1 Ni mimi P'aulo muhendikazi wa Jeso K'irisito. Mimi nàtsagulwa ni Mulungu nikale muhumwa wa widimi wa ye Jeso K'irisito, na achinihuma nisumurire Ngumaye Mbidzo. 2 Mulungu wàalaga at'u yiyo Nguma Mbidzo kuchirira Maandiko ga agomvie p'indi yenye, 3 na Nguma Mbidzo yiyo yi dzulu ya Mwanawe. Yiye upandewe wa chidamu, wàlaa mudzungu wa mufalume Daudi. 4 Ela upandewe wa Roho wa utakatifu, wàonyeswa kukala, ni Mwanangwa wa Mulungu ariye na widimi, o ukatiwe wa kufufuka kulaa kuzimu, na yiye Jeso K'irisito ndiye Bwana wehu. 5 Mulungu kuchirira Jeso K'irisito, mimi wànonera mbazi, na achiniika nikale muhumwa wa widimi wa ye Jeso K'irisito, na nimuhikirehikire, kwa ta nialongoze at'u a viryomo vyosi amukuluphire, na amwishime. 6 Mwimwi ajeso a Rumi namwi mu mumo kwakukala, Mulungu wàmwiha mukale a Jeso K'irisito. 7 Ndo ninamwandikira baruwa mwimwi ajeso mosi a Rumi. Mwimwi Mulungu unamuhenza, na wàmwiha mukale at'ue. Baba Mulungu na Bwana Jeso K'irisito, naamuhats'e, na amuhende musagale na reri yao. 8 Enehu a chijeso, rangu ra kwanza ni kwamba, ninamulavira mumvera Mulungu kuchirira Jeso K'irisito kwa mwimwi, kwakukala, nguma yigot'a chila phat'u kukala, munamukuluphira Jeso K'irisito jeri. 9 Mwimwi ninamuvoyera ukati wosi mo mwangu mavoyoni, na maneno gaga ni ga jeri ta ye Mulungu unamanya. Mimi ninamuhikirahikira Mulungu chivyangu vyosi niidimavyo, kwa kwasumurira at'u Nguma Mbidzo dzulu ya Mwanawe. Ndo rangu nivoyaro ni kukala; ngawa nipate ukati vivi nidze ko kwenu. Elako, gago ninahenza gatuwane na mahenzo ga Mulungu. 11 Mimi ninahenza muno nimone, kwa ta nimup'e chit'u fulani cha chiroho cha kumujenga. 12 Na nichigomba vivyo ni ninaamba, mimi na mwimwi, bee hundajenganani. Yaani, kuluphiro renu rindanijenga, na rangu naro rimujenge. 13 Rangu nihenzaro murimanye mwimwi enehu a chijeso ni kukala, mimi nidzidzila k'ano nyinji nidze ko kwenu. Ela ta vivi chila nichidzila, ng'o, maneno k'agenda hivyo vyangu nidzilavyo. Mimi ninahenza nidze nivumise Nguma Mbidzo kati yenu ta anjine enu aokoke, dza vyohendeka kwa at'u a makabila manjine anzienu. 14 Mimi nina muzigo wa kuhikirahikira at'u osi, Ayunani, na ario ts'i Ayunani, enye chisomo, na ta ots'o chisomo. 15 Gago ndigo ganihendago ta ninahenza muno nidze nimusumurire Nguma Mbidzo mwimwi achina Rumi. 16 Mimi yo Nguma Mbidzo ts'iyonera haya kamare, maana, yina widimi wa Mulungu wa kwativya osi akuluphirao; kwanzira siswi Ayahudi, ta at'u a makabila manjine nao. 17 Yiyo Nguma Mbidzo yinang'aza lwazu-lwazu vyo Mulungu aphokeravyo at'u dza enye haki, na Mulungu uphokera mut'u kwa kuluphirore tu bahi. Vivi vinagwa sawa na Maandikoge gaambago: "Mut'u yedzephokerwa ni Mulungu dza mwenye haki kwa kumukuluphira yiye, undakala na uzima." 18 Mulungu unang'aza vyondoabit'ira chitaiche adambi osi ario anauziza ujeri, kwa go gao mai gosi agahendago. 19 Maana, anamanya kukala, Mulungu ndiye muumbi dza at'u osi amanyavyo, kwakukala, Mulungu unaenderera kwang'azira. 20 Kulaira Mulungu ariphoumba urumwengu, at'u anamanya t'ot'ot'o kukala, widimiwe k'auna musindikizo, na yiye ndiye Mulungu wa jeri. Maneno gago k'agaoneka, ela ganamanyikana. At'u gago anagamanya, kwa kona vyo vit'u vyoumbwa ni ye Mulungu. Ndo at'u k'aana cha kudzihehera. 21 At'u anamanya kukala, kuna Mulungu, ela anarema kumwishima, na kumulavira mumvera dza Mulungu wa jeri. Ndo maazo gao gadziima k'agana tende, na ga dzizani. 22 Enye anadzona ana hekima, ela ni azuzu. 23 Ao anaricha kumuvoya Mulungu ariye moyo ta kare na kare, o anavoya vinyago, virivyo vyàtsongwa dza at'u ario anafa, nyama a kuburuka, nyama a magulu mane, hebu nyama a kuhambala. 24 Ndo kwakukala, at'u àkala ana madambi muno hivi, Mulungu wàaricha ahende go maneno mai agaazago, na vivi anahenderana maneno ga waibu. 25 At'u ao àricha kukuluphira ujeri wa Mulungu achikuluphira ulongo. Ao àabudu na kuhikirahikira vyoumbwa ni Mulungu, achiricha kumuvoya na kumuhikirahikira ye Muumbi mwenye, ariye unawirya kulikwa ta kare na kare! Amina. 26 Ndo gago ndigotuma ta Mulungu achiaricha at'u akale na t'amaa zao mbii, ta ache achihendana ache, maneno garigo ts'i ga kawaida. 27 Alume nao achiricha ga kawaida ga kulala na ache, ta o ahenza kuhendana ache ao enye, na vivi Mulungu unaatiya akili awiryayo, kwa go gao mai gogahenda. 28 At'u àrema kutuwa gokala anagamanya dzulu ya Mulungu, na ndo Mulungu naye achiaricha akale na akili za kuhenza kuhenda mai, kwa ta ahende go arigo k'aawirya kugahenda. 29 At'u ao adziudzala ui wosi, ana moyo, anahenderana mai, adziudzala chidzitso, anamenana, anaulagana, analembana, na anapigana makarama. Chisha, anatsunana, 30 anahadzana na mai, adzimumena Mulungu, anahakanana, ana ngulu na anadziunula, analilikana njira mbiphya za kuhendera mai, na k'aaishima avyazi ao. 31 Ao k'aamanya madzo nini na mai nini, k'aachimiza vilagane vyao, na k'aana mbazi. 32 Ao anamanya kukala, lagizo ra Mulungu rinaamba, mut'u asagalaye mazagazi dza gago niafe. Ela o anaenderera kugahenda, na ta o ahendao madambi dza gago nao, anaalika.
