1 KORINT 16

1Iñeme mati kúceeŋak kan jiciikumi di letaraay nimammaŋ kasanken bee mati baleebab man jiramben bukanak kati Atijamit kammi Yúdea. Muyuul joote ekaan nan man íjaatikenumi bee di kuriibaak kati kujojak kammi Galatia man kukaan eeno. 2Fula’a fútiyaaraf fati funoomoofunoom, anoosani aate kápuren sígodi anen kapan kaaku di wan abajemi di burokab boola man asen kawulak uke. Takum akob bee nampi íriiŋulomi mbi kiti joone bee kajojen baleeb síñakon. 3Nampi íriiŋumi, paniciik siletara sati káyiisenak bee mati kuriiba kan jimukeniimi jiseniil fujuumaf fati kájeetumak baleebab bati sígodaas bee di Yerusalem. 4Kaanjaat jajak di muyuul man ijaw di kukila, kama panujawoor síñakon. 5Panibil ijukuul nampi ípurumulomi kapanak kati Makedonia, mati nisosof bee kájawum kapanak kati Makedonia. 6Ban timaa panilako di muyuul mba ŋooleŋŋoolen man ilako hani di nanan nati ñonkañ, banjaat jiŋoolen jiboñom mambi jirambenom man irulen di ejaay ban eetumi. 7Ínje imaŋut bee ejukuul iñeme nan emmi di ewuujey. Nimammaŋ panilaañ man ilako di muyuul piyo, súumujaat di Atijamit. 8Bare panilako taate di ésukey yati Efes bee nampi karuukenak kati káaningak kati Pentekosut kúriiŋumi. 9Mati babaj buruŋ báamak búwambulowambulo bee mati burok bákalaae ban di bubaj fúkaw, handeneen nibabaj kulatoora kajuupoe. 10Nampi Timoti áriiŋuluumi, mbi jiwalenool jak takumbi baj waje’e bee kagaalenool. Oo oomu bo burokab bati Akiiyaau, nan ínje. 11Moo kammi takum jimaŋ man an aheelenool. Bare jiyiirenool di kásuumaay man aŋoolen áriiŋulom baabe. Oo neem di ekobey di kuriiboorool kutiolaal bukaaku. 12Mati atiolaal Apolo, nilawoolaw máamak manteer mbi ajaw bujukoor di muyuul di kuriiba kutiolaal bukaaku, bare lee emaŋey yoola man ajawubo iñeme. Panabil nampi abajenumi. 13Jíkaanum, ban jijuum líŋ di wan jifiummi. Jipeeto ban di jíliŋ. 14Wanoosani wan jikaanemi, di jikaanuwo ñátum di kamaŋak. 15Kutiom, jimammanj mati Sitefan di bukanak kati bajamab boola koo kubilumi kukaan kuriibaak kútiyaarak di kapanak kati Akaia, koo di kúkoiil wan kuŋoolenumi kukaan burokab bee mati bukanak kati Atijamit. 16Nilawuulaw máamak mbi jisen kúkouul bee di kurunga kaanomi nan kukila ban di jikaan mákonam bee di karokemi máamak di muyuul. 17Sitefan, Forotunato di Akaiko, ebiley yooliil efintenanfinten búyegetom. Mati koo kuŋaŋŋar fujuumaf fooluul bee karambenom. 18Kukaanankaan súumom nan man kukaanuumi eeno. Bukanak kaanomi mo’omu muyuul joote kálebien. 19Kuriibaak kati kujojak baabe di kapanak kati Asia kooku di esaafuul. Akula di Pirisika, di poop kuriibaak kati fujojaf fammi sísindoiil, buke búrom kooku di esaafuul máamak di Akiiyaau anaamoorolaal. 20Kutiolaal kuriibaak búrom kúsaafuluul. Jisaafoor kasaafoor kásuume ñaj. 21Ínje Paul eem di eciik kasaafak uke ñátum di kañenak kúmboom. 22Kaanjaat an abajut kamaŋ bee di Akiiyaau, an akila anumi. Akiiyaolaal, mbi ubil! 23Emitey ekaan majakam mati Akiiyaau Yensa móomi di muyuul. 24Kamaŋak kúmboom mbi kulako di muyuul búrom di Apakenaau Áamakau Yensa. Amen.

will be added

X\