1 Ni mimi Juda muhendikazi wa Jeso K'irisito, na ni nduguye Jakobo. Ninamwandikira mwimwi oihiwa ni Baba Mulungu mukale at'ue. Yiye unamuhenza, na Jeso K'irisito ndiye mumanyiriri wenu. 2 Ninamuvoyera mukaze kukala na mbazi, musagale na reri, na muhenzane muno. 3 Enehu a chijeso nimuhenzao, maneno godzokala nichigaaza muno, bee ni kumwandikira dzulu ya wokofu wehu hosini, ela vivi ninaona kuna uhalahala wa kumwandikira dzulu ya ut'u unjine. Mimi vivi ninamwandikira kumukalata mwenderere kubagalikira muno ujeri muukuluphirao, urio Mulungu wàap'a at'ue lumwenga tu, na vivyo vinatosha ts'iku zosi. 4 Mimi nidzona baha nihende vivyo, maana, at'u ots'omogopha Mulungu àphenya mwenu duuni chisiri-siri, na vivi anagaluza mafunzo dzulu ya mbazi za Mulungu kwa ta azinge. Na anarema kumukuluphira Jeso K'irisito, ariye yiye hicheye ndiye Bwana wehu mwenye widimi ots'osika. At'u ao ndio ahadzwao ni Maandiko ga Mulungu kukala, ni akosa, na andatiywa akili. 5 Ajeso asena, gaga nimwandikirago vivi ninamanya kukala munagamanya kare, ela ninahenza nimukumbikize vivyo. Ra kwanza ni kwamba, p'indi Bwana Mulungu wàativya Aiziraeli kulaa its'i ya Misiri, ela chidzakoche achidzaaulaga osi arat'u okala k'aamukuluphira. 6 Ra phiri ni kwamba, malaika oricha kutuwa wa kuhenda kazi zao zokala àhewa ni Mulungu, na achichimbira mulunguni, Mulungu ao nao wàaika dzizani, na achiafunga na minyororo yots'ovuguka, atarize kulamulwa ts'iku ya musindikizo wa urumwengu. 7 Ra hahu ni kwamba, achina Sodoma, Gomora na midzi ya phephi-phephi na yiyo nao, k'aamogophere Mulungu dza o malaika, ta o àtuwa wa kuzinga, na kuhendana ache chinyume cha vyopangwa ni Mulungu. Na ao nao Mulungu wàatiya akili kwa kwahangamiza na moho, kwa akale mufano kwa chila mut'u kukala, adambi andakwendatsuphwa mohoni ta kare na kare. 8 Ndo ao at'u ophenya mwenu duuni, andatiywa akili dza ao. Ao anatuwa maneno agalohago k'omani, ta anahumira miiri yao chinyume, anaphurya widimi wa Mulungu, na kwaifya malaika a dzulu. 9 Maneno gago anagahenda, ela ta ye Mikaeli, ariye ndiye malaika mubomu, chisha k'agahendere. Yiye ariphokala unaheha na Shetani dzulu ya ni ani yekala niaphale lufu lwa Musa, Mikaeli k'asubutire kumwamba ni mulongo, hebu kumwifya ye Shetani, its'iphokala ye wàmwamba, "Bwana Mulungu, undakona!" 10 Ela ano anaifya chila chit'u chiricho k'aachimanya, na anadzihendera rorosi adzisikiraro kurihenda dza anyama, na gago bee ndigo gondoricha Mulungu aahangamize. 11 Ndo ao bee andamanya enye, kwakukala, anahenda makosa dza Kaini. Na anahenda makosa dza Balaamu kwa chipherephere cha p'esa. Chisha, anamupinga Mulungu dza Kora vyohenda, na andahangamizwa dza yiye vyohangamizwa. 12 At'u ao munarya nao shuhuli ya Bwana, ela k'aamogopha Mulungu ta anga dza kwamba ni mara-mara ga uchafu, na adzimanya ao enye tu. Ao k'aana aokolaro ta anga dza maingu gots'oreha mvula ta kaziye nikuphepheswa ni vuto. Ao chiroho àfa kamare dza mihi yots'ovyala t'ude ta ukatiwe wa kuvyala, na kwa vivyo, nikung'olwa na miziye. 13 Maneno gao ga waibu agahendago, ga lwazu dza fulo ra maimbi mabomu ga baharini. Ao anga dza nyenyezi zenendazo, ela Mulungu wàaikira andakwendakala ko kut'u kwa dziza kali ta kare na kare. 14 Mugomvi wa Mulungu Henoki, ariye chivyaziche ni cha fungahe huchanza kutara na cha Adamu, wàamba vivi chimbere dzulu ya at'u ao, "Bwana undakudza na mahelufu na mahelufu ga malaikae atakatifu, 15 adze alamule at'u osi, na aatiye akili osi amupingao Mulungu. Yiye undaatiya akili kwa go gao mai gosi gogahenda ga kumupinga Mulungu, na aatiye akili adambi kwa go gao mai gosi gomwifyira Mulungu." 16 At'u ao ni ah'uh'u ukati wosi, na kwalaumu anjine, alongozwa ni t'amaa zao mbii, anadziunula na go gao ahendago, na achilika at'u anjine, anaalika tu kwa apate ut'u. 17 Enehu a chijeso nimuhenzao, ninahenza nimukumbikize garat'u goambirwa p'indi ni ahumwa a widimi a Bwana wehu Jeso K'irisito kukala gandalairira. 18 Ao àkala achimwamba, "Ts'iku za phephi na musindikizo wa urumwengu zichifika, kundalairira at'u ondoaifya ajeso. Ao andakala analongozwa ni zo t'amaa zao mbii zimupingazo Mulungu." 19 At'u ao ndio arehao mugavikano, k'aa chiroho, na alongozwa ni t'amaa zao mbii tu. 20 Ela k'amona mwi enehu a chijeso nimuhenzao, humirani uo ujeri utakatifu muukuluphirao mujengane, mukaze kukomala chiroho. Na voyani kwa kulongozwa ni Roho wa Mulungu, 21 na muts'ivunze menzwa ya Mulungu vivi mutarizavyo Bwana wehu Jeso K'irisito adze amup'e uzima uphya wa kare na kare kwa mbazize mwenye. 22 Aonereni mbazi at'u ario a chiwogawoga. 23 Anjine ativyeni ats'endetsuphwa mohoni ta kare na kare, na ta anjine aonereni mbazi. Ela dzimanyirireni muts'idze mukabanangwa ni t'amaa zao za chimwiri. 24 Nahumulikeni Mulungu, ariye una widimi wa kuhuhenda huts'iuye nyuma, na kuhureha mbereze na kuno huna raha, na k'ahuna ila yoyosi. 25 Nahumulikeni kwakukala, yiye ndiye Mulungu wa jeri hicheye, na Mutivyi wehu yehutivya kuchirira Bwana wehu Jeso K'irisito. Nahumulikeni, kwakukala, yiye ni mubomu, una mukotse na widimi okala nao hangu p'indi, na undakwenderera nao vivyo ta kare na kare! Amina.
