1 Ndo kwahivira siswi hunalolerwa ni o at'u anji enye omukuluphira Mulungu ta musindikizo, nahubit'eni chila chit'u chiricho chinaidima kuhuyuga, kamwe dambi, yiriyo ndiyo yihufungayo ta hukashindwa ni kwenda mbere. Na, nahukazeni na kuvumirira kwenye uu mushindano wa mairo oihirwa ni Mulungu ta huumaleni vivyo. 2 Na vyo hukazavyo, nahwenderereni kumulola Jeso, ariye ndiye ahulongozaye humukuluphire Mulungu, na ndiye ahutiyaye moyo huumale o mushindano wa mairo. Yiye wàvumirira, na achikubali waibu wa kuulagwa kwa kukot'wa misumari musalabani kwakukala, wàkala unamanya gachisira gago, undahamirwa. Na vivi usegere mukono wa kulume wa chihi cha utawali cha Mulungu. 3 Mwimwi lilikanani dzulu ya Jeso arivyoturika, na arivyoturiswa ni adambi okala adzimumena, ela ye achivumirira. Ndo mwimwi muts'ife moyo muts'idze mukalaira njirani. 4 Mwimwi munaheha na dambi, ela k'amudzangwe kuheha ta mukakala mutsuma kuulagwa. 5 Mimi ninamanya kukala, k'amudzangwe kuganyala go maneno ga kumutiya moyo, garigo Mulungu unamwambira mwimwi anae. Phapho Mulungu wàamba, "Mwanangu, uwe uchifikwa ni pigo ra Mulungu, bit'a akili, na Mulungu achikukanya, uts'ife moyo. 6 Maana, Mulungu ukanya at'u aahenzao, na utiya akili chila amukubaliye kukala, ni mwanawe." 7 Vumirirani shenene mupatayo dza kwamba munatiywa akili ni Abayenu. Shenene yenu mupatayo yinaonyesa kukala, Mulungu unamuhwalira dza anae mwimwi, na bee k'akuna mwana yets'etiywa akili ni abaye. 8 Mulungu anae osi unaatiya akili. Ndo mwimwi muchikala k'amutiywa akili, bee vinaonyesa k'amu anae enye ta munga avuweni. 9 Abazehu a phapha duniani anahutiya akili, na hunaaishima vivyo. Kwa vivyo, hunahenzwa Abayehu ariye mulunguni achihutiya akili humwishimeni muno, na phapho hupate uzima. 10 Abazehu a phapha duniani, àhutiya akili kwa chiwango phokala hucheri anache, kutuwirizana na vyao vyokala anavyona vinawirya. Ela Mulungu ye achihutiya akili, unahutiya kwa ahwavize hukale atakatifu dza yiye. 11 Ukati huchikala hunatiywa akili, k'ahuhamirwa. Ela gachichira gago, ao ondokala akanywa ni vyodzotiywa akili ni Mulungu, anapata manoso ga kusagala na reri, na ahende maneno ga haki. 12 Ndo mwimwi unulani mikono yenu yodzotsoka, na mudinise mavindi genu godzotsoka. 13 Na gwirani njira ya tititi, kwa ta o ario anga dza kwamba ana vigurye kati yenu, ats'idze akalumira, ela aphole. 14 Ajeso asena, mwimwi hendani vyenu vyosi mwidimavyo mone kukala, munasagala na reri na chila mut'u, na mukale atakatifu, kwakukala, mut'u niakale mutakatifu ndipho akamone Bwana Mulungu. 15 Mwimwi dzimanyirireni kwa ats'idze ta mumwenga wenu akatoka na mbazi za Mulungu kwa kumererwa ni muzi wa utsungu kati yenu, na phapho mukareha mai kwa anji. 16 Na dzimanyirireni mwimwi kwa ats'idze ta mumwenga wenu akakala muzinzi, hebu akats'amogopha Mulungu dza Isau, ariye wàbadili gosi gokala undagapata dza mwana muvyere, kwa chakurya cha kurya phapho kare. 17 Ndo dza mumanyavyo, gariphochira gago, Isau wàhenza kuhats'wa ni abaye, ela vivyo vichikala k'aviidimikika. Ndo ta aripho kurira wàrira kwa unahenza kugaluza vyokala udzivihenda, ela vivyo wàkala k'aidima kuvigaluza. 18 Mwimwi k'amunga akare ehu ofiswa mulimani kwenye okala unaaka moho, uganik'izwa ni ingu dziru, unameta na kupiga chikwakwara, 19 una k'ululu za gunda, na laka ra Mulungu unagomba. At'u ariphosikira ro laka ra Mulungu, àgomba achamba kukala, k'aaenzi aambirwe neno rinjine. 20 Maana, àkala k'aaidima kurituwa riro lagizo ra kwamba, "Richa mut'u, ela ta munyama achiuyaha uu mulima, niapigwe mawe ta afe." 21 Gago gohendeka phapho mulimani, gàkala ganaogofya muno ta Musa achamba, "Nidzogofyerwa muno ta ninatetema." 22 Ela mwimwi kwenu kofika ni mulima wa Sayuni, kwenye mudzi wa Mulungu ariye moyo, yaani Jerusalemu ya mulunguni, kuriko kuna mahelufu ga malaika arundikana phamwenga anahamirwa. 23 Mwimwi kwenu kofika, ni ko kwenye duu ra ana avyere a Mulungu, ario madzina gao gàandikwa mulunguni. Mwimwi mwàfika kwa Mulungu ariye ndiye mulamuli wa at'u osi, na kwa roho za at'u okala achihenda ga haki, na achiphokerwa mulunguni. 24 Mwimwi mwàfika kwa Jeso, ariye ndiye yereha riro Lagano Iphya, na kwa milatso ya Jeso yomwagika, yiriyo ni ya musamaha, ela ts'i ya kudai dza ya Abeli. 25 Ndo muts'ireme kumogopha ye agombaye. Maana, akare enu àrema kumogopha Musa, yekala ni mut'u tu, na ao achitiywa akili. Ndo munaona hundatiywa akili chidzedze sino huchirema kumogopha ye agombaye naswi kulaa mulunguni? 26 Mulungu ariphogomba ts'iku zizo, lakare ràsumbisa its'i. Ela vivi wàlaga achamba, "Dunia nindayisumbisa kahiri, na ts'indasumbisa dunia hicheye, ela nindasumbisa ta mbingu nayo." 27 Ndo go maneno gaambago, "Nindayisumbisa kahiri," ganaonyesa lwazu kukala, vit'u vyoumbwa vindasumbiswa, na vyuswe ta visale vyots'osumbisika. 28 Ndo siswi nahumulavireni mumvera Mulungu kwakukala, hunapata Ufalumewe urio k'ausumbisika. Na, nahumwabuduni kwa njira yiriyo yindamuhamira kuchirira kumogopha. 29 Maana, Mulungu wehu unga dza moho wochao tsetsetse.
