1 Kutiom, nan ijaweenulomi mútiyaaram bee di muyuul bee káriiŋen malegenam mayofoaam mati Atijamit, íjawumulout di magonlo mba di malinlo. 2 Mati nan ilakomi di muyuul, niwoonoorumi man ikanto búyegetom man íriiŋenuul mati Yensa Apakenaau Áamakau di ecetey yoola di ébaarey yati búpinab. 3 Nan ijawulomi bee di muyuul, eniiley yúmboom man elaaboe tololol di kaleleben di kákoli. 4 Ban nan ilakomi káriiŋenak furimaf fajakaaf yíisenut waaf ñátum di kurim kati malinlo mati an, bare di kúmanjum koo kúliŋenumi mati Búyegetab Bátienaab bammi di burokab di kánkum káamak. 5 Nikankaan mo’omu manteer mbi jifium di kánkumak kati Atijamit lee di malinlo mati anau. 6 Bare nan ilakoemi titoorey yati kuriiba káliŋe, nisankenesanken kurim kati malinlo, bare kaanut malinlaam maanoe nan mati dúniyaay uye mba kaanut kánkum kaanoe nan karungumi dúniyaay uye, kan mooliil moote eban. 7 Bare malinlaam man usankenumi moo malinlaam mayofoaam mati Atijamit, man asofeenumomi bee mati mawuŋam moololaal bala’a butuukab bati dúniyaay. 8 Bajut an ákon di kurungaak kati iñeme álaulemo, mati kaaneenjaat kúlauleenlaul leekufaaŋeneen Akiiyaau ati mawuŋam. 9 Bare ciikiciik, “Wan jícil jijukurerutumi mba wan kawos kujamurerutumi, wan búyeget bati an buŋoolenutumi buwoonooruwo, wo’owu woo Atijamit ajonjoorumi bee ewun bukanak kamaŋoomi,” 10 Atijamit náyiisolaayiis wanoosani ñátum di Búyegetab Bátienaab boola. Boo búningulooninguloor wanoosani, ban di búyiisenolaami wayofomi wásankimi di ésigirey yati Atijamit. 11 Ai aŋoolene amanj síwoonoor sati an rino búyegetab ceb bammi di oo? Moo mákonam, bajut hani an amanje síwoonooras sati Atijamit rino Búyegetab Bátienaab bati Atijamit. 12 Bare Atijamit nasenolaasen Búyegetab Bátienaab boola lee bati dúniyaay mambi úlaulaal kawulak kan Atijamit asenolaami. 13 Kama ñaa nan ulakomi kasankenak mati mo’omu, úsankenumut kurim kaliikitenolaami kápurumul di malinlo mati an, bare kurim kaliikitenolaami kápurumul di Búyegetab Bátienaab bati Atijamit, nan man oomaami kábatulak malegenam mápurulomi di Búyeget Bátienaab bati Atijamit bee di kabajumi Búyegetab Bátienaab bati Atijamit. 14 Moo kaane anau an Búyegetab Bátienaab bati Atijamit buleemi di oo, áŋooleneriit ayab kawulak kápurumulomi di Búyegetab Bátienaab bati Atijamit. Anau aanomi mo’omu áŋooleneriit álaul ko. Asofut kawul karoŋe bee di akila mati abajumi Búyegetab Bátienaab bati Atijamit ceb aŋoolenumi álaul waa eenomi Búyegetab Bátienaab bati Atijamit. 15 Ampi abajumi Búyegetab Bátienaab naŋooleŋŋoolen akaan kagamen kanoosani, bare hani an ákon aŋoolenut agamenool. 16 Furimaf fati Atijamit fuceeŋumi, “Ai amanje búyegetab bati Akiiyaau? Ai aŋoolene ájaatikenool?” Bare wulaal bukan kabaje búyegetab bati Apakenaau Áamakau.
