1 KORINT 14

1Jiraagal bee ebaj kawulak kati kamaŋak, ban di jimaŋ poop ebaj kawul kápurumulomi di Búyegetab Bátienaab bati Atijamit, ban di jifaŋ man jimaŋe ebaj kawulak kati káriiŋenak kati furimaf fati Atijamit. 2Mati an abajumi kawulak kati kaŋoolenak man asanken kasanken kuceen kálauleriiti, panasanken bee di Atijamit lee bee di bukan. Mati leebikuŋoolen kúlaulool, bare panasanken malegenam mayofoaam mati Atijamit kápurumul di kánkumak kati Búyegetab Bátienaab. 3Bare ampi áriiŋenumi bukaaku furimaf fati Atijamit pánarambeniil, pánaliŋeniil, ban nañab úsusiil. 4Ampi asankenemi kasanken kuceen kálauleriiti náliŋenooroliŋenooro di Akiiyaau, bare áriiŋenemi furimaf fati Atijamit man aramben kati fujojaf búrom. 5Iñeme ínje nimammaŋ man muyuul búrom jisanken usanken uceen wálauleriiti, bare wan ifaŋuumi man imaŋe woo eenomi man jiŋoolen jíriiŋen furimaf fati Atijamit. Ampi asankenumi furimaf fajakaaf fati Atijamit oo nafaŋe asankemmi usanken uceen wálauleriiti, leejaat aceen aate káfasul wasankenimi mambi kati fujojaf búrom kubaj karamben. 6Kutiom, iñeme ijawulojaat isankenuul di usanken uceen wálauleriiti, waa urambene muyuul? Hani jayiinkun, leejaat níjeetumulojeetum kamanjen kaaku kan Atijamit áyiisenammi, mba fumanj faafu fábutoe, mba káriiŋen kaaku kati furim faafu, mba kaliikiten kaaku. 7Handeneen múboomuma mabajutumi suut, nan fuyila mba suusa, soo búrom sikankaan nan kayel kákon, buu panjimanj yei eyele? 8Kayelak kati kábiilak kúpajuloutujaat ai aate kajonjoor bee ejaay futiik. 9Moo mákonam di muyuul. Jisankenjaat kasankenak kuceen kálauleriiti, buu pankukaan man kúlaul wan umaŋumi kasanken eeno? Mati muyuul kasanken fahaalut. 10Numanjaamanj mati usanken unaamut wajuupoe ubajoe di dúniyaay, ban kasankenookasanken kubabaj wan kúbatule. 11Bare ílaulutujaat wan kasankenak kúbatulumi, ínje panikaan ajaaburuŋ bee di kusankenaak kati kasankenak kukila, buku pankukaan kujaaburuŋ bee di ínje. 12Moo mákonam bee di muyuul. Nan man jimaŋumi bee ebaj kawulak kan Búyegetab Bátienaab buwulumi, kama jiraagal man jiyab kawulak kafaŋumi man kurambene kati fujojaf fati kuriibaak kati Yensa. 13Moo manoosani, anoosani asankenumi di usanken uceen wálauleriiti aate elaw poop mambi aŋoolene ábatul wasankenimi. 14Mati nampi ilawumi di usanken uceen wálauleriiti, Búyegetab Bátienaab bulawumi di ínje, bare ríiŋut di búyegetom wan emmi di elawey. 15Waa neete ekaan? Niceen ínje neete elaw riiboor di Búyegetab Bátienaab bulawumi di ínje di poop niceen ínje neete elaw di búyegetom. Niceen ínje neete écim riiboor di Búyegetab Bátienaab búcimumi di ínje di poop niceen ínje neete écim di búyegetom. 16Mati usalujaat Atijamit riiboor di wan Búyegetab Bátienaab busalumi di au ceb, kalakomi kunaamoor di fujojaf kálaulutumi wan usankenumi, buu pankuŋoolen kureg “Amen” bee di elawey yooli yati esaley Atijamit? 17Malegen elawey yooli yati esaley Atijamit timaa jajak máamak, bare kupaali úliŋenut úyegetaw wati kupaaliil. 18Ínje nisasal Atijamit mati ínje nifaŋ man isankene usanken uceen wálauleriiti muyuul búrom. 19Bare di fujojaf foololaal, mbi isanken kasanken kurim kooni futok kampi bukanak kúlaul koo kúkoyumaam kasanken kurim kooni síwili uñen kati kasanken di usanken uceen wálauleriiti wan bukanak kuŋoolenut kúlaul. 