1 Chisha, Jeso wàatarira anafunzie t'adi yiyi kwaonyesa kukala, ni seti avoye ukati wosi phots'okuluphukwa. 2 Jeso wàamba, "Kwàkala mulamuli mumwenga mudzi umwenga yekala k'amogopha Mulungu, hebu kumumanya mut'u. 3 Na mudzi uo vivyo, kwàkala kuna muchet'u gungu mumwenga yekala achimwendera yiye mulamuli k'ano nyinji na kumwamba, 'Nihehera nipate haki yangu yophokwa ni mudawa wangu.' 4 Ndo ts'iku nyinji zàchira na yiye mulamuli achikala k'enzi kumuhehera yiye gungu. Ela musindikizowe achaza mwakwe moyoni achamba, 'Ta niripho mimi ts'imogopha Mulungu hebu kumumanya mut'u, 5 ela nindamuhehera vivyo yuyu muchet'ungwa, kwakukala, unadza achiniyuga, na nits'iphohenda vivyo, bee undaenderera kudza phapha kwenda-kwenda ta musindikizo ganitsose go gakwe!' " 6 Ndo Jeso achenderera kwamba, "Chikala ye mulamuli mui tu wàona ni baha amuhehere ye muchet'ungwa kwa ta wàkala unenda achimuvoya gago kwenda, 7 ndo akale Mulungu k'andaahehera at'u oatsagula, ario anamuririra usiku na mutsana? Akale undaaumirirya at'u achimuririra? 8 Ninamwambira mino, undaahehera maruru. Ela ta garipho maneno ga hivyo, nikale mino Mut'u yelaa dzulu nichiuya kahiri duniani, nindakudzaona at'u ondokala acheri kunikuluphira?" 9 Jeso wà-aambira t'adi yiyi at'u okala anadzona anahenda ga haki, na anaaphurya anjine. 10 Yiye wà-aamba, "Kwàkala alume airi okwenda hekaluni kwendavoya. Mumwenga wàkala ni Mufarisayo, na ye munjine wàkala ni mutosi wa kodi. 11 Ye Mufarisayo wàkwendaima achivoya chimoyomoyo kwamba, 'Ninakulavira mumvera Mulungu, kwakukala, mimi ts'inga dza at'u anjine ario ni anyang'anyi, adambi, azembe, na hebu ta ts'inga dza yuyu mutosi wa kodi. 12 Mino ninafunga k'ano mbiiri kwa juma, na ninalavya sadaka na fungu ra kumi ra pato rangu.' 13 Ela ye mutosi wa kodi wàima k'anda, na ta k'alolere dzulu mulunguni ats'iphokala wàgwira hama kwa utsungu tu na achamba, 'Mulungu, nonera mbazi, mimi ni mwenye dambi.' 14 Ndo ninamwambira jeri, ye mutosi wa kodi wàuya mudzini achikala uphokerwa ni Mulungu dza mwenye haki. Ela ye munjine ye k'aphokererwe ni Mulungu dza mwenye haki, maana, chila adziunulaye undaudzwa nyuma, na chila adziudzaye nyuma undaishimiwa." 15 Ts'iku mwenga, at'u àmurehera Jeso anache adide kwa ta aabandikire mikonoye aahats'e, na anafunzi ariphoaona arat'u at'u oareha, achiagombera. 16 Ela Jeso ye achiaiha ende kwakwe arat'u anache na achiaamba anafunzie vivi, "Muts'iazize ao anache, aricheni adze kwangu, maana, Ufalume wa Mulungu ni wa at'u ario dza aa anache. 17 Ninamwambira jeri, mut'u yeyosi yets'e kuluphiro dza ra mwanache mudide, k'andaphenya kwenye Ufalume uo." 18 Chilongozi mumwenga wa Chiyahudi wàmuuza Jeso achimwamba, "Mwalimu mudzo, ninihendedze mino ta ndo niupate uzima uphya wa kare na kare?" 19 Jeso achimuuza naye achimwamba, "Kwadze unaniiha mudzo? K'akuna ariye mudzo, ats'iphokala Mulungu tu bahi. 20 Ukale unagamanya gano malagizo ga Mulungu gaambago, 'Uts'izinge, uts'iulage, uts'iiye, uts'ilavye ushaidi wa ulongo, na aishime abayo na ameyo' ?" 