1 Kutiom, ínje eete kawoolenuul mati furimaf fajakaaf fan íriiŋeneenuumi. Furimaf fajakaaf fan jiyabumi, ban jijummi di fo líŋ. 2 Ñátum di fo jipakenipaken, kaanjaat jisosof fo líŋ. Bare leemojaat, kafiumak kooluul koo lee waaf. 3 Nireguureg waaf wafaŋe ebaj fúkaw di poop wan iyabumi, woo eenomi Apakenaau Áamakau nácetuncetum mati majakutolaal, nan man furimaf fati Atijamit furegumi eeno. 4 Di kufokoomi, ban di funakaf fúfeegintenaf nayitoulomi di kacetumi nan man furimaf fati Atijamit furegumi eeno. 5 Apakenaau Áamakau narajuloraj bee di Peter, ban bee di kúriiŋenaak uñeney di kugabaak. 6 Mo’omu múpurutomi, narajulomi áyiisenumi fúko’ool bee di bukan kawuuje siceme futok di nanan nákonan, ban kajuupoe bukooku bo kuroŋe bee jaat, handeneen bukaaku kucecet. 7 Ñaa áyiisenooromi bee di Yankuba, púrutomi náyiisenooro bee di kúriiŋenaak búromiil. 8 Di múlamukaam, narajulomi di ínje poop. Handeneen ínje nikankaan nan an aroŋimi báriiŋut. 9 Mati ínje ifaŋumi man itiitie di kúriiŋenaak búrom. Malegen ínje iyajut man kuwonkom áriiŋena ati Yensa, ujikerujaat man ísuutukeneenumi kuriiba kati fujojaf fati Atijamit. 10 Bare ñátum di majakam mati Atijamit ínje eenomi ínje, majakam moola bee di ínje mukaanut ñaañaaña. Moo manoosani ínje nifaŋ man iroke kúriiŋena karinomi, handeneen kaanut ínje bare Atijamit alakomi burok kápurumul di ínje ñátum di majakam moola. 11 Moo lee waaf manteer ínje íriiŋenumi furimaf fati Atijamit mba manteer bukoo! Ufe foo núriiŋenemi, foo jifiummi. 12 Iñeme úriiŋenaajaat mati Atijamit nayitenuloyiten Apakenaau Áamakau di kacetumi, buu kaane kuceen di muyuul koone káyitoulak di kacetumi kubajout? 13 Kaanjaat, káyitoulak di kacetumi kubajout, kama Apakenaau Áamakau áyitenulouti di kacetumi? 14 Kaanjaat Apakenaau Áamakau áyitenulouti di kacetumi, káriiŋenak koololaal furimaf fati Atijamit kukankaan ñaañaaña di poop kafiumak kooluul koo poop ñaañaaña. 15 Wúli kúriiŋenaak kalepoor nurege mati núyiisenyiisen mati Atijamit, man uregumi mati Atijamit áyitenulomi Apakenaau Áamakau di kacetumi. Bare moo lee kaan malegen, kaanjaat káyitoulak di kacetumi kubajout. 16 Kaanjaat káyitoulak di kacetumi kubajout, ñaa Apakenaau Áamakau ayitenulouti. 17 Kaanjaat Apakenaau Áamakau ayitenulouti di kacetumi, ñaa kafiumak kooluul lee waaf, ban muyuul bee mo jaat bukooku di majakutuul. 18 Moo emmi poop kacetumi búrom di káyinenak di Apakenaau Áamakau, koo bukan kájime jáng. 19 Kaanjaat fúgolumaf foololaal di Apakenaau Áamakau di dúniyaay uye ceb fure’e, moo wulaal ufaŋaami man ukaanaale bukan kábotenie di bukanak búrom kati dúniyaay. 