum buu naatumi eteepey eeno. 11Mati bajut fúlakenuma fuceen fuje’e bee kajooneni inki kaanutujaat fúlakenumaaf ufe fan wúli ujoonenumi, foo eenomi Yensa Apakenaau Áamakau. 12Iñeme anoosani ateepumi di fúlakenumaaf fukila ñátum di sáni mba gódifori mba bamaal buceen bajooŋoore, mba ubabar mba kugol kasaye, mba di ejalaboora. 13Bare anoosani burokab boola leebuyofo, mati funakaf fáje’euumi bee káyiisen burokab baanoe buu nakaane. Mati funak fukila sambun pánsiyiisen anoosani burokab boola, sambunas sije’emi bee kámeeloak anoosani burokab boola man boonomi eeno. 14Burokooburok ban sambunas sikajenutumi, an akila panayab búgalenab boola. 15Bare burokooburok ban sambunas sireemenumi, an akila burokab boola bukañokaño máamak. Bare oo di fúko’ool panapak, handeneen kankaan nan ápurenulo di bújeek bati sambun. 16Mante jimanjut muyuul eenomi fukobaf fáñiiaaf fati Atijamit fan Búyegetab Bátienaab bati Atijamit bommi? 17Anoosani akajenumi fukobaf fáñiiaaf fati Atijamit, Atijamit panakajenool. Mati fukobaf fáñiiaaf fati Atijamit fúlirooliroor, ban fukobaf fáñiiaaf fukila foo eenomi muyuul. 18Takumbi an abuntooro. Anoosani di muyuul awoonoorumi mati oo an alinloe di fujuumaf fati dúniyaay uye iñeme, naate ekaan égot mbi alinlo. 19Atijamit nasofumi mati malinlaam mati dúniyaay moo mukankaan nan mafuuriaam. Mati ciikiciik, “Atijamit nasofesof kalinloaak ñátum di malinlaam mooliil.” 20Di poop foone, “Akiiyaau namammanj mati síwoonooras sati bukanak kalinloaak, soo járus ceb.” 21Moo kammi takum an á’aamakalenoor mati ariiba ati arunga aceen ábutoe. Muyuul jikile wanoosani. 22Paul mba Apolo mba Kefa mba dúniyaay uye mba eroŋey di ecetey, nanan une mba nanan nábileul, wanoosani woo wooluul, 23ban muyuul koo kati Apakenaau Áamakau, Apakenaau Áamakau oo ati Atijamit.

will be added

X\