20Kutiom, jibeten síwoonooras sati fañiilaetaaf. Mbi jikaan nan muñiil kapanak kati majakutam bare jibaj síwoonooras sooluul sati kunifaan. 21Atijamit di furimaf foola, nammi, “Kápurumul di bukan kabajumi kawulak kati usanken uceen wálauleriiti, panisanken bee di bukanak kúmboom, panisanken kápurumul di kúredimpak kati kujaaburuŋak. Handeneen moo bukanak kúmboom léekuyentenom.” 22Kama, kawulak kati kasanken usanken uceen wálauleriiti woo ukankaan fúmanjum bee di káyinenutumi, bare káriiŋenak kati furimaf fati Atijamit koo fúmanjum bee di káyinenumi, lee bee di káyinenutumi. 23Moo kaane, kaanjaat kati fujojaf búrom kujojumi tákon man koom di kusanken di usanken uceen wálauleriiti, ban bukaaku kammi téeŋey yati fujojaf mba káyinenutumi di kunokenumi, mante leekureg muyuul jigonogono? 24Bare muyuul búrom jíriiŋenemi furimaf fati Atijamit nan aceen nampi káyinenumi mba kammi téeŋey yati fujojaf di kunokenumi, pankujamufo ban di kúlaul koo kukaana majakut. Ban kugameni kápurumul di wan jíriiŋenumi. 25Ñaa wayofumi di úyegetiil panuraji ban panalo kúfima man kumiiceelaet Atijamit, man kureg mati Atijamit malegen oomu di muyuul. 26Kutiom, fúwuŋenaf foofe di wan isankenumi taate. Nampi jijojumi tákon man jikaan kamiiceelaet Atijamit, ákon pánacim, aamu panaliikiten, aamu panareg kamanjenak kápurumul di Atijamit, aamu panasanken di kasanken kuceen kálauleriiti, mba aamu panaŋoolen ábatul ko. Wanoosani woote ekaani, warambene kati fujojaf. 27Kaanjaat ákon di muyuul asanken di kasanken kuceen kálauleriiti, bukan kugaba mba kúfeegiir ceb koote kasanken eeno, ákon asankenujaat aban, aamu naŋar, ban mbi baj ampi ábatul. 28Bare kaanjaat bajut ábatula, kukila anoosani aate katunten ban nasankenooro kasanken bee di fúko’ool, mba bee di Atijamit. 29Jikat man bukan kugaba mba kúfeegiir kuyabujaat furimaf fati Atijamit koote káyiisen, ban jikat karinomi di kúyenten mansi kúmeelo wasankenimi. 30Bare kaanjaat ákon ammi balakoe di fujojaf ayabujaat furimaf fati Atijamit, aamu alakomi kasanken aate katunten. 31Di buruŋab ube, anoosani ákon-akon panaŋoolen áriiŋen furimaf fati Atijamit, mambi anoosani ayab kájaatiken ban náliŋeni. 32Áriiŋena áriiŋenumi furimaf fati Atijamit oo aate emaŋ kasofooro kawulak koola. 33Mati Atijamit eenomi lee Atijamit ati kájiisoorak bare ati kásuumaay ceb. Nan man eenomi di kujojak kaaku búrom kati bukanak kati Atijamit, 34kunaaraak koote katunten di kujojak. Mati kusenutiil buruŋ bati kasanken, bare di kusen kúkoiil nan man sílingaas sati Kúyahuudak siregumi eeno. 35Kaanjaat babaj waaf wan kumaŋumi bee emanjuwo, mbi kuceeŋ kutaiil di sísindoiil. Puñenipuñen man anaare ajuum di fujojaf man asanken. 36Waa! Mante furimaf fati Atijamit di muyuul fúcitummi? Mba muyuul cebuul fúriiŋumi? 37Kaanjaat ampi asofooromi mati akila aboña, mba nababaj kawulak kan Búyegetab Bátienaab buwulumi, oo aate emanj mati wan iciikeñaa woo kápurumul kájaatikenak kati Akiiyaau. 38Kaanjaat ampi alatumi ban namoos wan iciikeñaa, wan aregumi woo panumoosi. 39Kutiom, moo kaane, jimaŋ máamak man jíriiŋen furimaf fati Atijamit. Takum jífiren an asankenumi di usanken uceen wálauleriiti. 40Bare tíenuul, mati jikaan wanoosani wakaani nan man ceeŋumi eeno ban di riiboor.

will be added

X\