21 Ye achamba, "Gago gosi bee ninagamanya, na nidzigatuwiriza hangu utana wangu." 22 Jeso ariphosikira gago achimwamba, "Uwe ucheri kukosa kuhenda chit'u chimwenga tu. Kaguze chila chit'u uricho nacho na p'esa zondopata wagavye achiya. Uchihenda vivyo, undakala udzidziikira mbeko mulunguni, h'aya chidzako udze unituwe." 23 Ela ye mut'u ariphosikira gago, wàshononeka, maana, wàkala ni tajiri muno. 24 Jeso ariphomona unashononeka, wàamba, "Heka ni vikomu muno kwa matajiri kuphenya Ufalumeni kwa Mulungu! 25 K'aviidimikika ngamia kuchira na t'undu ya ts'inzano, na k'aviidimikika muno yenye tajiri kuphenya Ufalumeni kwa Mulungu." 26 Arat'u at'u ariphosikira gago achiuza achamba, "Bee, ni ani sambi aidimaye kutivywa?" 27 Jeso achiudzidza achamba, "Gots'oidimwa ni at'u, Mulungu unagaidima." 28 P'etero naye achimuuza vivi, "Sino vidze? Kwani vyo hwàricha midzi yehu huchikutuwa!" 29 Jeso achiaamba, "Ninamwambira jeri, mut'u yeyosi yericha mudzi wao, muchewe, nduguze, avyazie hebu anae kwa dzulu ya Ufalume wa Mulungu, 30 undaphokera manji muno kuchira gogaricha ukati uu, na chisha akale na uzima uphya wa kare na kare kwenye o urumwengu udzao." 31 Jeso wàausa k'anda arat'u ahumwae kumi na airi a widimi achenda-aamba, "Sirikisani! Vivi hunakot'a kwenda Jerusalemu, na kuko chila chit'u choandikwa ni agomvi a Mulungu dzulu ya mimi Mut'u yelaa dzulu, chindachimizwa. 32 Maana, mimi nindakwendalaviwa kwa at'u a makabila manjine, na ao andanihenda chinyago, anihendere maneno ga waibu, na anilats'ire mahe. 33 Ao andanipiga vibok'o, na chisha aniulage, ela ts'iku ya hahu yichifika, nindafufuka." 34 Phapho ao anafunzi achililikana, ela k'aamanyire chokala chinagombwa ni Jeso, maana, ujeri wa maneno gago k'aaumanyire. 35 Jeso ariphokala unatapira mudzi wa Jeriko, mut'u mumwenga yekala k'aona, wàkala usegere njira bomu unavoya-voya achirao. 36 Ariphosikira duu ra at'u rinachira, wàuza vivi, "Kudzegwani asena?" 37 O at'u achimwamba, "Ni Jeso muchina Nazareti unachira rero." 38 Ndo yiye achigomba kwa laka ra dzulu achamba, "Nonera mbazi Jeso mut'u wa mudzungu wa Daudi!" 39 Arat'u at'u okala a mbere achimugombera na achimwamba anyamale, ela ye ta achikaza kugomba kwa laka ra dzulu kwamba, "Nonera mbazi Jeso mut'u wa mudzungu wa Daudi!" 40 Jeso ariphosikira gago wàima, achilagiza areherwe kwakwe. Ndo ye mut'u yets'ona ariphofiswa phephi, Jeso achimuuza achimwamba, 41 "Unahenza nikuhenderedze?" Ye mut'u yets'ona achimuudzidza achimwamba, "Bwana, ninavoya nipate kona." 42 Jeso achimwamba, "Ona! Kuluphiroro ridzikuphoza." 43 Phapho kare ye mut'u yets'ona achona, achimutuwa Jeso na kuno unamulika Mulungu. Arat'u at'u osi ariphoona gago, achimulika Mulungu nao.