20 Bare tan fugaajoor fuletumi, Atijamit nayitenuloyiten Apakenaau Áamakau di kacetumi, mo’omu mukankaan nan fúmanjum nakaanolaal man tíen mati kúyinena di kacetumi kaatumi káyitenuliak bee di eroŋey inki. 21 Nan man jijukuñaa eeno, ecetey man éjawumulo di ákon, Adama, iñeme moo poop káyitoulak di kacetumi kújawumulomi di aamu, Apakenaau Áamakau. 22 Di Adama anoosani panacet, moo mákonam di Apakenaau Áamakau anoosani panaroŋ eroŋ yunkul. 23 Bare aamaama di nanan noola, Apakenaau Áamakau oo Atijamit amondumi áyitenulool, nampi Apakenaau Áamakau alaañulomi, bukanool búrom pánkuyitenuli. 24 Banjaat ebaney yati dúniyaay di ebil. Apakenaau Áamakau panakajen furungaf fanoofani, di fujuumaf fanoofani, di kánkumak kanookani, ban nalaañen jáyiaj bee di Atijamit Ampaau. 25 Mati Apakenaau Áamakau aate erung bee nampi Atijamit aŋoolenumi kulatooraak ban naneniimi búrom di akammi kulatooraak fútobojumaaf fati úkamunool. 26 Alatooraau álamukau an aatumi kakajeniak oo eenomi ecetey. 27 Mati furimaf fati Atijamit foone, “Atijamit akammi waafaw búrom di fútobojumaaf fati úkamunool.” Malegen nan fommi, “Waafaw búrom di fútobojumaaf fati úkamunool,” di furimaf ufe mufelumi mati Atijamit di fúko’ool alee dó mati akila akammi wanoosani di fútobojumaaf fati Apakenaau Áamakau. 28 Nan waafaw búrom ukaanimi di fútobojumaaf fati úkamunool, kama, Atijamit Añoolool di fúko’ool, panasenooro bee di Ampaool Atijamit akammi waafaw búrom di fútobojumaaf fati úkamunool, mambi Atijamit akaan afaŋ man ateboe wanoosani banoosani búrom. 29 Leejaat, kátiigulak bee mati kacetumi bee waa? Kaanjaat kacetumi léekuyitenuli inki jáng, wau kaane bukanak di kukammo? 30 Wau kaane nurulenaal enen to síñunduolaal funakoofunak? 31 Kutiom, ínje oomu di ecetey funakoofunak. Nibabaatumo ñátum di wan itebenumi sileekas súmboom di muyuul, mati di Apakenaau Áamakau Akiiyaolaal. 32 Kaanjaat kawoonoorak kúmboom nan an, waa neete ebaj nan itiikenumi sínukuruŋ sati karamba sákoolenie sammi di Efes? Kaanjaat kacetumi léekuyitenuli, nan man kupiimi di ereg mo’omu, “Jiriaal súum nuraanaal ŋooŋ, mati kajom panucetaal.” 33 Takum jimaŋ man an abuntuul. Kajawoorak di bukan kajakut pankurunguul man jikaan wajakut. 34 Jitoten úyegetuul, man jikat ekaaney majakut. Joote kapuñeni mati bukaaku di muyuul hani bee iñeme kumanjut Atijamit. 35 Bare aceen panaceeŋ, “Buu kacetumi koote kayito eeno? Siniilas sooliil buu soote kanokoor?” 36 Au aluuliñaa! Ulukujaat élut di kalaak, létecumbul leejaat emond ecet. 37 Ban wan ulukumi élut lee futikoon, bare élut ceb, élut yati busereŋ mba sílut siceen. 38 Bare Atijamit akammi élut ebaj futikoon nan man amaŋumi eeno, élut yanoosani ebabaj fumuumuyo. 39 Kumuumak búrom lee kákon, faafu bukan, faafu sínukuruŋ, di faafu siwol búrom kunaamut. 40 Babaj poop fumuum fammi fatiya di fumuum fammi tentaam. Majakam mati fumuum fammi fatiya di fumuum fammi tentaam munaamut. 