1 Kutiom, iñeme kúceeŋak kan jiciikumi di letaraay mati kawul kápurumul di Búyegetab Bátienaab bati Atijamit, imaŋut muyuul jilako bamanjut. 2 Fiituufiit mati nan jimanjuteenumi Atijamit kújimeneenuujimen man jimiiceelaet sínaati sísankeneriitumi. 3 Moo kammi nimammaŋ man jílaul mati an létasankenum di Búyegetab Bátienaab bati Atijamit man anum Yensa, ban an letaŋoolen areg Yensa emmi Akiiyaau kaanutujaat ñátum di Búyegetab Bátienaab. 4 Iñeme babaj kawul kanaamutumi kápurumulomi di Búyegetab Bátienaab, kawulak koo búrom kúpurulopur di Búyegetab Bátienaab bákonab. 5 Babaj uruŋ wanaamutumi wati kamiiceelaetak di fujojaf, bare Akiiyaau ákonau numiiceelaetaale. 6 Babaj urokaw wanaamutumi wati kamiiceelaetak di eroŋey yoololaal, bare Atijamit ákonau narokerok di anoosani. 7 Kawul kápurumul di Búyegetab Bátienaab kasenimi kurokemi di anoosani man aramben fujojaf foololaal. 8 Búyegetab Bátienaab buwul ákon kawulak kati kasanken di malinlaam, aamu kawulak kati kasanken di fumanjaf. 9 Búyegetab bákonab buwul aamu kafium kábutoe, ban aamu kánkumak kati kasonten káju’utak, 10 aamu kánkumak kati bee ekaan wajamurerutimi, aamu kawulak kati káriiŋenak kurimak, aamu kaŋoolenak kati eregey mati titoorey yati kawulak kanaamutumi manteer koo bati Búyegetab Bátienaab kúpurumulo mba kukaanut mo, aamu kawulak kati kasanken di usanken uceen wálauleriiti, aamu kawulak kati káfasuloorak mati usanken wanaamutumi uceen wálauleriiti. 11 Búyegetab Bátienaab bákonab boo ceb busenemi kawulak uke búrom. Boo ceb busofemi kawul kei an aate eyab. 12 Eniiley yati anau ebajumi upan wajuupoe bare upanaw wajuupoaaw ukammi eniil yákon ceb, handeneen upan wanaamut ukammi eniiley yákoney. Moo mákonam di eniiley yati Apakenaau Áamakau. 13 Moo mákonam di wulaal, manteer Kúyahuud mba Kakaanutumi Kúyahuud, manteer kumiiceel mba kakaanutumi kumiiceel, wulaal búrom nuyabaayab kátiigulenak kákonak di Búyegetab Bátienaab bákonab. Ban Atijamit nasenolaasen Búyegetab Bátienaab boola bákonab di úyegetolaal. 14 Eniil ebabaj upan wajuupoe bare elet di kapan kákon ceb. 15 Kákamunak koonjaat, “Mati ínje ikaanut kañen, ínje ikaanut kati eniiley,” moo kaanut man kákamun kúkaanaati kapan kati eniiley. 16 Kawosak poop koonjaat, “Mati ínje ikaanut jícil, ínje ikaanut jati eniiley,” moo kaanut man jícil jíkaanaati jati eniiley. 17 Kaaneenjaat eniiley búrom jícil, buu paneŋoolen éyenten? Kaanjaat eniiley búrom kawos káamak kákon, buu paneŋoolen ejam kaputak? 18 Bare di kammi malegen, Atijamit najuumenjuumen kapanookapan kati eniiley nan man kilumi eeno. 19 Kaanjaat woo búrom kapan kákon, kama ñaa eniiley bee yommi? 20 Melegen, babaj upanaw wajuupoe, bare eniil yákon ceb. 21 Jícilaj leejiŋoolen man joone kañenak, “Au di ínje uwoogutaal,” ban poop fúkaaf leefuŋoolen fureg úkamunaw man foone, “Au di ínje uwoogutaal.” 22 Malegen, upanaw uceen wati yo ukankaan nan úliŋaati ban di úbajaati fúkaw di waawu, bare woo ufaŋe man uceeŋumi. 23 Ban upanaw ukila wati yo wan usofaami tiiti woo nusenaalemi kacookoor kalegenak. Upanaw ukila wati yo umaŋutaal man bukanak kujikeruwo. 24 Bare upan waawu uceeŋut kacookoorak kábutoaak kukila. Atijamit di fúko’ool akammi upanaw man uwoogoor ukaan eniiley yákon. Upanaw ukila wan usofumi ubajut fúkaw hani jayiinkun, usenisen kálebien di kacookoor kábutoe káamak, 25 takumbi kápajuloorak kubajo di eniiley, bare kapan kati eniiley kanoosani kucenceeŋ kacookoor. 26 Kaanjaat kapan kákon di eniiley kubabaj mátaañie, upanaw woo búrom ulako mátaañie, kaanjaat kapan kákon kúlebieni, woo búrom ulakoemi kamaayoor. 27 Iñeme, muyuul búrom eenomi eniiley yati Apakenaau Áamakau, ban di jikammi anoosani ati eniiley ekila. 28 Atijamit namukemmuken bukanak man kulako di fujuumaf fati fujojaf. Kútiyaarak kúriiŋena, kagabuntenak kuboña, káfeegintenak kuliikitena, ñaa kakaanemi wajamurerutimi, kabajumi kawulak kati kasontenak, kaŋoolenumi karamben, kaŋoolenumi kubaj kurokoor man kurok tákon, kaŋoolenumi kasankenak kati usanken uceen wálauleriiti. 29 Mante buku búromiil kúriiŋena room? Mante buku búromiil kuboña room? Mante buku búromiil kuliikitena room? Mante buku búromiil kukaana wajamurerutimi room? 30 Mante búromiil kubabaj kawulak kati kasontenak room? Mante buku búromiil kubabaj kasankenak kati usanken uceen wálauleriiti room? Mante buku búromiil kurokerok wajamurerutimi room? 31 Bare mbi jibaj fuuñ fati emaŋ yáamak yati ebajey kawulak kafaŋe man kubaje fúkaw. Manoosani, panilaañ íyiisuul buruŋ bafaŋe man bujake. afaŋe man bujake.
