1 Jiriiben man jikaan nan man ínje iriibenumi Apakenaau Áamakau eeno. 2 Ínje oomu di esaluul mati jiwooloeanwoolo ban di jiriibenumi wan iliikiteneenuumi. 3 Bare nimammaŋ man jílaul mati Apakenaau Áamakau oomu di fáculaf fati ániine anoosani, fúkaaf fati aseek foo eenomi ataool, fúkaaf fati Apakenaau Áamakau foo eenomi Atijamit. 4 Ániine anoosani áfimenumi fúkaaf foola man aam di elawey mba di káriiŋen kurimak di fáculey yati bukanak, oo álebienut Apakenaau Áamakau an eenomi fúkaaf foola. 5 Bare aseek anoosani ámuuroutumi man aam di elawey mba di káriiŋen kurimak di fáculey yati bukanak, oo álebienut fúko’ool, yesooyesoor nan funangund náciikoe. 6 Kaanjaat aseek anoosani alatumi kámuuro, ñaa oo aate káciiko walool. Mati aseek áciikoe funangund mba namiin walool témi moo puñenipuñen, kama ñaa naate kámuuro. 7 Ániine aatut kámuuro, mati Atijamit atuukumi ániine di búyesoorab bati fúko’ool, di poop mawuŋam mati Atijamit, ban anaare anoosani mawuŋam mati ániine. 8 (Mati ániine atuukuti kápurumul di anaare, bare anaare atuukimi kápurumul di ániine. 9 Ániine atuukutimi bee mati anaare, bare anaare atuukimi bee mati ániine.) 10 Moo kammi anaare naate kámuuro man áyiisen mati akila nalakolako di kañenak kati fujuumaf fati ataool mati simaleekaas soosu bo kajikerool. 11 (Moo manoosani, di bújonlenab bati Akiiyaau ániine letaŋoolen alako anaare balet, anaare poop letaŋoolen alako cebool ániine balet. 12 Handeneen anaare atuukie kápurumul di ániine, bare ániine anoosani nawoliwol di aseek biñoo no’ona. Ban Atijamit oo ácite wabajumi wanoosani.) 13 Jigamenooro titooruul maa bagamab. Mante jajak man aseek alaw Atijamit fúko’ool fútiikaar? 14 Mante wulaal di kúko’olaal umanjutaal mati jakut man ániine akaten walaw baak? 15 Bare mati aseek kankaan búkaroor, walool wabaake woo ukankaan múfimenumaool. 16 Bare kaanjaat anoosani amaŋe kañakoorak wan ireguuñaa, wulaal ubajutaal mukaana muceen wuuj mukaanaam ume, ban kuriibaak búrom kati kujojak kati Atijamit kusosof buruŋab bákonab mati mo. 17 Manoosani, di kájaatikenak uke kariiboorak, ínje letiŋoolen isaluul. Mati nampi jijojumi tákon fujoj fukila jikaanekaan jákaati. 18 Mútiyaaram, kuceen di muyuul kureganreg mati kama muyuul nan jijojeñaa di fujojaf fooluul úyegetuul úlakoeriit tákon, bukaaku kujuumujaat maa bukaaku maa. Nibabaj kafium mati mo’omu waaf wabajoe. 19 Bajut kamanteer mati kañakoorak koote kayito titooruul man kuceen di muyuul kammi di malegen kumanj tíen. 20 Nan jijojemi tákon, lee káliimenak kati Akiiyaau jiriemi. 21 Kuceen di muyuul kureganreg bukaaku di muyuul kuliimeliim man kuri muriaam mooliil bacaabut di bukaaku. Moo kammi, bukaaku man kucaarecaaret, bukaaku man kúkalie. 22 Waa? Mante jibajut sísindouul dampi jiri di jiraan jíkali? Mba mante jimammaŋ man jiheelene fujojaf fati Atijamit ban ninsi jipuñen bukaaku kabajutumi waaf? Jikammojaat, ínje waa neete ereguul? Mante jimammaŋ man isaluul? A’a, letiŋoolen ikammo. 23 Mati ínje poop wan ibajumi di Akiiyaau di fúko’ool, woo nemmi di kaliikitenuul man jiriiben. Fukaf fukila nan Akiiyaau Yensa bukanak kápurum di oo, baŋare fúmbuur fákon, 24 ban nan asalumi aban, namiinufo, man ammi, “Ure eniilom bee mati muyuul. Jikammo man jiwoolom.” 25 Moo mákonam poop nan kurimi káliimenak kuban, naŋarumi éraanumaay man ammi, “Éraanumaay uye eenomi kasoofoorak kunkulak kan Atijamit ajuumenumi di muyuul ñátum di fúsimaf fúmboom. Nanoosani nampi jiraanumomi kápurumul di yo, jikammo man jiwoolo’om. 26 Mati nanoosani nan jirimi mbúurey uye ban di jiraan kápurumul di éraanumaay uye, muyuul jireg mati ecetey yati Akiiyaau bee nampi alaañulomi. 27 Moo kammi, ampi arimi mbúurey mba naraan kápurumul di éraanumaay uye yati Akiiyaau bálebienut, an akila nakankaan majakut eniiley di fúsimaf fati Akiiyaau. 28 Moo kaane, anoosani ámeelo’ooro jak, mbi kiti ari di poop naraan di éraanumaay. 29 Mati anoosani arimi naraan bálebienut wafelumi eniiley yati Akiiyaau, Atijamit panatek nan arimi naraan. 30 Moo kammi kajuupoe di muyuul kúliŋut, kúju’ut ban bukaaku koo kucecet. 31 Di mútiyaaram úmeelo’ooroaajaat tíen, wulaal ootutaal kagameni. 32 Bare nampi Akiiyaau agamenolaami ban nakurolaal, létufirenaali di kati dúniyaay. 33 Kutiom, moo kammi nampi jibilumi jijoj tákon bee furi, mbi jikoboor. 34 An acaaretujaat akila naate furi waaf síndo’ool, takumbi jibaj kúnagak kati Atijamit nan jijojumi tákon. Nampi íriiŋubomi, pánijaatikenuul mati waafaw uceenaw wan jiciikumi.
