1 Ínje Paul, an Atijamit amukenumi di kamaŋak koola man ikaan áriiŋena ati Apakenaau Áamakau, eem di eciik letaraay uye di atiolaal ariiba Sosuten. 2 Eciikiciik bee di kati fujojaf fati Atijamit di ésukey yati Korint. Muyuul kan Atijamit amukenumi jikaani bukanool kálirooraak, ban di jimiiceelaetool di kareesak koola, nan man wúli di bukaaku búrom kawonkeoomi Akiiyaau. 3 Emitey ekaan Atijamit Ampaolaal di Akiiyaau Yensa Apakenaau Áamakau kuwuluul majakam di kásuumaay. 4 Ínje oomu di esal Atijamit nanoosani bee mati muyuul, mati majakam man asenuumi kápurumul di Apakenaau Áamakau Yensa. 5 Atijamit nakaanuumi man jibaj waaf wajake juup di Apakenaau Áamakau ñátum di kawulak kati kasanken kanoosani di fumanj fanoosani. 6 Mati wan úyiisenuumi mati Apakenaau Áamakau ubibil ukaan malegen di titooruul. 7 Bajut kawulak kápurumul di Búyegetab Bátienaab bati Atijamit hani kákon kan jiyabut, man jommi ñaa di ekobey élaañuley yati Akiiyaolaal Yensa Apakenaau Áamakau. 8 Pánaliŋenuul bee di fúbanumaf, ban leejibaj kabet di funakaf fati Akiiyaolaal Yensa Apakenaau Áamakau. 9 Atijamit afiumaay, áwonkuluumi man jibaj bapaalaayab di Añoolool Yensa Apakenaau Áamakau, Akiiyaolaal. 10 Kutiom, nilawuulaw máamak di kareesak kati Akiiyaolaal Yensa Apakenaau Áamakau, man jikaan dákon di wan jisankenoorumi, manteer takumbi kápajuloor kulako titooruul. Jikaan túu man jikaan tákon síwoonooras sooluul sákonas di wákonaw. 11 Mati kuceen kápurumul di fiilaf fati Kuloe kureganreg mati babaj mulobaam muyitoyito di titooruul, muyuul kúpaalumom kuriibaak. 12 Wan ínje emmi di eregey woo eenomi mo’omu, anoosani di muyuul aan, “Ínje Paul neem di eriib,” aceen poop naan, “Ínje Apolo neem di eriib,” mba “Ínje Kefa neem di eriib,” mba “Ínje Apakenaau Áamakau neem di eriib.” 13 Mante kama Apakenaau Áamakau kugaba room? Mante ínje Paul, ifaaŋeenimi bee mati muyuul? Mba mante ai di myuul átiigulenimi di kareesak kati Paul? 14 Ínje nisasal Atijamit mati bajut an ítiigulene di muyuul leejaat Kirisipo di Gayos. 15 Moo takum an areg mati muyuul di kareesak kúmboom jibaje kátiigulak. 16 (Nítiigulentiigulen poop kati bajamab bati Sitefan. Leejaat buko’oku iwoolout aceen an ítiigulene ínki.) 17 Mati Apakenaau Áamakau aboñutom bee kátiigulen bukan bare man íriiŋen furimaf fajakaaf, báyiisenut malinlo múmboom, mati takumbi ecetey yati Yensa di ébaarey yati búpinab ekaan ñaañaaña. 18 Ínje nimammanj tíen mati káriiŋenak kurimak mati ébaarey yati búpinab koo kukankaan kayesasoor bee di bukanak kájimmi, bare wulaal kapakumi kankaan kánkumak kati Atijamit. 19 Mati ciikiciik, “Panikajen fumanjaf fati kalinlomi, ban panikajen malinlaam mati kalinloaak, 20 Alinlaau oomei? Amanjaau oomei? Añoosaau ati jaat oomei? Mante lee Atijamit alaañenumi malinlaam mooluul mati dúniyaay mukaan mafuuri? 21 Mati Atijamit di malinlaam moola, nakammi bukanak takumbi kuŋoolen kumanjool ñátum di malinlaam mooliil. Bare Atijamit nasofumi bee kapaken kafiummi ñátum di káriiŋenak kóololi kan bukanak koonemi kayesasoor. 22 Mati Kúyahuud koone bee ejuk wajamurerutimi man tíen, ban di Kúgirik koone man kuñes malinlaam. 23 Bare mati wúli, núriiŋenriiŋen mati Apakenaau Áamakau an kufaaŋenumi di ébaarey yati búpinab. Kúyahuudak kajuupoe kumaŋut rebo bee ejam mati káriiŋenak, Kakaanutumi Kúyahuudak kajuupoe kusosof káriiŋenak kukila kukankaan kayesasoor. 24 Bare kan Atijamit awonkulomi bee mati epakey, Kúyahuudak di Kakaanutumi Kúyahuudak, Apakenaau Áamakau oo eenomi kánkumak kati Atijamit di poop malinlaam mati Atijamit. 25 Mati waaf wakammi nan mafuuri mati Atijamit múkoyume malinlaam mati anau, ban kálaamoak kati Atijamit koo kufaŋe éliŋey yati anau. 26 Kutiom, jiwoolo man joonoeenumi noo eeno nan Atijamit amukeneenumi. Bukanak kati dúniyaay kusofeenumi kupinaay di muyuul ceb kulinloe, mba kubabaj kánkum, mba kati fiil fajamoe. 27 Bare Atijamit namukenumi wan bukanak kati dúniyaay kusofumi ubajut fúkaw man apuñen kalinlomi. Atijamit namukenumi kálaamomi di dúniyaay man apuñen káliŋumi. 28 Atijamit namukenumi wan bukanak kati dúniyaay kujikeremi tentaam ban di kuheelen, bare namukenumi man akajen wan bukanak kati dúniyaay kusofumi wabaje fúkaw. 29 Atijamit nakammomi mati an letaŋoolen á’aamakalenoor di bújonlenab boola. 30 Bare Atijamit eenomi kátukak kati eroŋey yooluul di Apakenaau Áamakau Yensa. Kápurumul di akila Atijamit nasenolaami malinlaam moola fúkoumo, nasofolaami bukan kajoone, nakaanolaami nan bukanool, ban napakenolaal. 31 Moo kaane, nan man ciikimi, “Ampi amaŋumi bee ká’aamakalenoor, mbi á’aamakalenoor wan Akiiyaau akaanumi.”