41 Bala’ab boonout nan jileeŋ, ban jileeŋ joonout nan bootab, mati bootab bubabaj majakam moolibo, handeneen majakam munaamut titoorey yati bootab búrom. 42 Moo mákonam pammubajo nampi kacetumi kúyitenuli bee di eroŋey. Nampi bíiŋab bufokimi, boo bucecet, nampi bíiŋab búyitenulimi pamburoŋ bee bándoorey. 43 Nampi bíiŋab bufokimi, bukankaan wákojie di wálaamoe, bare nampi búyitenulimi eniil yajooŋoore ban di éliŋ. 44 Nan bíiŋ bufokimi, boo eniil. Nan búyitenulimi, eniil yoo yápurulomi Búyegetab Bátienaab. Nan man bajumi eniil yati an, moo mákonam, bajumi eniil yápurumulomi di Búyegetab Bátienaab. 45 Mati ciikiciik mo’omu, “Anau átiyaarau, Adama nabilumi akaan abajumi fuyiif.” Bare Adama álamukaau nabilumi akaan Búyegetab Bátienaab man asen fuyiif bee di wanoosani man uroŋ. 46 Malegen wamondumi ubil woo eenomi eniiley yati anau, mbi kiti eniiley yápurumulomi di Búyegetab Bátienaab bati Atijamit. 47 Anau átiyaarau atuukimi ñátum di bukap, dúniyaay uye nápurulo. Aamu agabuntenau oo bukinab bajakaab nápurumulo. 48 Anoosani ammi di dúniyaay nababaj eniil nan eniiley yati anau atuukimi ñátum di bukap. Anoosani ammi di bukinab bajakaab nababaj eniil nan eniiley yati anau ápurumul di bukinab bajakaab. 49 Nan man wulaal uwoliaami di búyesoorab bati anau atuukimi ñátum di bukap, ootaale eŋar ugaloaal poop búyesoorab bati anau ápurulomi di bukinab bajakaab. 50 Kutiom, ínje eem di ereguul tíen, mati eniil di fúsim leesiŋoolen sinaamoor di jáyiaj jati Atijamit. síyabul bulaañab bati bukinab bajakaab, ban wakañoemi letuŋoolen wooken wákañoeriitumi. 51 Jíyeten! Ínje eem di ereguul malegenam mayofoaam ume man Atijamit arajenumi bee di wulaal. Wulaal búrom ootutaal ecet, bare búromolaal siniilolaal pansiwuloor. 52 pankaan nan kamoyenak di kajikerak, nampi kábiilak kúlamukaak kulitumi. Kábiilak pankulit, nampi kuriibaak kacetumi kúyitenulimi ban leekuceturer inki, ban wulaal búrom núbookulooraal. 53 Siniilas soololaal saatumi ecet ban di siput pánsibookuloori bee di siniilas saatut ecet mba saatut eput. 54 Ban nampi mo’omu mubajomi, siniilolaal saatumi ecet ban di siput pánsibookuloori bee di siniilas saatut ecet mba saatut eput, furimaf fati Atijamit panfukaan malegen: “Ecetey ekajenikajen, kaŋoolenak kúlirooliroor.” 55 “Wáay ecetey, kaŋoolenak kooli kookei? Wáay ecetey, kánkumak kati katafak kooli kookei?” 56 Ecetey ebabaj kánkumak kati katafak kooliyo kápurumul di majakut, ban majakut mubabaj kánkumak koolimo kápurumul di sílingaas. 57 Bare usalaal Atijamit man asenemi kaŋoolenak kápurumul Akiiyaolaal Yensa Apakenaau Áamakau. 58 Kutiom kan imaŋumi, jijuum líŋ bare takum jigoroor. Jirulen di burokab bati Akiiyaau. Mati jimammanj wanoosani wan jikaane mati oo woo ubabaj fúkaw.
